名門私房菜

同朋友去灣仔食順德菜「名門私房菜」，呢間主打順德手工菜嘅餐廳真係好有水準，順德家鄉手菜好有特色，店員非常親切友善。餐廳裝修典雅有格調，燈光柔和。杏汁白肺湯，好適合轉季嘅天氣飲，湯色奶白，香氣溫潤，入口香滑又順喉，杏汁嘅甜香中和咗白肺嘅嫩滑，一啖落肚成個人都暖笠笠，滋潤得嚟唔膩，仲有好大碟湯渣都食得吓。小炒皇，真係炒得鑊氣十足。蝦乾同魷魚絲炒得香脆惹味，韭菜花保持爽口，加上爆香嘅腰果，成碟香氣撲鼻，味道層次好豐富，送飯一流。順德煎釀鯪魚，絕對考手工，師傅先拆骨再打成魚膠釀返魚身，外層煎到金黃微脆，魚肉咬落去彈牙又爽口。蝦子柚皮，順德特色手工菜，賣相都幾好，柚皮先浸走苦味，再慢火炆到入味，吸滿老雞湯精華，軟糯綿滑。鮑粒咸魚雞粒煲飯，打開個煲即刻傳出陣陣焦香。飯底金黃香脆，咸魚香滲入每粒飯，鮑魚粒彈牙鮮甜，雞粒入味又多汁，拌埋飯焦一齊食，香口又惹味。蝦多士真，外層炸得金黃酥脆。一咬開，熱辣辣嘅蝦肉一啖入口，就已經彈牙得嚟又Juicy，配合輕酥嘅炸皮，脆卜卜嘅多士，炸得黎又唔油膩，食完都唔滯。餐廳再送埋甜品，木瓜雪耳糖水，好潤好啱秋風飲。…查看更多

最近同屋企人去咗灣仔「名門私房菜」食順德菜，朋友果然冇介紹錯，食物唔止好味，全部都係手工菜，即叫即做，材料新鮮，火候同調味都控制得宜；環境舒服，服務員有禮，幾個人都食得開心。點咗幾個招牌菜： 冰鎮鮑魚：鮑魚夠大粒，冰得夠凍，爽口彈牙，帶少少酒香，簡單開胃。 燉湯試咗兩款： - 杏汁白肺花膠湯：湯底奶白，杏汁磨得幼滑，完全唔苦，花膠厚身，飲落喉嚨好潤。 - 螺頭翅骨花膠湯：味道濃郁但唔膩，螺頭鮮味重，膠質多。 主菜： - 蟹肉瑤柱焗釀蟹蓋：蟹蓋釀滿手拆蟹肉同瑤柱絲，洋蔥帶甜，幾啖就食晒。 - 百花釀蟹鉗：蝦膠彈牙，包住原隻蟹鉗，炸得乾身唔油。 - 啫啫龍躉球：龍躉切得厚，入味，醬汁香口，魚皮仲有少少脆。 煲仔飯係重頭戲：爆蔥油肶拆肉潤腸煲仔飯，一開蓋蔥油香即刻出晒嚟，飯焦脆卜卜，潤腸同拆肉份量多，粒粒飯都入味，幾個人都話抵食。 豆苗用鮑汁快焯，夠清爽；最後甜品食咗大良炸鮮奶，外層薄脆，入面鮮奶香滑，唔會太甜，收尾剛好。整體菜式手工認真，特別想食正宗順德菜嘅話真係值得一試。下次想試埋佢哋嘅野菌炒飯同瀨尿蝦。…查看更多

上星期生日，專登訂咗灣仔呢間「名門私房菜」慶祝，果然無令我失望！順德菜出名手工繁複，今次真係大開眼界，每道菜都感受到師傅嘅匠心同堅持～✨前菜：冰鎮鮑魚鮑魚size夠霸氣，冰鎮做法保留原汁原味，咬落爽彈得嚟唔會韌，淡淡酒香滲入鮑魚裡面，係一道超靚嘅開場白！🍲燉湯二重奏：▪️杏汁白肺燉花膠湯 - 順德名物！杏汁磨得幼滑無渣，同豬肺完美融合，花膠厚身又黏嘴，飲完成個喉嚨好潤～▪️螺頭翅骨燉花膠湯 - 濃郁得嚟唔油膩，螺頭鮮味同翅骨膠質完全融入湯中，飲完成身暖笠笠！🦀海鮮主菜：▪️蟹肉瑤柱洋蔥焗釀蟹蓋 - 真心考功夫！蟹蓋釀滿手拆蟹肉同瑤柱絲，洋蔥清甜平衡油膩，每啖都係奢華享受▪️百花釀蟹鉗 - 傳統順德手工菜！蝦膠打得超彈牙，包裹原隻蟹鉗，炸得金黃酥脆但一滴油都無，功夫了得！▪️啫啫醬爆龍躉球 - 龍躉球厚切但完全入味，啫啫醬香氣逼人，魚皮脆肉爽，火候控制一流🍚靈魂煲仔飯：爆蔥油肶拆肉膶香煲仔飯 - 一開蓋香到暈！用上鴨髀拆肉同潤腸，蔥油香滲透每粒飯，飯焦金黃脆口，直頭想Encore多碗！🥬清雅之選：鮑汁豆苖 - 用鮑汁焯豆苗夠矜貴，豆苗嫩綠無渣，完美平衡成餐飯嘅濃郁感🍯可以係甜品：大良炸鮮奶 - 順德經典！外皮薄脆，入面鮮奶滑溜得嚟唔甜膩名門絕對係隱世高手，將順德菜嘅精細手工發揮得淋漓盡致。雖然價錢唔平，但每道菜都感受到師傅嘅心思同功力，特別適合慶祝特別日子。已經同屋企人講定下次要再嚟試其他招牌菜！…查看更多

呢間樓上粵菜館好食，Set Lunch嘅質素好高，物有所值。先來一人一碗例湯，足料又無味精，真係想飲多一碗。3個set，3個餸，蒜蓉粉絲大蝦煲、順德土釀鯪魚、仲有一個印象中好似叫做欖菜排骨嘅餸，三款都好好食，最正係個土釀鯪魚，功夫菜，呢鯪魚肉真係冇骨嗰下先至勁，粉絲大蝦煲嘅蝦都好新鮮，不過佢嘅粉絲仲好食過啲蝦，因為索曬蝦啲味所以好正，個個都爭住食粉絲。個排骨好入味，又煮得夠淋。個set lunch係有一碟菜跟埋嘅。仲有好好味嘅綠豆沙送埋。…查看更多

灣仔「名門私房菜」，餐廳環境真係靜中帶雅，木系裝修帶少少懷舊味，坐得舒服，啱晒一家人嘅聚餐時光。冰鎮鮑魚，成隻南非鮑切得厚身，晶瑩剔透，冰鎮過啱啱好。入口即感受到陣陣鮮香，肉質爽滑中帶微微彈牙。杏汁白肺湯，湯頭香濃又順喉，杏香柔和不嗆鼻，飲落潤而不油，白肺炆得軟滑。烏糟雞，順徳特色家常菜式，微帶酒香，用咗米酒同薑蔥打底，味道層次分明。雞肉嫩滑，滲出陣陣酒香。配埋大頭菜嗰陣酸甜鹹香，送飯無敵。小炒皇，炒得鑊氣十足，蝦乾、魷魚絲、韭菜花炒到香氣四溢。蝦子柚皮，順德特色手工菜式，柚皮炆到吸滿湯汁，食落軟糯但唔爛。蝦子嘅鮮香加上雞湯底嘅濃郁，味道好滑順，入口有一種慢火煮出嚟嘅深層香甜。大良炸鮮奶，外脆內滑，炸皮鬆脆冇油膩，入面奶心嫩滑似豆腐，好味。…查看更多