南瀛水產

好耐冇食南瀛水產，記得以前喺附近返工成日過嚟食。佢哋主打係磯燒海鮮，店舖裝修擺設都充滿咗日本風格。仲有幾個海鮮魚缸可以見到新鮮生猛嘅海鮮喺入邊游水。記得以前每次嚟都會食佢哋個甲羅燒。因為佢哋個甲羅燒比同等級餐廳更抵食😋仲有專人幫你燒晒所有嘢，服務都相當到家。蚧味噌甲羅燒：有蟹膏、蟹肉、鵪鶉蛋、蔥花、蟹籽所組成，將所有嘢攪拌之後燒一陣已經聞到濃郁嘅蟹膏味。口感鹹香。但係一啲都唔腥。海鮮盛合：有生蠔、鮑魚、扇貝、海蝦、蛤蜊、蟹腳。所有海鮮都好新鮮，鮑魚喺燒嘅時候仲識郁。燒熟之後扇貝上邊有啲湯可以飲埋非常清甜仲有海水嘅鹹味。東瀛五點盛：有三文魚、吞拿魚、帶子、油甘魚同甜蝦既刺身。全部刺身都好新鮮。好肥美。牛肉烏冬：烏冬有口感，嫩滑彈牙。牛肉薄片煮得啱啱好。乳酸梳打：益力多味嘅乳酸梳打飲完之後好開胃。