Yadllie Plate 야들리애플래이트 (海之戀商場)

今日約咗朋友仔係海之戀食tea，揀咗呢間韓式餐廳。見佢set lunch做到五點，我哋就要咗一個set lunch加兩個小食。呢間環境坐得好舒服，侍應服務亦好周到，值得一讚！講返嘢食，首先嚟嘅係香炸明太魚，脆口得嚟唔油膩，點埋個醬汁就口感啱啱好，下次夜晚嚟食嘅話，送啤酒一流。之後就有set lunch 嘅石燒腩肉拌香蔥煎餅, 腩肉肥瘦分明，喺石面反一反就兩邊都變脆，生菜好新鮮同乾身，包住個腩肉食，香口又唔覺肥膩，包埋個青甜嘅蔬菜沙律同好開胃嘅泡菜，確係惹味。跟住我哋點咗個火灸，牛肉即場燒，外脆而同時入面仲好淋身，聞落香噴噴，牛肉汁滲咗落下面嘅配菜，令配菜都好好味。再望真啲個set lunch餐牌，原來12至5單點餐牌七折，慳咗嘅錢可以叫多杯嘢飲慢慢chill 住傾，確係呢區唔錯嘅選擇。