花園餐廳 (已結業)

夜晚去到尖沙咀，周圍行都決定唔到食咩餐廳，見到好耐之前食過既花園餐廳，menu又幾啱心水，舊決定食佢入到去侍應仲提我地怕冷氣大風可以轉位，服務不錯是日推介 雞排拼凡立貝 鐵板上又跟飯或意粉要加十蚊，但係轉碟上就唔洗一向怕食鐵板太熱的我就轉碟上凡立貝有兩大粒，用炸粉包住煎香過，雞排亦係大大塊，配上蒜蓉汁一流特級t骨排睇相都覺得好大碟，塊排大到淋黑椒汁都淋唔到落鐵板度，下面有薯菜墊底，五成熟唔錯焗鮮茄牛舌意粉牛舌好多，但係冇乜味，鮮茄汁正正常常不過不失法式焗田螺 跟餐加40蚊就有田螺好重牛油味，應該係焗個陣放左一大舊牛油入去，下面d薯蓉底都好正，焗到好香

經常食lunch都會食佢，因為貪佢夠近我鋪頭附近，吾洗行太遠，食過咁多次佢既牛扒同雞扒，總括而言，佢地既食物質素都好吾穩定，無論係牛扒同雞扒都好，有時會比較大塊，有時又會好細塊，有時會煎得好香口好好食，有時又會好難吞好硬，有時會雞扒比較好食，有時又會牛扒比較好正，好撞手神，但都係吾好食多過好食，而且佢地既炒炒麵類會比較咸，次次叫完都會因為太咸而食吾落，所以建議大家都係食佢地既扒類會比較穩陣，而我本人就覺得呢期佢地既雞扒會比較好食而且對比牛扒，雞扒都會相對大塊啲。

琴晚放工同同事打算食個便飯 又唔想係商場 北京道食貴野於是係亞士厘道 隨便揾d 野食 於是去了花園餐廳 食扒飯叫了一個普通肉眼 朋友叫了一個貴價d A5 係有分別 但分別不大 A5 厚d 同新鮮d 紅d 但唔覺牛味多d

返工返左半日，終於等到食午飯，一大班人一齊出去食飯，最煩腦就係仲有邊間餐廳有位坐，最後決定去花園餐廳，之前食過都通常仲有位，加上餐廳夠大間，坐位多，適合一大班人。午餐今日選擇黑椒雞扒＋漢堡肉跟意粉，首先即來個餐包，同埋羅宋湯，餐包有加熱番叮，所以配湯都唔差，羅宋湯好足料，又夠熱，不過就差左啲辣味主菜雞扒煎得幾香，雞皮有少少脆，而肉仲係嬾滑，配上黑椒汁變得食落唔會大乾身，同埋意粉本身都無乜味，都要黑椒汁撈埋來食，先會較好食，另外塊漢堡肉就無乜特別，最後飲埋杯咖啡。見到隔離枱食鐵板餐，份量都幾多，加上鐵板熱辣辣，好吸引，下次要試下

今日輪到四時放飯，正合我意，因為這個時間既可以吃下午茶便宜點，食客亦較少，hea耐少少亦不怕遭人白眼！又去了花園餐廳，如果想食飯又想平少少和坐得舒服點，除了樓上的餐廳外，附近的選擇並不多。今次點了蒜蓉雞扒飯和熱檸茶，這裏的扒餐做得都不錯，不過飯量就愈來愈少了。雞扒很大塊，煎得香噴噴，蒜蓉汁內加了香草，十分惹味，和飯吃一流。加上有點蔬菜伴碟，比其他食店扒飯便只有肉類，這裏的營養較為均衡一點。$43的蒜蓉雞扒飯本來算合理，但因為要付加一，埋單總數是$47。相對附近食店而言，價錢還是較可以接受的，其實別區的花園餐廳，比這間還貴呢！

返工平時已經攰 但最慘嘅係返完個星期六(長週) 星期日都要返 所以我就決定出街食午飯出去行下 比自己relax下 唔駛日日坐係office 咁我同同事就去左花園餐廳到食 其實都幾多野食 除左鋸扒 又有焗飯同意粉 午餐加埋一 六十幾蚊 有餐湯餐包 主菜同野飲 一定食到飽 而我最後就叫左紅湯 同芝士焗肉醬意粉 佢依到個意粉賣相唔錯 好重芝士味 相比起大家樂個肉醬意粉 依到個個咸啲 大家樂個個甜啲 同埋依到嘅意粉可能焗得耐左少少硬啲 我覺得下次黎食嘅話 都係食返扒餐

一聽到花園餐廳,，相信大家都一定會諗起鋸扒，不過LUNCH如果去鋸扒真係好HEAVY，如果揀碟頭上扒既話一定冇鐵板上咁振奮心情，竟然同事揀左花園餐廳食LUNCH，今日我決定唔食扒，試下佢其他野! 點左個午餐: 蜜糖芥末汁德國豬手! 可以揀跟飯，意粉或者薯菜。例牌套餐跟餐包，紅湯或者白湯，再跟餐飲, 凍飲加$3。豬手黎啦!!哈哈!!好好笑，講明德國咸豬手，但係插左支法國國旗係上面。笑料!豬手皮整到脆卜卜架!內裡啲肉唔會過咸，岩岩好!個蜜糖芥末汁如果冇睇過MENU係唔知佢咩汁黎架!HAHA!!不過甜甜地，同豬手都夾味既!呢個豬手真係一D都唔HEA!!出面講緊食正宗德國咸豬手咩都冇配都200幾一隻!而家70幾蚊一個餐真係物超所值!!

工作關係要輪班放飯，故大多數是在下午茶時段食飯，幸運地不必在繁忙時間用餐，得到較多的服務。亞士厘道這間花園餐廳，便是我的飯堂之一。見到網友的負評較多，我自己則覺得不錯，也許就是來這裏都是非繁忙時間吧。我的首選，是紅酒焗牛脷飯。其他扒飯類都不錯，但麵餐則有點不夠飽。牛脷是個功夫菜，自家製頗多工序，所以要吃的話，還是去餐廳好了。這裏下午茶時段，賣$45，午市則是$65，多一個湯。焗飯有三大片牛脷，沒怎麼醃但炆得很「林」，完全不韌，小孩和長者也可輕易進食。重點全在那個汁，做得很濃很夠味，汁裏很多蔬菜，例如蕃茄、紅蘿蔔、洋蔥、黃椒等，十分惹味，泮飯吃一流。飯底只略炒，故不油膩，有點蛋絲，焗後亦不乾硬。有些焗飯過了火，弄得炒飯已變硬粒，不大討好。不過，飯的份量比以前少了，合起來約只有一碗，男士可能會不夠飽！下午茶餐還有很多選擇，連加一後大部份都不超過$50。以尖沙咀的餐廳來說，也算抵食。焗牛脷飯這個套餐，比觀塘的分店，還平了一元。至於服務，我也覺得不錯。焗飯送上時，阿姐會提醒碟很熱，小心燙手。離開時亦提提，記得帶齊物品等。也許是因為在非繁忙時間，會較多窩心服務，這點也是可以理解的。

我昨日都中左伏, 叫左個下午茶餐, 係低脂雞片飯, 點知一來到, D雞表面係黑色, 我立即要求更換, 個女侍應話冇得換, 要求我叫過第二個餐, 好啦, 噉我就選左個吞拿魚天使面, 點知又中伏, 超級難食, 啖而無味, 完全找不到吞拿魚, 真係貼錢買爛壽, 食咁多次花園餐廳，今次係最難食。 blacklist, blacklist, blacklist, blacklist

呢2日返緊工好想食牛扒淡淡肉！但尖沙咀有名既都3.4百蚊一餐，所以就算見人劣評，都照去花園餐廳食。5:12到店，下午茶時間，5:15已經食得囉！都吾差丫，牛扒厚既，一個半手掌甘長，比起快餐店或茶記好得多！

服務態度未去到好差，但亦唔講得上好，總之你食完有同你收走 D野嘅基本服務，味道，總括黎講得個咸字，餐湯揀左紅湯，同上次味道冇變，好咸。肉眼扒，薄到我以為係塊牛柳，可能牛柳比佢仲好食，同湯一樣好咸，而且有 d乾身。意粉太重牛油味，但都可以接受。明明上次食過好好味，肉眼淋而且多肉汁，今日唔知咩事，好難食，勁失望。食咁多次花園餐廳，今次係最難食。

自從裕民坊閣樓舖嘅花園搬遷之後，一直都食唔返舊時嘅豉油扒風味。由於近期肥仔奇做健身Keep Fit，教練話要食多啲牛肉補充鐵質，適逢路過位於亞士厘道嘅呢間花園，姑且入去試試。眼見晚餐約九十蚊嘅餐牌上冇牛，於是索性食豪啲，點咗份連加一要142蚊嘅A級紐西蘭肉眼。鐵板未到，紅湯先行。湯入面已煮腍嘅蔬菜甚少，椰菜爽口即係後加，唔係原煲熬成。當茄膏味勝於湯中一切之時，我就隱隱索到一陣嚟嗰份扒嘅伏味。餐包微暖唔熱，但仍算軟熟。呢款牛油不比從前嘅牌子香口，唔明點解要轉。久違了嘅碎雪凍檸茶。乜嘢係碎雪？宜家好多餐廳嘅凍飲都係買冰廠交嚟嘅冰塊，只有自家舖頭有製冰機方能見到呢種粒粒只有波子咁大嘅碎雪，亦因為夠碎，篤檸檬嘅時候就唔會畀啲冰阻住哂。花園嘅凍檸茶向來都係要檸味有檸味，要茶味有茶味，茶色通透泛紅唔混濁，咁飲入去就冇澀味。點咗七成熟，落個蒜茸汁。裕民坊閣仔時代嘅花園，扒底薯菜例牌係小棠菜，估唔到呢度用西蘭花，咬落生生哋。薯條一如既往嘅唔脆，早在意料之内，猶幸呢款薯條一向以薯味取勝。一切開就知中伏，我要七成，佢熟到十成，咬落啖啖都係渣，縱然稱得上肉眼嘅牛扒點差都會有啲牛味，奈何每一啖都係粗纖維嘅口感

今日約左個客lunch，我相信一邊lunch一邊傾野係有成效的！呢個雖然是客，但說到底也是朋友，認識5年了，已經變成無所不談的朋友。今日午餐就一就佢，公司附近花園餐廳，午餐不是太貴，我叫了一個B餐，黑椒雞扒伴珍寶腸意粉，賣相都幾靚，我喜歡那堆粟米，夠健康！雞扒幾大塊，雞皮一向我都少食，難得地，我切開雞皮發現雞油不是太多！雞肉雪白，黑椒汁起初不夠，叫Waiter加多點後，雞扒沾滿了黑椒汁，辣辣地有少少嗆喉，令雞扒味道豐富了。珍寶腸也想讚一讚，平日食的通常腸皮位置都比較靭，但這個絕對沒有，唔會靭到狂咬都唔爛要吐，珍寶腸夠厚夠大件！客人食芝士焗香辣牛仔肉，黎到個感覺似咖哩，味道真係幾辣，我試左一啖都覺得辣，牛仔肉方面，唔係好知點解叫牛仔肉，牛肉就牛肉啦，唔算好靭啦。食完，又做成了一單生意。

服務員阿姐非常唔識點serv人上錯野又換錯野埋單時也態度好差，阿姐都唔同你講野會拍你，好唔中意陌生人touch 自己，本來就好唔滿意佢態度，仲要咁對D 客以前其他分店從來沒有咁差體驗，旺角附近兩間都覺得OK ，畢竟價位唔高，也都算OK 。呢間食物也麻麻地，牛肉質感唔好，意面也唔好食，加上服務態度好差真係好想比差評朋友同我都對此都大失所望，以後再唔會黎呢間，forever blacklist 。尖沙咀附近有好多好野食，冇因為一間好差的餐廳影響聚會心情

有時返工輪更輪到第一輪吃飯的話，很多時我便要自己一個獨享午餐。以前我常常嘲笑要一個人食飯的人實在太孤獨寂寞凍，但其實這倒是一個靜謐的時光讓我好好休息。今日Lunch約莫十二點左右，我步行到位於亞厘士道的花園餐廳，對於想過一過鋸扒癮又不想花費太多的話，花園餐廳這間港式扒房就很啱你。午餐選擇都幾多，我就選了鐵板肉眼牛扒，中午鋸扒的話，感覺罪惡感就沒有晚上吃大餐來得那麼大。每份Set lunch都必定送一個小餐包和一碗湯，湯可選羅宋湯或忌廉湯。我選擇了忌廉湯，其實就是罐頭湯，口感略稠。我就最喜歡掰一點麵包沾湯吃，因為忌廉湯單飲有少許鹹，這樣沾麵包剛好中和了鹹味。叫了七成熟的牛扒，花園餐廳的最大特色就是，鐵板上的牛扒，在鐵板上滋滋作響，好似在打仗一樣。而這塊牛扒，實在比我的面要大，牛扒底壓著一棵小棠菜和炸薯條，份量十足。牛扒切開，肉質是嫩的，不韌，口感偏向牛柳那種肉質，因為我自己吃牛扒會希望肉質會有少許嚼頭，所以我不是特別喜歡。但是，69元一客牛扒，還要比我們的臉大這麼多，計算起來也划算。總的來說啊，味道還可以，當然不能跟西餐廳150蚊一客的那種牛扒相比，但是要過下癮，簡簡單單在花園餐廳也可以