漢龍雞煲烤魚

營業中

休息中

呢間位於石門站旁邊專食雞煲的食店嘅雞煲真係好掂，食雞煲梗係為咗佢嘅重口味啦，不過呢間雞煲店最正就係佢個麻辣雞煲唔係一味得個辣字同鹹字，佢嘅雞煲入面好多配料，洋蔥、蒜頭、紅蔥頭、芫茜、芹菜、薑片等等嘅香料，侍應姐姐一邊幫我地炒個雞煲，D香味就一邊升出黎，好香。呢度有隻啤酒幾好飲，德國嘅麥啤，個Friend食雞煲加D麥啤落個雞煲度會正D，我試咗，倒咗一支，又真係幾香，食嘅時候就無乜酒啤，可能D酒精已經揮發晒。個雞煲食到咁上下就加湯打邊爐，我地叫咗半隻雞，佢D份量都幾多，所以唔係叫到好多其他野食。個冰豆腐超正，吸晒雞煲D味，而個墨魚滑都幾新鮮，而且非常彈牙。

天氣轉涼就諗起想食雞煲，記得呢間幾好味於是就嚟石門呢邊，嚟到先發現原來佢改咗名。今晚食椰子雞煲，呢度嘅雞依然係又靚又大碟，佢一碟係半隻雞，我哋叫咗一隻所以有兩碟，份量多到要分開兩次落啲雞。成個椰青水倒落湯底度除咗係儀式感之外，亦都係真材實料唔係用罐裝或者膠樽裝椰青水。其實食完一隻雞都已經飽咗一大半，所以我哋都只係嗌多少少嘢打邊爐，清淡啲叫咗萵筍片同埋淮山片。呢度雖然改咗名，不過味道仍然係唔錯嘅，保持到水準。

呢間位於石門的雞煲店夜晚食雞煲而平日Lunch Time就有Lunch Set比我地呢D附近返工嘅朋友仔，呢度嘅Lunch Set真係又抵食又好食，而且款式都多嘅，每日都有成5、6款任君選擇，就好似今日我叫咗個蒸魚嘅Set，條魚估唔到咁大條，而且好新鮮，憑佢D肉質就知道，所以呢個餐每日都係限量嘅。另外呢度碗老火例湯都好正，無味精，又足料，我叫多渣都無比侍應黑面，超正。就算飲咗湯都好，佢個餐仲包埋餐飲，好抵食呀。

今晚食雞煲，因為個friend唔食辣，所以就叫咗椰子雞煲，清潤口味其實都唔錯啊。呢度嘅椰子雞煲係成個椰青喺你面前倒落去個湯底度，有姿勢有實際，湯底滾咗再落雞，再次等佢滾起嘅時候就可以開動喇，先食雞飲雞湯，啲雞肉新鮮好味，冚蓋滾佢5至6分鐘左右就食得，啲雞肉彈牙得黎又唔會好韌喎，碗雞湯真係精華所在，超正，食到咁上下先至開始打邊爐。火鍋配料就嗌咗韭菜餃、竹笙同埋生菜。韭菜餃好好食，入面啲餡料好新鮮，大推。

呢間雞煲嘅椰子雞真係好正好清潤，而且用料都有幾高質素。一開波湯底嚟到嘅時候就連埋一個椰青一齊嚟，侍應幫我哋倒啲椰青水入去個湯底度滾，滾起咗就幫我哋落雞。倒晒啲椰青水入去湯底之後個椰青仲可以刮啲椰子肉嚟食。呢度嘅雞嘅色澤都幾靚，幾新鮮，肉質係唔錯嘅，呢度係半隻雞嘅份量，都算幾大隻。佢啲牛肉都唔錯啊，雖然雪花紋唔係話好均勻，不過食落個牛味都幾出句另外叫咗碟鮮腐竹同埋一份菜，都幾新鮮。呢度有隻出面少見啲嘅德國麥啤幾好飲。

之前間中都嚟呢間烤魚雞煲打邊爐，一段時間冇嚟，原來轉咗名，不過好彩味道不變，依然咁好食。因為好欣賞佢啲雞夠曬靚，所以決定要一隻雞，費事叫半隻唔夠食。侍應話個湯滾起就可以落雞落去，滾返佢五至六分鐘就食得。佢啲雞好新鮮同埋冇瘀血，飲完個雞湯食到啲雞件咁上下之後就可以開始打邊爐。叫咗韭菜餃同埋鮮蝦雲吞，兩樣都好新鮮好好食，似乎係自己包嘅。佢呢度嘅炸魚皮超級巨型。另外叫咗淮山片懶係健康啲咁啦。餐廳名改咗，不過味道依然正。