火赤

營業中

休息中

呢間餐廳嘅環境十分舒服，有室內又有室外嘅地方，裝修偏向日式嘅格局，咁啱今日天氣又凍凍地，食埋日式嘅串燒就好似置身日本一樣。烤鱈魚乾鮮味，烤得脆卜卜咁，咁香口脆，配埋蛋黃醬食好開胃。食燒烤配唔同味料會有唔同風味，呢碟調味料就有山椒粉、七味粉、一味粉、柚子鹽、抹茶鹽同咖哩鹽，可以就自己喜好襯唔同嘅燒烤。雞頸肉完全顛覆咗我對雞頸嘅認知同感覺，食落嫩口之餘，亦帶有爽脆嘅口感。雞尾 眾所週知，雞尾就係甘香，而佢並沒有平時果陣蘇味，加上表皮烤得夠乾身同脆口，好味。雞胸骨入口比起平時食雞軟骨更加爽脆，調味香甜。雞翼外皮烤得夠乾身夠香口，而且肉質保持鮮嫩同多汁。糯米雞肉棒呢個真心特別，內層嘅雞肉軟綿綿，係免治雞肉串嘅口感，而外層嘅糯米香脆之餘軟糯，兩者結合十分之夾。水牛芝士煙肉卷煙肉唔會烤得太乾，配合埋略為溶化嘅水牛芝士已經好好味，再襯埋紫蘇葉嘅香味更加正。秋葵鮮嫩唔會有渣，入口爽脆內軟，加上木魚一齊食好清新，對於啱啱食咗咁多肉肉更可解膩。蕃薯香甜亦香口，唔會煮得太淋之餘亦唔會硬掘掘。醬油燒飯團醬油味香，飯外脆內軟，烤得十分夠熱，一直食都出哂煙，勁正。抹茶蕨餅口感軟糯，抹茶味香，令口腔十分清新舒服。