名門私房菜

營業中

休息中

今晚食咗個灣仔上樓私房順德菜，第一個餸冬瓜盅，有蝦肉豬肉，仲有田雞及蟹肉，必須有的夜香花及蓮子，個湯好清甜，冇味精冇添加，少少金華火腿粒吊味，咸香十足。鮑魚手撕雞，內有芋頭絲，酸薑，青爪絲，海蜇， 用上Wasabi汁，入口味道幾複雜，百味紛陳，旁邊白滷水汁嘅鮑魚，味道剛剛好，入口勁彈牙。大良炸鮮奶拼金錢餅蓮藕，蓮藕餅十分爽脆，中間咬開充滿肉汁。秘制陳皮醬烤骨，用上幾種陳皮，越咀嚼越有味，陳皮香會慢慢滲出，黑毛豬一字骨，有肉香而不臊。蟹黃蘆筍，賣相吸引，澳洲蘆筍非常爽脆，用上兩隻蟹肉，蟹膏及蟹黃，味道十足，橙黃色蟹膏味道香濃。油浸筍殼魚，差唔多兩斤重，外皮炸到勁香脆，魚肉有軟滑，全部位置都脆卜卜，加埋蒸魚豉油汁，勁好味。名門XO醬炒飯，炸過嘅乾瑤柱絲，蝦乾海味，叉燒粒，入口少少辣味，飯粒乾身，啲餸多過啲飯。最後一個蛋白杏仁茶做結尾，非常香滑有杏汁香味。全晚食材好新鮮，廚房師傅功夫紮實，難得食到傳統順德菜。