吉豚屋吉列豬扒專門店

營業中

休息中

嚟開石門，唔係好多時間lunch，所以揀咗呢間食個快飯。入面都幾大幾多位，所以都係等一陣就有得坐。叫咗超值套餐 滑蛋吉列豬扒飯 $59 有飯、湯同特飲，都幾抵。豬扒嚟到面頭都係脆嘅，唔錯。啲肉都唔算好鞋，連鎖店算係咁，雖然我略嫌佢啲豬扒醃得淡咗啲，但夾埋啲蛋同有汁嘅飯食都okay嘅！如果可以比例上再多啲滑蛋同洋蔥咁成個飯嘅味就更豐富喇。啲飯都軟熟粒粒分明，豬扒都幾大塊，食晒都幾飽吓，相當抵食。個麵豉湯好大碗，有個豬扒飯咁大碗！入面仲有好多料，竟然有好多塊豚肉喺入面，仲有好多洋蔥同紅青白蘿蔔，唔算好重味增味，比較多蔬菜嘅清甜。(但太大碗飲唔晒)特飲我叫咗椰果荔枝紅茶走冰，嚟到賣相麻麻，同埋走咗冰佢真係俾少啲茶感覺好似未裝滿咁。不過飲落係好味嘅，荔枝味好出，偏甜少少但都接受到。埋單$65(要收加一)食到咁飽，食物質素都okay，係趕時間性價比之選。