Ruên Thai & Vietnamese

營業中

休息中

心中數一數二嘅泰國餐廳，店舖裝修雅緻、店員友善、食物選擇多、味道唔錯、價錢唔貴。閒日嚟都幾乎full house。 ✦ 烤扇貝扇貝煎成表面焦香，內裡彈牙。海鮮味道濃郁，無冰鮮感。點埋辣辣哋嘅醬汁，好開胃。 ✦ 炭燒香茅西冷牛肉 幾特別嘅菜式。牛肉嫩滑，粉紅色，西冷牛包住香茅燒，香茅味淡淡滲入牛肉度，令本身好濃郁嘅牛味多咗份清新。另外有生菜、芫茜、米粉等，可以夾埋/配搭牛肉食。 ✦ 泰式蟹肉炒飯 大大盤好飽肚，足料蟹肉、蛋絲、洋葱粒等，口感豐富，蟹味好香。飯稍為濕身，但飽滿唔腍身。 ✦ 椰絲斑蘭丸子布丁斑蘭丸子嘅斑蘭味好出，丸子口感煙韌，似硬身嘅西米露。加埋甜甜哋嘅椰絲，幸福感重。 ✦ 泰式黑糯米飯拌燉蛋話就話燉蛋，但唔係中式亦唔係法式嗰種，似一片滑滑哋嘅蛋啫喱。配埋q彈嘅黑糯米，口感豐富有層次。 埋單都係五百蚊左右。