影片
更多
2025-06-03
0 瀏覽
鐵板大師 Master Pan📍沙田橫壆街1-15號好運中心3樓3107-3108號舖今個星期到我去沙田陪下朋友啦，近排好運中心開咗唔少新舖頭、餐廳，邊行邊搵食嘅我哋被一間價錢優惠、門面乾淨、地方寬敞嘅餐廳—Master Pan吸引，排咗一陣隊，終於等到窗邊二人位入座。餐廳內有一家大細、亦有情侶、三五知己，基本上咩年齡層都有，就咁睇都知道適合唔同食客需求。最驚喜嘅係，呢度選擇多樣又大大份，但價錢經濟：全日不設加一服務費，但服務依然貼心，絕對係沙田區數一數二嘅高性價比之選！溫馨提示，所以主菜都可以選擇單點定配飯麵，後者仲可以無限添食，呢個市道下仍有咁益街坊嘅做法，真係抵讚！ 💰$68脆香巨型雞髀 🍗呢道脆香巨型雞髀可謂餐廳招牌菜之一，等位時見到雞髀密密出餐，金黃色又咁巨型，實在非常吸引。雞髀外酥內嫩，咬落脆卜卜，雞肉滑嫩多汁，一啲都唔乾柴！醬汁方面，野菌燒汁既creamy又惹味，唔似黑椒汁咁搶fo，又唔似燒汁咁普通，搭配墊底嘅雜菜都好夾，非常推介大家試試。巨型雞髀份量真心大，個人建議細胃口啲嘅，好似我哋咁分享，至於大胃王，當然要獨自挑戰啦！ 💰$88薑蔥爆田雞腿 🐸有無諗過鐵板餐都可以有
📍沙田橫壆街1-15號好運中心3樓3107-3108號舖
今個星期到我去沙田陪下朋友啦，近排好運中心開咗唔少新舖頭、餐廳，邊行邊搵食嘅我哋被一間價錢優惠、門面乾淨、地方寬敞嘅餐廳—Master Pan吸引，排咗一陣隊，終於等到窗邊二人位入座。
餐廳內有一家大細、亦有情侶、三五知己，基本上咩年齡層都有，就咁睇都知道適合唔同食客需求。最驚喜嘅係，呢度選擇多樣又大大份，但價錢經濟：全日不設加一服務費，但服務依然貼心，絕對係沙田區數一數二嘅高性價比之選！
溫馨提示，所以主菜都可以選擇單點定配飯麵，後者仲可以無限添食，呢個市道下仍有咁益街坊嘅做法，真係抵讚！
[價錢 Price]
💰$68
脆香巨型雞髀 🍗
呢道脆香巨型雞髀可謂餐廳招牌菜之一，等位時見到雞髀密密出餐，金黃色又咁巨型，實在非常吸引。雞髀外酥內嫩，咬落脆卜卜，雞肉滑嫩多汁，一啲都唔乾柴！
醬汁方面，野菌燒汁既creamy又惹味，唔似黑椒汁咁搶fo，又唔似燒汁咁普通，搭配墊底嘅雜菜都好夾，非常推介大家試試。
巨型雞髀份量真心大，個人建議細胃口啲嘅，好似我哋咁分享，至於大胃王，當然要獨自挑戰啦！
[價錢 Price]
💰$88
薑蔥爆田雞腿 🐸
有無諗過鐵板餐都可以有中菜食？朋友秉持一貫作風，揀咗成個menu入面最獨特嘅菜式，相比酒樓或大牌檔嘅薑蔥田雞煲，Master Pan嘅薑蔥爆田雞腿展現咗另一種風味。
田雞腿肉質緊實，完美結合薑蔥香味，用鐵板上更添香氣同「鑊氣」，唔配飯，混入意粉後，麵條掛滿薑蔥濃醬，居然出奇哋好食！夠膽食田雞嘅，可以嚟試下。
[價錢 Price]
💰$10 (套餐價)
旋風蛋飯 🍳
以優惠價就可以將白飯升級為旋風蛋飯，啱晒想食得更加滿足嘅朋友。蓬鬆嘅旋風蛋包裹住米飯，每一啖都充滿滑蛋嘅香氣。
[價錢 Price]
💰$58
芝士煙肉焗西蘭花 🥦
呢道唔焗西蘭花份量佛心，同等份量去其他餐廳，分分鐘要成百蚊！焗過嘅西蘭花仍保持翠綠嘅顏色同爽脆嘅口感，淋上豐富嘅兩重芝士同煙肉，大口食肉之外嘅營養選擇。
[價錢 Price]
💰$8/粒 (2粒起)
朱古力炸彈 🍫
朋友指定要叫嘅朱古力炸彈，外殼酥脆，內餡有流心朱古力醬，甜而不膩。
[價錢 Price]
💰$8/粒 (2粒起)
榴槤炸彈 💣
我就揀咗榴槤炸彈，簡直係榴槤控嘅福音！濃郁嘅榴槤香氣，搭配外層嘅脆皮，口感層次分明。
[價錢 Price]
💰$8/條 (2條起)
脆皮奶卷 🥛
我倆嘅至愛，奶卷外皮酥脆，內餡香滑重奶香，口感輕盈，一個唔小心會叫食到唔停得口。
[價錢 Price]
💰$28
朱古力心太軟 🌋
朱古力小火山擺盤頗有心思，雖然無誇張嘅流心效果，但朱古力苦中帶甜，蛋糕口感濕潤，算值回票價！
張貼
