客家好棧 (大本型)

營業中

休息中

見到客家好棧做推廣1蚊半隻雞，岩岩好有4個人可以叫1隻雞，所以又嚟食晚餐啦，但啲菜式比起兩個月前嚟食個時較為遜色，真係唔知點解啦🤪❣️沙薑雞 $2呢個見枱枱都嗌，唔係唔嗌呀嘛🤪，份量十足，雞肉充滿沙薑味，可惜部分雞件血水較多，唔係好敢食🌚❣️孖寶A+B 清蒸花尾躉仔 上湯蝦球伊麵 $198蝦球伊麵都保持到水準，蝦球大大隻，係個伊麵仍然較多汁；花尾躉仔比起上次食細左一半有多，多口問下啲姐姐，佢話廚房師傅撈到邊條就煮邊條架啦，咁都得，呢個唔Ok🌚，但肉質係滑嘅❣️芹香花枝炒蝦仁（少油）$76叫左少油，今次反而做唔到，油較多，但菜式都仲有穫氣嘅👀❣️秘製陳皮骨 $58醬汁較為甜，所謂嘅陳皮係零食個隻陳皮碎放係喺面，反而啲骨就冇咩陳皮味❣️金醬炒帶子象拔蚌 $88金醬較為辣，而且帶子同象拔蚌份量唔多，全部薄切，帶子超細粒，呢個價錢略貴🌚🏦是次消費總額 $521（人均消費 $130.3）茶位$13 🍴須加一服務費👅好味度：7（10分滿分）菜式嘅水準比起兩個月前嚟食差左，雖然有特價1蚊雞，但其他菜式味道唔吸引，廚房水準唔穩定，所以有啲失望🤑

好耐冇食中菜🥢， 今日大開眼界🤣🤣🤣去咗客家好棧食飯，見到佢有個自動斟水機，好方便， 唔使叫人斟水， 但係個茶壺同水杯，都好細隻，要斟好多次🤣🤣🤣， 連茶葉都因為衛生嘅關係變咗茶包， 真係與時並進 。。。$18 半隻沙薑雞🐥咁抵點可以唔叫🤭雞都尚算嫩滑🐟酸菜烤魚🐟🌶一盤 熱辣辣既烤魚，好惹味🌶， 仲有好多配料唔少得梗係 鹹酸菜~大豆芽、金菇、大蔥、芹菜 、 豆卜、雲耳 仲有主角烤魚🐟🐟🐟欖角肉碎四季豆🌶四季豆炒得好有鑊氣👍🏻👍🏻👍🏻番薯粥大大碗

這間酒樓食物質素尚可，但排隊上做得非常差，沒有系統，客人在店內用膳，不停有客人在旁邊等位，全程用膳期間，給人望着，完全是迫客人離開。絕對不是一間合理的做法，令人反感！為何不安排職員叫號碼，企着等位的人感尷尬，而坐着的食客也感到不安！

今日一心諗住帶家人嚟飲個茶，見佢環境幾好，座位幾舒服，就決定試一試啦～一坐低職員就問我哋飲咩茶，隨即就有包茶葉飛過嚟，無錯～係飛埋嚟！個職員喺格離枱飛包茶葉俾我哋，我諗佢哋睇得古代武俠片太多啦，可能覺得自己好型🤔但我就覺得好無禮貌啦～食物就不過不失啦。芫茜牛肉腸粉個皮好厚，食唔到芫茜味，牛肉都算足料，但整體份量偏少。xo醬炒蘿蔔糕依樣份量真係少得過份，個碟係前菜碟嘅size，不過蘿蔔糕有炸過，幾香口，而且個xo醬微辣，係幾惹味！但餐廳無炒埋一齊，感覺上有點無誠意，而且真係份量太少，覺得唔太抵😭好好地一個假期就被破壞咗😩

星期五晚同屋企人喺油塘大本型覓食，見到客家好棧有$18半隻雞，於是唔使諗咁多，就喺度食晚飯啦🤩❣️沙薑登山雞$18雞肉雖然唔係好大隻，但肉質嫩滑沙薑味濃，配上薑蓉食，胃口大開❣️瑤柱蛋白炒飯$78炒飯份量十足，有大量嘅乾瑤柱絲同翠玉瓜粒，而且飯粒炒得乾身，好有鑊氣😋❣️孖寶A+B 清蒸花尾躉仔 上湯蝦球伊麵$198蒸魚魚肉質地嫩滑冇腥味，蒸到岩岩好，比想像中大條，美中不足係個豉油比較淡，冇咩味🌚伊麵較為碎濕濕，而且太多汁，有六大隻大蝦，蝦身爽口👍🏻❣️芹香花枝炒蝦仁（少油）$76菜式可以揀少油，抵讚👍🏻蓮藕同西芹爽口，花枝同蝦份量都多，炒到有街邊大排檔嘅風味🤤❣️鹹菜腩肉炆鱔缽$68鱔件較為細件，腩肉係偏細粒，成個菜式較為油膩同埋重口味🤨好味度：8（10分滿分）環境舒適，仲可以望住個海食飯，而且有自助嘅斟茶服務，乾淨衛生，食物質素還好，住家菜嘅味道🤓🏦是次消費總額 $524.7（人均消費$174.9）茶位$13 🍴須加一服務費

終於等到限聚令放寬四人一台，一家四口就走去飲茶，去到門口問收銀姐姐係咪要攞飛，收銀姐姐話係，我要攞咗飛先，等咗5分鐘，都冇人理我，入面又有枱，我再問收銀姐姐，點解入邊有枱，我都要攞飛嘅？係唔係可以直接入去，佢答我，你鍾意入咪入囉😑😑😑😑😑😑😑其實服務態度差，都可以忍吓，但食物質素差，就真係冇得忍，蝦餃啲皮又厚又硬😡牛肉球又乾又鞋😡雞粥只係暖嘅😡細油抄手仲有陣雪藏未，又乾又硬，真係完全入唔到口😡所有食物都難食過即食點心，真係唔會再有下次。。。。。。。

一入門口無人招呼，自己揾位揾左好耐。之後啲服務員明明見到你，但係特登擰轉頭扮見唔到。叫左個梅菜扣肉半個鐘無黎，重話只係一陣，唔好吹。食物味道還可以，但普遍較貴。

疫情關係，已經接近一年無去茶樓飲茶，今日興之所至搵咗間地方乾淨嘅酒樓嘆吓茶！酒樓在每枱旁邊都放有一部自助冲茶几仔，客人自行把茶葉及滾水加入茶壼內，不經其他人手，衛生又安全👍。客人隨時有熱水，酒樓又可以精簡人手，真係癲覆傳統酒樓嘅做法。酒樓又採用QR code手機落單，點心即叫即蒸，客人食到中段可以隨時加單，確保時刻都有新鮮熱辣嘅嘢食。酒樓仲實行少鹽少糖，但食物味道又唔至於過淡，符合健康飲食新趨勢。

出咗宵夜8:30pm後有半價之前去食過都覺得抵點知上星期五去我同門口帶位講7位宵夜佢話直入轉右坐位都唔帶我地入去要我地自己搵落單用QR code咁就去搵宵夜個度落單到食完埋單無半價就問經理點解佢話今日宵夜9點開始所以無半價我話但係我入黎講咗食宵夜咁你門口帶位點解唔講聲呢啲係基本要講架之後經理話我無你地咁好口才我幫你地睇下張單幾點入如果9點入單先幫你做到半價我話無可能啦我8:40入黎架要我俾全價唔係問題你早講唔係宵夜我點其他食唔駛剩係食宵夜咁少選擇同埋你地手機落單宵夜未夠鐘又會落到單跟本就係欺騙顧客已經去消委會投訴咗唔會再有下次幫襯不知所謂

今日中午去飲茶，特價點心：牛肉拼鯪魚球，仲差過公仔點心。鮑片鴨掌，得一片鮑片仲要跌出碟响蒸籠內，鴨掌超細得兩隻。雜菌綿花肚，見到都唔想食。特點燒賣皇，同普通燒賣無分別，size又細，羅漢齋炒麵，齋同麵分開上，麵完全不能分開夾起，成塊炸脆麵餅，齋啲芡汁不夠熱似漿糊。櫻花蝦炸兩，油炸鬼唔脆，櫻花蝦只有面頭幾粒。酒樓標名點心即叫即蒸，但全部都唔夠熱。一行五人，每人$50，食唔飽。酒樓對外景觀開揚，但隔音極差，同朋友傾談要叫破喉嚨至聽到，以咁既質素不算平。

今晚同屋企人去左客家好棧食團年飯，可能因為比較爆滿嘅關係，我地坐嘅都係圓摺凳，連椅背都無，而且仲要坐得好逼。食物方面，我地就叫左一圍，而最大問題就係個鹽焗雞，唔知係咪因為未叮熱得夠耐嘅關係，d雞肉幾乎每一舊都係外熱內冷，裡面係凍到好似係雪櫃到攞出黎咁。其他幾樣野食亦平平無奇。

自從轉工後，只可以幫襯特惠時段，今晚幫襯客家好棧。夜晚部份小菜半價, 叫了一碟炒飯，浸時蔬及魚，加一茶介，扣除優惠，成為$151，兩位，真係抵過食茶記。至於食物質素都唔錯，炒飯先上，味道好，但唔夠熱，菜及魚就十分好，熱辣辣，啖啖肉，薑，蔥頭，蒜蓉一齊屈，好好味。

每個星期一定會有一日嚟呢度食晚餐，勝在平靚正。冬天嚟啦今次叫咗個羊腩煲。羊腩煲羊腩肉質嫩口，醬汁濃，羊肉多，反而啲配菜就比較少，都算足料！仲送咗一盤生菜，夠晒三個人食。花枝片蝦仁炒西芹呢間酒樓最差就係有時炒到啲嘢黑蚊蚊，又好又唔好啦可能太大火喉，今次嚟到個面就黑左幾舊花枝片。不過呢味餸真係好好食㗎，重蒜炒，蝦仁爽口彈牙，花枝片夠淋。其實呢度最貴唔係啲餸，係茶錢同飯錢。每杯茶$13，飯大概$12，三個人加埋都$60 㗎喇！想唔咁貴就食少碗飯啦！

今日一早同朋友去飲早茶，咁油塘7:30就只有呢間有開，所以就試吓佢。咁我哋就叫咗平時飲茶必食既鹹水角、流沙包、鳳爪。個鳳爪就幾好食嘅，幾入味。鹹水角同流沙包就太令人失望喇！竟然係空心嘅！你睇吓啲相，一咬開個鹹水角裏面係冇肉架! 流沙包都完全冇流沙，所以之後我哋都唔敢再叫啲有涵嘅嘢。咁之後都叫咗個鮮蝦腸粉、燒賣、仲有個個名好吸引嘅天鵝榴槤酥。腸粉燒賣都係正常嘅，但個天鵝榴槤酥就雖然賣相好可愛，但啲榴槤就有啲臭，有d 失望。

今晚同家人一起食晚餐，來到這間餐廳，看餐牌上有一個套餐，我們發現很好的，因為有一個紅燒鮑魚炆鵝掌，因為這個菜式是很需要時間同耐性才處理得好的，先說一下賣相，從顏色來說已經夠得很夠賣相，深深的帶著有濃濃的懷舊風情，味道方面，鮑魚嫩滑又入味，重要的是爽彈又不失口感，而鵝掌非常入味，有著非常重的骨膠原，讓其有鮑魚汁風味也不失鵝掌的可口，功夫非常之到家，讓人回味的懷舊。