影片
港鐵銅鑼灣站 C 出口, 步行約6分鐘
繼續閱讀
電話號碼
56958863
營業時間
今日營業
12:00 - 15:00
18:00 - 23:00
星期一至日
12:00 - 15:00
18:00 - 23:00
以上資料只供參考, 請與餐廳確認詳情
有關獎賞計劃
相關文章
1229 瀏覽
龍蛇交接之時，蕃薯Uncle接二連三咁喺報章雜誌上睇到專欄介紹新開只有個幾月嘅「大宅」，打鐵要襯熱，新蒸頭即搞咗次大食會去試新野。屬美麗華酒店旗下嘅「問月酒店」暗藏於不甚起眼嘅謝斐道，門面唔大，但都幾易搵。酒店大堂樓底高高，以黑為主色嘅室內設計概念大膽得都幾新潮，用上燈籠及十二生肖點綴同時流露出傳統中國風味。佔用三樓全層嘅中菜廳面積唔算大，奇怪在洗手間要上一層，不過唔想行樓梯可以選擇搭𨋢。𨋢門一邊有個水吧；酒鬼果然係酒鬼，話如果吧前擺幾張高櫈，咪可以做個酒吧囉。用餐大堂呈L字形，散座現階段由兩張長枱分拆出黎，貴客全部要打對面坐，拍牆嗰邊為厚墊梳化位。據經理Paul哥哥講，餐廳遲啲會續步轉成圓枱。網上訂座簡便快捷。九男女飯焗被安排入座可容納上十多人嘅私人廂房內進行，空間感足，有專人招待，相當周到。每位席上都擺有齊備嘅自用及公用餐具，衛生到位。茶水均有明火保熱。轉盤上仲有靚靚寶盒承載任用紙巾及牙籤。如果想自己帶酒，開瓶費為$250/樽標準裝紅、白、汽或清酒；新開張期間，每幫襯一樽即可免一樽開瓶費。奄尖薯爺早於網上下載中英對照嘅餐牌，研究好想食乜後即令幹事訂位兼訂菜。青椒醬油蘿蔔（$68）：散發出微微麻香辣勁嘅醬蘿蔔條條香濃爽脆。（小肥上餸時掛住飲酒酒，之後先發現相相冇對到焦，還望讀者們見諒！）江西豆腐（$88/四件）：脹卜卜嘅豆腐層炸皮酥脆巧薄，豆腐心軟嫩滑溜，簡單喺面舖滿紫菜粉足以添上惹味，必吃推介也！南乳吊燒脆皮雞（$528/隻）：肥膏唔多嘅雞雞當真如餸名般脆皮，雞肉柔潤香軟，連雞胸肉都唔乾唔嚡，掂呀！另上嘅蝦片鬆化香脆，送酒一流！乾燒龍躉（$432/例半）：叫咗例半都要摷先搵到啲龍躉件，大家都覺得份量偏少，龍躉食落除咗麻辣之外真係食唔出任何魚味，反而配角嘅椰菜花脆嫩可口得多！鬼馬咕嚕肉（$252/例半）：咕嚕肉外脆內爽，酸甜恰到好處。文火和牛（$552/例半）：和牛質感係就係好腍潤，又唔會話好肥，個人只係略嫌調味偏咸，墊底嗰啲炸腸粉先最有驚喜！黏上和牛汁嘅炸腸粉半脆皮得黎厚潤柔滑，好食到要追加咁堅！炸腸粉（$120/一打）：無奈追加嗰客雖然炸得夠金黃香口，食落啲腸粉就微微粉粉地，明顯冇之前拼和牛嗰啲咁正。豬油渣時菜（$128/例）：菜心翠綠清脆，豬油渣粒粒脆卜卜，大人細路都啱食。西檸爽肉（$207/例半）：以黑豚豬背肌肉炸出嘅爽肉肥瘦均勻，肉質爽脆，而且肉汁豐沛，當中嘅青檸香尤其清新消滯。大宅追月（$388）：嘩，原來師傅要用兩桶油炸成二十分鐘先造得出如此又圓又大嘅明月，唔怪得知一定要預訂啦，功夫甜品認真唔講得少！光亮嘅波波入面其實全部都係空氣，等貴客影完相相後先交由專人慢慢剪出一片片俾大家食。煙煙韌韌嘅甜品極之薄身，咬落又鬆又脆，微甜輕盈不溜滯。銅鑼灣新店「大宅」環境企理衛生，廂房尤其闊落舒適，服務優良，精品粵菜高質味佳，價格合理，絕對試得過！
繼續閱讀
位於銅鑼灣問月酒店內的精緻中餐廳。 以前最不喜歡食中菜， 因為食中菜通常意味著一大班人的飯局， 當中總有幾個不太熟的人，或者搭不上嘴的話題， 作為I人，實在有點抗拒。 .但時至今日， 精緻又高質的中菜已不再需要一圍圍人先食得到， 即使兩小口，中菜癮起，也完全沒有難度呢。 .全新中式食府「大宅」於銅鑼灣問月酒店開業， 餐廳環境優雅，裝潢高尚又有格調； 員工亦熱情好客， 整體用餐體驗非常出色。 ⋆_____ ᴅɪɴɴᴇʀ ᴍᴇɴᴜ ______⋆ ✿ 江西豆腐┆金沙白飯魚 江西豆腐外脆內嫩，豆腐質感柔軟滑溜； 搭配濃郁惹味的金沙白飯魚，鹹蛋黃香氣突出，非常開胃。 ✿ 大宅佛跳牆 超級足料且食材矜貴的佛跳牆， 內有瑤柱、花膠、鮑魚、魚翅、海參、鵪鶉蛋等多種高級食材， 湯底味道濃郁，質感濃稠， 喝完一碗真心大滿足。 ✿ 蟹黃銀針燴玉帶 ✿ 20年古月龍山花雕蛋蒸虎蝦球 蟹黃的鮮美更能突出帶子的味道，整體搭配清爽嫩滑； 而蒸虎蝦球的精髓在於花雕蛋，以陳年花雕酒蒸製，蒸蛋吸收了濃郁的酒香，口感滑嫩，蛋香更突出； 虎蝦球大隻又鮮嫩，入口多汁。 ✿ 拔絲咕嚕肉 適時送上一道味道濃郁的咕嚕肉， 醬汁帶甜微酸，肉質滑嫩； 炸過的豬肉淋上甜酸醬汁，再撒上一層絲狀的糖漿， 入口有焦糖的香氣，整體甜美又香脆。 ✿ 香煎一夜鮮麒麟魚 仿效日式料理的立鱗燒做法， 麒麟魚經過香煎後外皮酥脆，內裡鮮嫩； 搭配中式蒸魚常見的薑蔥和醬油， 口感新穎，更有特色。 ✿ 蝦子花膠濃雞湯 ‧ 拌菜苗 ‧ 手工拉麵 大大片花膠搭配濃雞湯，滋補又養生； 手工拉麵很掛湯，每一口都嚐到雞湯的精華。 ✿ 芋茸燉鮮奶 最喜愛的甜品之一， 燉奶香甜又綿滑，加入芋茸舖底， 口感層次更豐富。
繼續閱讀
去咗咁多次Mira Moon，平時都唔多覺有餐廳，今次難得見到有就諗住試吓，而且聽聞係唐述總廚做顧問，價錢亦都合宜。食完之後整體覺得都幾有驚喜，而我都係最鍾意佛跳牆。‣ 江西豆腐，金沙白飯魚豆腐外脆內軟，豆腐皮金黃酥脆，豆香濃郁，嫩滑到好似食豆腐花。而白飯魚上面鋪滿金沙，相當惹味，前菜開始已經覺得有驚喜。‣ 大宅佛跳牆上枱嘅時候望落細細盅，但相當足料，對得住佢嘅價錢，花膠、海參、鮑魚、瑤柱等等都有。湯汁濃郁黏稠，湯頭飲落去清爽又唔油膩，啖啖海鮮味滲出嚟。‣ 蟹黃銀針燴玉帶蟹黃醬汁真係滲住濃郁嘅蟹膏香氣，香濃惹味，帶子處理得相當好，口感鮮嫩彈牙，食落口嘅時候微微炙燒嘅香氣相當令人回味。‣ 20年古月龍山花雕蛋蒸虎蝦球雖然外表比較樸實無華，但係食落口嘅時候真係帶到驚喜，冇諗過花雕酒同埋蒸蛋個味道可以咁夾，滑溜而酒香撲鼻，吸收晒花雕酒嘅香。虎蝦球相當爽口彈牙，用料夠晒新鮮。‣ 拔絲咕嚕肉豬肉炸到金黃香脆，裹住嘅糖絲拉得好靚，一啲都唔會覺得太甜。個豬肉本身已經好嫩滑，配埋個糖絲甜中帶香，火候掌握得好好，肉質軟嫩，糖絲香脆。‣ 香煎一夜鮮麒麟魚麒麟魚新鮮彈牙，魚皮煎到金黃香脆，魚肉嫩滑多汁，每一塊魚鱗都唔會放過。有別於平時蒸魚配青蔥，煎魚配青蔥啱啱好可以解膩同埋中和豉油嘅鹹，真係食到停唔到。‣ 蝦子花膠濃雞湯，拌菜苗、手工拉麵食到呢個位已經飽飽地，但係都係忍唔住飲晒成碗雞湯。手工拉麵口感相當煙靭，蝦子香氣四溢，而雞湯都熬到好濃郁，花膠真係錦上添花。‣ 芋茸燉鮮奶鮮奶相當香濃順滑，甜度控制得啱啱好，真係做到甜而不膩。而芋茸香滑綿密，本身奶香十足，所以搭配埋鮮奶兩者真係互相輝映，作為甜品嚟講相當之滿意。
繼續閱讀
今日和朋友品嚐了位於銅鑼灣問月酒店來的新張不久中菜廳「大宅」是我近期試過嘅中菜當中最精緻最好食嘅一間，中菜廳裝潢古色古香，播放着古典音樂，令人感覺優雅舒適，我們點了中菜廳人氣菜式，每一度菜式擺盤非常精緻，味道令人驚艷👍優質食材也要遇上懂得欣賞和烹調的伯樂，這裏的主廚吳師傅主理中菜已經超過30年，於多間著名中菜餐廳任職，達官貴人也是他的座上客，難怪菜式如此的出色，而且服務水準一流，真的令人未食完就想book定下一次🫶▪️江西豆腐•金沙白飯魚豆腐炸至外層超香脆，內裏非常嫩滑，豆腐的面層沾滿海苔，令豆腐更加鮮味，小小的白飯魚被新鮮鹹蛋煮成的醬包圍着，味道鹹香又香脆，實在是非常美味的前菜▪️大宅佛跳牆這裏的佛跳牆是必食推介，有別以一般粤式佛跳牆，使用福建菜系醇厚湯汁做法，加入古越龍山20年花雕酒、上等金華火腿熬煮鮮極汁、蹄筋及鴿子蛋等慢火燉煮，連同南非乾鮑魚、豬婆參、金山勾翅、雲南金華火腿、羊肚菌、瑤柱、老雞、螺頭、赤肉、蓮子等燉煮，湯頭入口膠質滿滿，濃香四溢▪️蟹黃銀針燴玉帶濃郁的蟹黃醬汁鮮味濃郁滿瀉，配上煎得外層焦香，肉質軟嫩又鮮味嘅巨型帶子，兩者味道就是如此匹配▪️20年古月龍山花雕蛋蒸虎蝦球驚喜之作，花雕的味道和香味令人讚嘆味道是如此的醇厚濃香，虎蝦球肉質爽口非常彈牙，味道就是蝦的鮮味和花雕的香，蒸蛋更加精彩，吸滿花雕和蝦鮮味，每一啖就是香滑▪️拔絲咕嚕肉咕嚕肉外層的脆漿與別不同，特別皮薄酥脆又掛汁，肉質使用半肥瘦的梅頭肉，口感軟腍又鬆化，醬汁酸甜到剛好，伴上新鮮菠蘿、洋蔥和紅椒，正宗咕嚕肉美味▪️香煎一夜鮮麒麟魚用上有點像日本立鱗燒的方法，用中式的食材呈現，魚皮鮮美酥脆，麒麟魚經過一夜鮮的處理方法，肉質魚油豐富鮮嫩無窮，加上香蔥、鮮醬油和熟油，味道真的很出色▪️蝦子花膠濃雞湯•拌菜苗•手工拉麵這個雞湯濃郁鮮香得無話可說，滿滿的骨膠原黏着喉嚨，大大片的花膠放上蝦子增添鮮味，配上彈牙的手工麵，完美的配搭▪️芋茸燉鮮奶結尾的甜品一樣精彩，燉鮮奶的奶味濃郁得猶如剛剛從牛的身上揸出來的牛奶，質感濃淍，配上打得香滑的鮮芋茸，非常溫暖好吃就如媽媽的味道
繼續閱讀
最近朋友發現位於灣仔Mira Moon酒店裡有一間水準唔錯嘅中菜館，想我陪佢試試。我當然二話不說即刻訂枱試菜喇。這間「大宅」嘅裝修都幾impress，雖然地方唔算大，但都有一間可容納12-16人嘅包廂，其他枱的距離尚算闊落，而服務員嘅態度都好專業和認真。🥢 江西豆腐·金沙白飯魚江西豆腐上面鋪滿苔菜，豆腐外層炸到好脆口，但裡面仍非常滑嫩。金沙白飯魚充滿咸蛋皇嘅香氣，而且炸到好鬆脆。🥢 大宅佛跳牆呢個佛跳牆嘅材料好豐富，包括有花膠、瑤柱、白鴿蛋、冬菇、羊肚菌、海參和鮑魚，全部都係名貴食材，加上師長時間的燉煮，湯味非常濃厚而且夠晒黏口，勁多骨膠原。🥢 蟹黃銀針燴玉帶呢碟菜充滿香濃嘅蟹皇汁，而銀針粉又吸收晒蟹黃嘅鮮美，帶子嘅肉質鮮嫩彈牙，使到整個口感層次夠晒豐富。🥢 20年古月龍山花雕蛋蒸虎蝦球蝦球肉質夠彈牙兼且好鮮甜，伴著濃郁芳香嘅花雕酒蒸蛋，令每一口都能感受到花雕酒嘅醇香。🥢 拔絲咕嚕肉一口size嘅咕嚕肉，炸到外酥內嫩，搭配埋彩椒、洋蔥、蕎頭等配料，豐富咗整個菜嘅色彩和口感。但論拔絲嘅程度略嫌不夠。🥢 香煎一夜鮮麒麟魚用咗蔥絲和淡豉油來襯托麒麟魚，麒麟魚係用咗馬友魚嚟做，師傅炸到魚麟非常脆口，外皮煎到香脆金黄，最難得係魚肉仍可以保持到鲜嫩嘅口感，非常難得。🥢 蝦子花膠濃雞湯·拌菜苗·手工拉麵呢個湯底夠晒濃郁，但味道有點像佛跳牆嘅湯底，沒太大驚喜。配上一舊厚花膠、清爽嘅菜苗和爽滑嘅手工拉麵，整體口感不錯。🥢 芋蓉燉鮮奶芋蓉嘅綿軟和鮮奶嘅絲滑的融合，口感非常順滑，但略嫌有點過甜。
繼續閱讀