甘棠燒鵝

營業中

休息中

近排遊客多咗，對於飲食行業嚟講係好事，雖然比不上鼎盛時期，但係對比返受疫情肆虐期間已經係好咗好多。甘棠燒鵝作為名氣同實力都有返咁上下嘅餐廳自然肯定受到一眾遊客青睞，不過希望店家唔好厚此薄彼囖，店員對於遊客同埋本地嘅態度可以話係天淵之別。

嚟之前做足攻略，第一站當然係嚟到南華會，不過你咪話，位置真係有啲偏僻，唔仔細搵都好容易睇漏。鋪面不算好大，但係非常旺，如果唔係閒日嚟嘅話絕對係要等位。可能係人太多嘅緣故，服務有啲跟唔上，坐咗好耐樓面先嚟幫我哋落單，時間唔算好夜，好多招牌菜式都已經賣晒，唯有下次請早。迫於無奈之下同朋友各自點咗個碟頭飯，燒臘燒得好夠火候，不過可惜埋單果時嚇咗一跳，兩個碟頭飯嘅價錢去出面啲茶餐廳可以叫四碟，雖然好食，但係絕對唔係物超所值果種感覺，早知係咁寧願叫餸好過，今次就當買個教訓

金錢雞：絕對係驚喜之中的驚喜，今時今日真係好少餐廳仲專注於呢種咁嘅手工菜，雖然略嫌有啲貴價，但係呢啲心機菜真係買少見少，底讚！叉燒：入口即化，已經分唔清邊一啖係肥肉邊一啖係瘦肉，相對個人口味而言，我就比較喜歡金錢雞果種瘦肉，呢個叉燒太肥膩，食唔慣燒鵝：賣相同口味一般，反而冇其他幾道菜咁出彩，個人建議最好係點下莊，肉質同口感比較好。總體嚟講今餐相對一般，除咗金錢雞其他都係一般體驗，價錢略貴。服務員態度幾散漫，唔知係咪因為唔係熟客，之前已經聽過呢度係會大細超，熟客嘅待遇明顯係好過街客，呢樣有待考證

週末放假同幾個朋友嚟南華會打保齡，一番切磋之後當然要好好祭下個五臟廟啦，好慶幸同行有一位係南華會嘅會員，佢話甘棠只招待南華會嘅會員（唔知係咪吹水）。朋友話嚟到當然係一定要試下佢哋嘅招牌菜，甘一刀叉燒，180蚊一碟嘅價錢，分量大概6-8舊左右，不過真係好大舊，我覺得以我嘅食量嘅話兩舊可以搞掂成碗白飯了。叉燒肥得嚟又膿，但係蜜汁同焦香味好重，有啲類似東坡肉，咬落去第一啖會覺得好漏，需要等一等先有勇氣咬落第二啖，實在太肥膩，咬完一啖要食返幾條青菜中和返，

燒鵝皮好脆，肉質鬆唔會好鞋，不過有時斬得好多碎骨，後來問咗夥計先知道如果燒鵝太熱斬就一定有碎骨，可能係趕住上臺嘅原因，每次同啲夥計反應呢個問題都係話唔好意思下次會注意，但係基本多碎骨嘅情況都係經常會出現

2023/2/6 5:40入座，佢話要當晚市，收茶介每位$18。點選燒鵝瀨同黑毛豬义燒瀨（唔記得有無記錯名），燒鵝‘鞋‘，無味，义燒瘦，都係無乜味，唔知係咪放咗入碗瀨粉度。服務員態度極差兩個人，比2座位唔緊要，問佢攞個籮裝手袋同物品，居然比個茶几我，叫我放上去😔再問佢攞個籮或者比張凳我，佢話唔得閒住，咁我咪唯有自己攞張凳😒冇下次差差差差差…………………………………………………………………………..

叉燒唔洗講嘢，每次嚟到都係一定要點，一碟叉燒都已經夠食兩碗飯啦，罪惡嘅脂肪已經係默默誕生。燒鵝就略有失准，今日啲鵝冇咗平時一啖落口果种驚喜，啲皮燒得有啲過分，硬咗少少，食落就顯得過於肥膩。今餐有啲馬有失蹄，希望下次注意啦，好在鵝腎同埋鵝腸搭救

蟹肉桂花真係冇得頂，啲蛋炒得夠碎但係就一啲都唔見有燒焦嘅部分，睇得出師傅嘅功力絕對在線叉燒就肥得滯，食落口有啲東坡肉咁嘅感覺，如果唔係攞嚟餸飯估計食兩舊已經食唔落燒鵝一般般，作為主打菜式，冇乜特別驚喜，燒鵝同叉燒一樣太過肥膩，搞到最後碟鵝都食唔完要打包

過年期間人多就肯定嘅，建議大家都係提早訂位，唔係嚟到排隊真係排到傻啊通關之後明顯見到多咗好多內地客，果然好唔好彩隔離坐咗個阿叔，全程大聲講電話好影響食慾，想轉個位都冇，谷鬼氣，食完拿拿聲埋單閃人                                                                           

甘一刀叉燒絕對係最值得一試嘅。肥瘦適中，入口即溶，送飯簡直一流。不過燒鵝就好似水準有啲不在線，可能係天氣原因擺太耐，上到嚟成碟燒鵝已經凍晒，哎咗幾次先有夥計嚟幫手加熱，個樣仲好似好唔情願咁

放假同屋企人出嚟食飯，媽咪話想食甘棠，嚟到叫咗份叉燒、鵝頭同埋梅子鵝，畢竟燒鵝成日食想試下其他做法，叉燒爽滑香，肥而不膩不過梅子鵝感覺調味怪怪哋，食唔慣，肉質唔知係咪煮嘅時間唔夠，略嫌硬身，好影響口感，早知都係叫燒鵝好過

📍銅鑼灣𝙲𝚊𝚞𝚜𝚎𝚠𝚊𝚢 𝙱𝚊𝚢❝終於一試甘棠燒鵝🔥最好食既叉燒!🤤❤️❞多得朋友幫手訂位arrange帶埋我地去食🤤先有機會一嘗係南華會入面既甘棠燒鵝🤩想試佢地既叉燒好耐 果然好正💯🥰應該係我食過最好味既叉燒!!!😍✌🏻半年前食宜家先出post 因為本身冇諗住出(都難訂..?!) 但最近見佢係中環basehall2.0有開舖頭✨‼️大家更方便食到! 我睇番d相仲回味緊 真係好正🥹❤️決定都係出post! 😈以下菜式都要事先預訂❗️▪️甘一刀叉燒 $180可能係我食過最正既厚切叉燒🤤好滿足幸福🥰用左西班牙黑毛豬 燒得外脆 中間肉質好腍身 重豬味😋油脂感爆發 滿口濃濃豬油脂香 溶在口中😈半肥瘦剛好💕麥芽糖醬香甜 it’s a perfect charsiu!💯($180好似有6舊 如果冇記錯🤣)▪️大班叉燒 $150呢個係薄切叉燒✨我個人本身中意厚切多d 所以我更中意上面既甘一刀叉燒😆但呢個都唔錯! 都好腍身 油脂感冇咁重😙▪️甘棠琵琶鵝(全隻) $880 用特別方法燒成🔥上枱比我地影相打卡個時鵝身打開鵝頸翹起🦢皮燒到香脆 肉質都算嫩😙點香甜梅醬唔錯~▪️一品鵝雜煲 (forgot the price)

食物:10分嚟講可以俾6分，合格線水平，總體嚟講平平無奇環境:裝修都算OK,不過呢啲中式菜館對於環境需求唔大，起碼我嚟食就唔會對餐廳環境有太大要求，始終肯定食物優先服務:態度都算熱情，基本都跟到足價錢:偏貴

今日放工經過南華會，同事就提議話不如去甘棠食燒鵝，本來冇乜主見嘅我就一齊囖我就簡簡單單order咗個燒鵝飯，碟飯上到嚟賣相冇乜特別驚喜，啲燒鵝汁落得太多搞到碟飯整體偏鹹，燒鵝略肥，食飽埋單走人

宜家天氣轉涼，建議大家都係堂食好啲。燒鵝同啲燒肉一打包返到去真係一啲都唔好食，諗住攞微波爐叮返熱，口感同埋味道已經完全唔係果回事了，真係好可惜，就咁就浪費咗一餐。