龍城冰室

營業中

休息中

今日lunch去咗旺角龍城冰室，啱啱過咗中午時間都仲有勁多人～龍城冰室嘅麵包都係新鮮出爐忍唔住要叫返個試吓🍍 菠蘿油麵包焗得香脆，外皮帶少少甜味，加埋厚厚一塊冰牛油，咬落去夠晒邪惡又香口，成個味道平衡得幾好。🍞 厚切西多士厚身多士炸得金黃酥脆，外脆內軟，牛油同糖漿配合得剛剛好，唔會太膩，每一啖都好有層次感，啱晒鍾意食甜嘢嘅人。🥩 鐵板 招牌黑椒牛柳個餐會有埋餐包同埋紅湯～～首先牛柳熱辣辣上枱，叫左七成熟。肉質比較嫩，茶餐廳冰室嚟講質素真係算幾好，黑椒汁味道香濃，配菜可以揀薯菜/飯/意粉，咁啱因為我哋想食埋菠蘿油同埋西多士，所以就叫咗薯菜！份量夠豐富，食完有滿足感。🐟 招牌酸菜魚呢個算係幾有特色，佢有唔同份量嘅酸菜魚，我就揀咗個一人份量但係都好大兜。🙈🙈酸菜湯底香中帶微辣，好開胃，魚食落比較有口感，佢唔係一咬就散開嗰隻～配埋啲蒜蓉辣椒同花瓣裝飾，打卡一流，味道同賣相都有驚喜。總括嚟講，龍城冰室啲嘢食幾有心思，不過繁忙時間就可能要早少少過去排隊啦，因為都幾多人！