大紅袍火鍋料理

營業中

休息中

最近天氣又轉冷，朋友約我去荃灣大紅袍打邊爐，仲話今餐佢請！咁難得嘅機會，當然要好好享受一下啦！餐廳裝修以中式風格為主，座位寬敞舒適，環境乾淨整潔，好適合一班朋友聚餐。必試五指毛桃椰子雞湯！湯底真係一絕！用咗五指毛桃同椰子雞熬製，湯頭清甜得嚟帶有淡淡嘅椰香，仲有半隻雞同足足兩個椰子的椰汁，雞肉嫩滑，椰子味濃郁，飲完一碗湯已經覺得暖笠笠，好滿足！邊爐又點少得牛、羊呢，揀花雕牛肉同羊肉片，花雕酒香滲入肉中，食落帶有淡淡酒香，肉質嫩滑，完全唔會覺得膩。羊肉片好嫩，又唔會有騷味！牛脷托切得薄薄哋，涮幾下就熟，口感彈牙，好有嚼勁。四寶丸有齊四款丸類各有特色，彈牙得嚟又唔會太粉，特別係墨魚丸，鮮味十足。掛湯力強嘅仲有紫菜炸響鈴，炸得香脆，放入湯底幾秒就食得，外脆內軟，紫菜香味好突出。餃類好多款，見招牌黑松露肉蟹餃幾特別就揀咗半份，餃子皮薄餡多，黑松露超濃，咬落去啖啖肉，好有滿足感。稻庭烏冬滑溜，吸收咗湯底嘅精華，食落好有層次感。飲品就揀咗咸檸七經典嘅港式飲品，咸檸檬嘅酸味同七喜嘅甜味平衡得好好，解膩一流，而咸柑桔西柚檸梳打水：清新又帶有柑桔嘅香氣，西柚嘅微苦同檸檬嘅酸味結合得好好，好適合打邊爐時飲。