牛品台式火鍋

營業中

休息中

台式鴛鴦火鍋放題！同朋友一行四人最好就係打邊爐，可以坐足兩個鐘，慢慢食慢慢傾偈。不過呢度服務麻麻哋，到最後當兩個朋友去緊廁所嘅時候，服務員開始收拾，我哋解釋咗廁所排隊等好耐，佢哋返嚟我哋就會走，不過服務員堅持要我地幫朋友拎埋佢哋嘅隨行物品離開座位先，語氣有啲差。牛御品吃到飽套餐$299- 我哋六點鐘入座，星期六所以要加$20。我哋選擇鴛鴦鍋加$50，揀咗元氣養生同蕃茄濃湯鍋。養生鍋入面有好多藥材，湯底有少少苦，不過我接受到。呢個套餐包每人一隻鮮鮑魚，都幾彈牙。放題自助區有好多菜、丸、飲品揀。個人推薦桂花烏龍同白桃烏龍冷泡茶，幾清新，有助去一去火鍋嘅油膩感。澳洲M9肩胛肉- 喺云云咁多種肉類選擇之下，我哋幾個一致認為澳洲M9肩胛肉最好味，我哋encore左好多次。油花幾好，口感幾軟滑，牛肉味都重。推介！小吃- 炸魚皮、炸甜不辣都幾好味，叫一細碟share嚟食都唔錯。甜品- 差不多到最後服務員會俾張甜品紙俾我哋填，有得揀movenpick雪糕或者芋圓檸檬綠茶愛玉。愛玉好Q彈有檸檬茶嘅味，三色芋圓幾煙韌，味道唔假，都幾好食。