茜廊餐廳 (德福廣場1期)

營業中

休息中

以前喺九龍灣返工日日經過茜廊麵包，習慣買個芝士潛艇當早餐食，食晏方便又㨂佢，久而久之對嗰度有少少情意結。間餐廳之前裝修咗一段時間，最近完工就同男朋友去幫襯下，懷緬喺九龍灣打工嘅回憶😂回憶首選牛油蒜蓉包，每人一塊，雖然冇之前咁香脆，不過上碟仲有微溫，同以前一樣都係底面沾滿左蒜蓉牛油醬，西湯至佳拍檔。紅白湯各一個，忌廉湯飲落綿滑，不過不失。紅湯夠酸，菜蔬夠多，作為前菜提胃。清酒煮蜆做法幾有趣，湯底唔似用日本清酒反而似花雕酒，上邊配左青同紅椒粒，做法食中式多過日式。主菜㨂咗西班牙龍蝦燴飯，以前冇得點，應該係裝修後既新菜式。材料豐富有龍蝦、魷魚、青口，帶子同墨魚，配埋完隻開邊龍蝦，份量超大，具體形容有4-5碗飯咁大份，兩個人完全食唔哂！龍蝦幾貼心將殼破開，唔駛好盡量咁食，略嫌龍蝦肉上放太多芝士，搶咗少少蝦蝦味。有趣係當人有人慶生，侍應走勻全場唱生日歌，再送上蛋糕，其他食客都一齊歡呼，如果有朋友生日，呢間既生日驚喜都令人幾回味。