老闆火鍋冰室

營業中

休息中

Happy Thursday，又係覓食好日子。開始食厭屯門，所以同同事去元朗搵好西。離遠就見到老闆冰室火鍋嘅招牌。夏日熱辣辣最適合打邊爐，以熱治熱！好彩其實呢到冷氣十足。火鍋有唔同湯底，連雞煲都有幾款，除咗有常見嘅重慶酸辣之外，仲有高配嘅蟹同埋鮑魚雞煲。叫咗個常見啲嘅酸辣豬肚鮮雞煲、最愛嘅牛— 美國雪花肥牛、脆肉鯇片、手打四寶丸小拼盆同埋蟹籽鮮蝦手打滑。仲特登嗌左一款小食，墨魚脆炸油炸鬼。火鍋當然唔少得飲品，呢度以港式火鍋為主，點知原來有水果茶。酸辣豬肚鮮雞煲好足料！辣度選擇咗少辣，唔太食辣嘅同事都食到。原本以為得豬肚同雞，仲有豬紅、紅薯粉。早知唔刻意叫芋絲，紅薯粉吸曬個湯味，好惹味。湯底有少少麻，酸同辣味唔會太刺激。半隻鮮雞都好大份，皮薄肉厚。手打四寶丸小拼盆有豬肉丸、蝦丸、墨魚丸、牛丸，各兩粒。粒粒都好彈牙。牛丸好濃牛味，juicy。墨魚丸有墨魚粒，口感最佳。脆肉鯇片有5大厚片，肉質新鮮。有陣時忘記咗淥得太耐，都唔會嚡，口感仍然爽。火鍋料當然唔少得肥牛片，必食美國雪花肥牛。細碟都已經好多。雪花分佈平均，唔會太肥。片片都厚切，啖啖肉。好重嘅牛肉味加埋湯底嘅少辣，唔需要點醬料都夠曬味。