Cyprium Cafe

營業中

休息中

自從轉換左新的工作計劃後，每星期總有一日到沙田工作。每一次去到人生路不熟的地方，都要費煞心思搵食。暫時來講，附近最多嘢食的莫過於石門的瑞京廣場。今次來到一間頗為清新的Cafe，顏色格調都令人覺得好舒服。點菜後店員馬上送上餐包，有兩種款式而且熱辣辣，幾值得一讚。大肚婆好鍾意食魚，特別係有營養的魚，三文魚就係最佳選擇。輕煎的三文魚表皮脆脆的，而且配上特製的香草醬汁，感覺豐盈得來又清新，魚油味道又夠濃郁。輕鬆切開，可以見到一絲絲分明的魚肉，質感都幾軟滑。朋友仔就點左一款羊架，表面有不同的香料，質感同味道都非常之有層次。份量更加係非常值得欣賞，一客羊架竟然有七支骨，係其他西餐廳的足足一倍。朋友仔話味道唔錯，但由於佢叫咗五成熟，我只係淺嘗左一口。整體環境同食物質素都不錯的西餐廳，在新界區就顯得更為矜貴。而且價錢亦唔貴，值得一試。