申子居酒屋

營業中

休息中

之前食過位於銅鑼灣嘅分店，食物質素唔錯，呢日到訪旺角黑布街嘅另一分店。居酒屋主打食串燒、小食、刺身，餐廳設樓上座位，感覺好隱世，啱晒同朋友傾偈飲嘢。串燒點咗一款共十串嘅套餐（$468) - 入面包括豚肉金菇卷、手羽、手打免治墨魚棒、手打免治蝦棒、日本青椒仔、芝士青瓜串、雞髀肉、豬肋條、芝士年糕及香菇。全部都燒得香口，入口惹味。當中特別推介手打免治墨魚棒，入口好彈牙好食，手羽及豬肋條亦燒得非常之好味。鮮蟹肉粥（$168）- 蟹粥份量好多，入面有蟹肉同蟹籽，入口充滿鮮味，鍾意食蟹嘅朋友唔好錯過。蓬松玉子 （$108）- 玉子燒得非常滑溜，程半熟狀態，蛋味好濃，加埋香蔥同醬料一齊食，味道非常有層次。