Ssal Bori Ssal

營業中

休息中

今日難得放半晝，出咗尖沙咀食晏順便行街。哩間餐廳係老公介紹的，佢間唔時都會嚟幫襯。佢話廚師係韓國人，所以食物都好地道。餐廳比較的骰，枱與枱中間嘅空間比較窄。中間位置大家排排坐，坐得比較迫。內部設計都比較簡單，都幾有平民韓國餐廳嘅感覺。我叫咗老公推介嘅燉豬肉陪飯加韓國凍咖啡。去韓國餐廳，我最鍾意就係食佢啲配菜，多款菜式俾你揀，仲可以無限量添加。今日有雜菜薄餅、芽菜同泡菜。熱辣辣的豬肉湯湯底顧名思義係用咗豬肉同豬骨熬制，裡面仲有味增、韓國醬油同米酒，最後再加入韭菜同蔥。另外亦附上紫蘇粉、小蝦米同辣醬供客人調味，食慣濃味嘅我，當然將所有調味都放入去啦。一放入口，頓時有種感動嘅感覺，熱辣辣嘅湯令人好舒服，湯有好香濃嘅豬骨味，啲調味料亦令成個湯嘅味道昇華。一啖熱湯，一啖白飯，好味道。老公果然無介紹錯！下次想試吓石頭飯，好似好惹味咁。不過我只會係午市嚟食，夜晚價錢比較貴。