螢火

螢火午市套餐（星）⭐️沙律沙律簡簡單單，冰菜食落夠清新爽脆。⭐️鐵板燒帆立貝 帆立貝極厚切，外層煎得香脆而入面嘅貝肉依然嫩滑，加上少少黑魚子增添番幾分風味。⭐️汁煮白鱈魚 Chef將鱈魚嘅魚皮同魚肉分開料理，魚肉配上爆炒過嘅洋蔥，整成一個湯，上面再放上煎得香脆嘅魚皮作為裝飾。洋蔥湯味道豐富但冇掩蓋鱈魚本身嘅鮮味，係濃郁同清新之間取得一個幾好嘅平衡。⭐️鐵板烤大蝦 大蝦鮮甜多汁，蝦肉爽彈有口感，而且蝦膏份量好多，唔需要額外調味都已經夠好食。⭐️美國牛肉薄燒 個人食鐵板燒鍾意牛肉薄燒多過厚燒，牛肉薄薄一片，燒到5分熟，加上滿滿嘅蔥蒜，一啖咬落去成個味蕾都有滿足感。⭐️櫻花蝦炒飯配漬物及吸物 每粒飯都炒得好均勻，加入櫻花蝦、洋蔥同香蔥，再配上燶邊太陽蛋，食哂成碗飯！⭐️甜品 最後嘅甜品係一個開心果雪糕，入面有開心果粒粒，口感軟滑，食落有啲似Gelato。成個set 先$380 真係幾抵。Btw 後尾同侍應傾計知道餐廳最近做緊promotion，晚餐有免費清酒可以飲。佢哋仲有鐵板燒房可以book同埋有許願天燈。我去嗰日咁啱個天燈壞左，如果大家去試呢間餐廳嘅話，可以順便許個願同打個卡啦。