麵尊

營業中

休息中

成日經過登龍街都會見到車仔麵舖有一條長長嘅人龍，真係好好奇點解車仔麵都會係排長龍去食，於是我哋又真係走去排下，雖然唔係等咗好耐，其實都係等咗10分鐘左右就有位，點單都係畫圈圏非常之清晰，有晒價錢，有晒配料，唔會食完都唔知自己俾幾多錢。既然車仔麵都要排長龍，一坐低我哋決定叫個四餸車仔麵，分別嗌咗腸仔，牛柏葉，魚蛋，油面。牛柏葉非常之爽脆，仲可以吸晒佢腩汁嘅精華，腸仔魚蛋就不過不失，但係墨魚丸係好香墨魚味，仲好彈牙添。另一碗就嗌咗紅腸雞翼麻辣腩汁湯底，雞翼唔係BB size，係大隻size，食兩隻都覺得好飽，至於個麻辣湯底真係非常之難忘，佢唔會非常之搶口，但係好香辛麻味。最後忍唔住嗌多份豬頸肉，豬頸肉個汁係甜甜地，好大份，亦都好嫩滑。終於明白點解咁多人排隊，如果下次要排，都真係好值排。