正九清湯腩 (常安樓)

營業中

休息中

喺香港要食到好食嘅牛腩，一嚟環境比較地踎，唔會專程想去食，二嚟靚嘅牛腩部位好多時一早賣晒，諗落都真係好多年冇食過真係正嘅清湯腩。 最近見朋友由澳洲返嚟，短短幾日行程居然返兜咗呢間牛腩，真係忍唔住要嚟試試。夜晚7:30嚟到，只係可以揀崩沙腩，好彩我都係最想試呢個位，想試多幾樣真係要早啲嚟。 可以話同幻想中差唔多，就係我認知入面牛腩嘅最高境界，軟腍甘香，唔會成口肥膏，牛味好濃，黐住一層爽滑嘅筋膜，咬落好舒服，唔會有兀突嘅煙靭口感。 牛肚好爽冇怪味，成個湯底好清甜有深度。上海麵都有驚喜，絕對唔係扁身好腍嗰種，反而圓圓地有彈性，有少少拉麵嘅感覺。朋友加咗菜肉雲吞都唔錯，食得出自家製嘅味道，肉餡鮮甜彈牙，下次嚟我都會想加。腩汁蘿蔔大大份好抵食，有蘿蔔甜味，腩汁唔會太鹹。