一時興起同朋友入左金鐘站附近呢間中菜，聽到大廳有公司包場氣氛好好，環境有氣派，內心都有啲期待。 孖寶好吸引，龍蝦以外揀左川椒雞。 雞肉煎到表面焦香，乾爽唔油，好入味好香。 龍蝦比想像中細隻啲，不過好好肉，有龍蝦鮮甜，仲有啲膏，好滿足。 金湯調得幾好味，清清地唔會太咸，如果伊面可以炒下會再香啲。 香煎蠔烙好好咁做到正宗潮式同港式改良版之間嘅平衡，蠔烙煎得香口但仲食到蛋嘅軟滑。 蠔仔好多，飽滿鮮甜，完全唔會腥，點少少魚露有提鮮作用。

平時阿媽成日同朋友嚟飲茶，今晚想坐得舒服啲食下中菜就上嚟試吓。 鐵板白胡椒煎焗澳洲龍蝦寫明足斤半，果然係大大塊肉，彈牙鮮甜。 重點係白胡椒醬真係好香，惹味得黎唔會蓋過龍蝦嘅鮮味，反而有加分作用，正到連啲配菜彩椒粒同洋蔥都食到乾乾淨淨。 本地雞蛋蒸花甲皇有驚喜，花甲新鮮清甜，本地雞蛋真係食到好有蛋味，冇加好多水所以質感實淨少少，真材實料。 欣賞個豉油較得好好味，鹹甜比例得宜，會想為咗佢再嚟。 紅燒乳鴿正常發揮，新鮮炸起有肉汁。

海膽三文魚他他配多士賣相一流，大大塊海膽上面仲有金箔好矜貴。 三文魚、海膽同沙律醬夾埋冇可能唔好食，咬落去軟滑清新夠鮮，如果多士焗到脆身就更加好。 蘆筍炒鮑魚好有鑊氣，牛油炒蘆筍夠香夠嫩滑，完全唔會有草青味，係我今年食過幾出色嘅炒蘆筍。 鮑魚彈牙幼嫩，略嫌薄切左少少，大塊d口感會更突出。 美國安格斯肉眼份量十足，嫩紅有肉汁，少有地跟炸蒜，食到香草味同蒜香。 呢個價位係物超所值，比坊間食到嘅肉眼大好多，自己係買唔到。

幾年前食過幾鐘意，但黎太古aeon多數會去食大戶屋，今晚想食好少少又諗到呢間西餐。 燒美國Prime 級熟成牛扒比想像中厚好多，五成內裡嫩紅多汁。 加左$50轉用dry aged牛扒，真係物超所值，軟腍、牛味超級濃，每一啖都係滿滿肉汁，媲美平時扒房食到嘅靚牛扒，誠意之作。 海膽帶子海鮮意粉香噴噴，海鮮汁比一般類似龍蝦湯嘅汁更加香濃，淨係食個意粉已經停唔到口。 鐘意帶子岩岩好半生熟夠鮮甜，忌廉醬同彩椒令成個味道好豐富。 水牛城雞翼唔係我想像中紅色辣汁浸雞翼嘅樣，反而係變左燒烤醬，但係一個出色嘅炸雞翼。 雞翼炸得酥脆唔油膩，本身都好入味香口，燒烤醬同酸忌廉夠開胃，雖然唔夠水牛城，但會想黎encore。

Captain’s house嘅海鮮袋已經幫襯過好多次，鍾意到以前staycation都特登嚟買外賣。 平時食龍蝦比較多，今次揀其他海鮮都好唔錯。 Combo A揀左鮑魚、扇貝同八爪魚仔，當中鮑魚超有驚喜，好大隻，彈牙厚肉鮮甜，三大隻食到好滿足。 扇貝同八爪魚仔有做到海鮮袋嘅本份，唔係雪到冇味個啲，真係有鮮味夠彈，比一般西餐海鮮飯或者海鮮意粉用料好好多。 每次都暗暗期待薯仔、粟米同肉腸等配料，尤其是薯仔煮到好軟糯就快化開咁，同cajun sauce好夾，辣辣地好惹味。 蟹鉗蟹膏意大利燴飯合埋眼都食到蟹肉質感，濃郁creamy，櫛瓜粒同番茄仔又有一絲清新。

每次黎到駱駝漆呢層都會聞到好香，終於約到今晚嚟試吓。 壽喜燒嚟講呢個定價都唔算好貴，叫咗赤身和牛同霜降和牛餐，二人份量會放埋一齊，每一塊店員都會幫手燒埋。 霜降和牛淨係睇個樣已經知好食，雪花分布超靚，好似大理石紋咁。 最鍾意沙巴當，即係上肩里脊肉，近乎入口即溶超級香，點埋蘭王蛋好滑。 三筋肉，即係牛板腱都唔錯，軟滑得黎中間嘅筋腱有啲彈牙咬口。 後腿肉同上肩肉雖然明顯瘦啲，但肉味濃好多。 因為火候控制得好，肉質軟腍，同霜降和牛相比其實都唔遜色。 最後嘅濕炒飯用返壽喜燒汁加蛋同牛肉片去炒，以為一樣味會好膩，估唔到風味完全唔同，紫菜飯素好香好夾。

雖然好鍾意食雞，但身邊總係有朋友因為多骨而唔食，所以之前youtube見有人介紹無骨滑雞已經好想黎試。 豉油雞係呢度名物，本來有少少懷疑豉油雞味道來來去去都係咁上下，但一食真係有驚喜。 雞肉入口滑嘟嘟有彈性，連雞胸都好滑。 雞皮唔會好厚，平時懶健康都說服到自己一啖sir落口。 豉油汁都好出色，睇落深色但唔會太鹹或太甜，恰到好處唔會膩。 口水雞估唔到都係平分秋色，平時好怕口水雞太多辣油浸住好肥咁，呢個醬花生味比較重唔會覺得油，想要嘅麻辣都做足晒，好惹味。 紅燒肉不過不失，調味都唔錯，如果係炆到散晒嘅程度就更好。

間中黎附近donki入貨都會幫襯下，係呢區西餐信心之選。 麥啤浸柚子德國脆皮豬手已經食過好多次，估唔到仲有驚豔感覺，再次俾個柚子香味感動到，大大啖肉得黎有一絲清新。 豬手本身好入味唔會太咸，脆皮酥脆唔會硬，配蜜糖芥末醬好夾。 蒜片紅椒藍蟹肉鮮蝦扁意粉係典型嘅蒜香橄欖油意粉，比較清淡，突出左蟹肉嘅香甜，配料多到滿瀉好足料。 鵝肝安格斯牛肉漢堡無期望之下鵝肝味道好出，幼滑厚切，香濃到幫牛肉漢堡扒加左分，呢個價位黎講物超所值。 鐘意個包烘到好脆熱辣辣，漢堡扒有肉汁。

之前食過cobber本店留下好印象，分店位置唔算方便，兜兜轉轉嚟到見到近乎滿座，未食已經感覺到係好嘢。蒜香牛油雞翼有好大驚喜，一黎到牛油蒜香味好濃，雞翼上面鋪滿哂熟蒜，煮開餸就覺得好有心機，因為比起生蒜或者炸蒜，時間要控制得好好先唔會苦或者過火變脆，非常香口好味。 雞翼本身好脆好入味又多汁，我會為左佢再黎。千島醬慢煮雞肉香草 Pizza多料到好似每一片都有原塊即食雞胸size咁，好澎湃。 雞胸肉好嫩滑，海量千島醬、芝士同洋蔥嘅組合冇可能唔好食，啖啖肉好爽。cobber忌廉茄粒醬肉丸意粉係好熟悉傳統港式茄醬嘅味道，甜甜地好開胃，肉丸都做得唔錯，朋友好欣賞。香蕉朱古力竹炭糯米窩夫非常酥脆香口，鍾意竹炭清新嘅香氣同糯米煙煙韌韌嘅口感，香蕉朱古力味道唔算好突出，但窩夫本體非常出色，值得encore。

自問縱橫香港omakase界，其實絕少食完又食，但逸鮨可以話係我encore最多次嘅一間。勘八魚配海膽豆腐，蟹肉配蟹膏豆腐，兩道都配左滑嘟嘟嘅海鮮味豆腐，有嫩滑口感得黎成功突出咗勘八魚同蟹肉本身嘅鮮味，有相輔相成嘅作用。近年愛上咗食白子，因為夠新鮮，簡單酸汁調味已經好好味，幼滑得黎感覺到個新鮮回彈。我其實本身麻麻地白身魚，鐘情拖羅、左口魚裙邊個啲油到爆嘅魚，今晚咁啱好少清淡嘅白身魚，好幾款包括花魚、黑陸魚、銀鱈魚同喜知次都係火炙過，香口得黎魚味各有千秋，尤其喜知次真係好肥好深印象。帆立貝好甜，柔軟幼滑，呢個簡單嘅美味已經足以成為一間壽司店嘅招牌菜，令我對今晚嘅期待值更加高左。鰤魚睇樣都知靚，個鮮味打破左我內心對白身魚嘅界限，魚味香濃好好味。龍蝦同牡丹蝦都係新鮮即劏，望住由去殼開始去到上台都超生猛，唔使講都好鮮，甚至比日本當地食到更高質。岩手生蠔好似手掌咁大，海水味濃，餘味甜。貝類北寄貝同象拔蚌都好爽甜，尤其鍾意象拔蚌有一絲檸檬清香，近乎索索聲咁爽。赤身吞拿魚配鹽水海膽味道好豐富，嫩滑口感配爽脆豆芽幾有層次。我最愛海膽拖羅最中餅，當然全部食材我都好鐘意，但最驚喜嘅係第一次覺得最中餅有加分作用，甜品黎講其實唔係咁欣賞，但而家夾餅咁食，拖羅蓉一咬咇哂出黎，好似有個威化皮咁，好特別好有驚喜。鮑魚用蟹膏煮過好香，同甘鯛立鱗燒一樣係好經典嘅菜式，做到預期中嘅最高水準。花咲蟹有菊花幽香，蟹肉蟹膏一比一，冇理由唔好食。拖羅好肥美，油花分布好靚。白海膽可遇不可求，即使有咸嘅淡雪鹽同鱈魚乾上下夾擊，甜味都好突出，淨係佢都值回票價。最後用返頭先嘅龍蝦頭熬湯，好清甜，居然仲有膏好正。甜品係有深度嘅海鹽雪糕，加完熟蜜瓜，滿足度爆錶。