蘇山雞飯

營業中

休息中

第一次食蘇山雞飯，當然係試雞飯。獅城芽菜走地雞飯，配上油飯同埋一個雞雜冬瓜湯。平時食海南雞飯通常碗湯都係冇咩味，好似烚雞水咁，但係呢個湯好明顯唔同，好足料，有啲雞腎，又有好多冬瓜，碗湯有啲喜出望外。個油飯亦都出色，有味得來唔會係油淋淋。朋友食新加坡白胡椒排骨，湯入邊除咗有幾件大排骨，仲有豆腐卜，另外有一碟好cute嘅油炸鬼。我都試咗個排骨湯，好香胡椒味。夜市沙嗲有兩串牛，兩串雞。我自己鍾意食雞，好香炭燒味。小食併盤入邊有炸蝦，豬肉串，魚餅，南乳雞翼，各兩件。全部都係香口嘢，豬肉串幾特別。我同朋友都係飲檸檬薏米水，一個飲凍一個飲熱，唔會太甜，食完炸嘢飲啲薏米水一流。我去嘅時候未到七點，入去即刻有得坐，到我走嘅時候門口竟然已經大排長龍，冇諗過一間小店咁多人排隊。所以唔想排隊嘅話就七點前去到好啲。