劉森記麵家 (桂林街)

營業中

休息中

睇過咁多電影, 網友都話好食, 琴日放工個朋友黎試下, 我食水餃麵, 友人食雲吞麵, 賣相一般, 感覺同其他雲呑麵無什特別, 而且我覺得較細碗, 水餃有3粒, 雲吞有5粒. 我覺得d水餃冇乜冬菇味, 如果可以多d就好, 友人卻說雲呑好正. 但一心諗住會係好好食, 但我覺得同其他的雲呑麵舖相比, 他只是名氣大了點, 一試無訪, 特登入黎食就唔洗la.

我和HONEY 又嚟呢度揾食呀食番牛筋豬手蝦子撈面$32~ 牛筋要加四蚊所以特別大條和多..... 味道當然係好啦...但係個湯就好似差少少咁....(好似另一間好味D丫)女朋友食咗水餃冬菇面....$24 (佢次次嚟都食水餃架...佢話大隻同好味....(我都覺既)可惜佢今次叫埋冬菇....所以少咗一粒水餃...佢好唔開心呀.....(下次要提下佢唔好雙拼先.....)不過我女朋友話開始厭..........

(2星期前食評)見呢度長期係好評餐廳十強之一, 同男朋友黎試下我要左水餃蝦籽撈粗麵, 水餃真係幾好食! 蝦又大隻又爽口, 入面有蝦籽.. 但係得兩隻... 夾左隻俾男友就只剩一隻了, 不夠滿足 撈粗唔錯, 麵彈牙, 好多蝦籽, 好食! 不過我覺得可以再濃味d男友要既係牛筋蝦籽撈幼麵. 牛筋麻麻, 係爽果種, 我地鍾意食稔既多d.. 而且得幾條.. 撈幼麵ok喉嚨唔舒服, 唔敢食檯面既醃蘿蔔. 下次有機會再試好多人, 當日要搭檯, 坐得都好迫下, 不過黎得都預左喇男友覺得普通, 可能距唔太鍾意食蝦籽.. 我就覺得唔錯, 水餃真係幾好食, 但唔係好有驚喜果隻

終於試新野!近來同學成日討論呢間d蝦子麵，搞到我真係好心急想黎試!要了水餃蝦子撈同鵝腸蝦子撈。水餃蝦子撈水餃數量少，但每隻都包得極飽滿，木耳筍絲份量十足，而且內裡更有原隻鮮蝦!鵝腸蝦子撈鵝腸亦很大堆頭，夠爽口，不過下次不會再叫了，始終要靠豉油吊味既食物都不太對我口味。講返最出名既蝦子撈先，蝦子鋪滿成碟麵，有香味，但食落唔夠咸。麵條彈牙而無梘水味，水準之作!不過成餐入面，我最鍾意既始終係玻璃瓶既醃蘿蔔!微酸，夠醒胃，同朋友仔2人已掃了1/4樽。可以的話，真係想食曬添呀

去電腦節, 順道到此一試可能今日電腦節, 人頭湧湧, 食雲吞麵都要等位我每次到澳門, 都要一吃蝦子撈麵,夠竟香港的蝦子撈是否同樣出色?1.蝦子雲吞撈麵2.蝦子豬手雲吞撈麵的確夠多蝦子, 可惜不夠香雲吞質素上算滿意,豬手入味順路的可以一試, 專程的就不必.

今日專程與同學們來到深水埗一嘗近期人氣急升的蝦子麵,我們各人叫了云吞蝦子撈麵,牛肉蝦子撈麵,牛筋蝦子撈麵首先牛筋蝦子撈麵, 沒有蝦子, 可能是他們搞錯了~那他們說沒有錯, 之後我們堅持我們是叫了牛筋蝦子撈麵那店員叫我們吃住先, 等陣比返d蝦子, 食到最後都係無比到本人吃的是牛肉蝦子撈麵, 牛肉OK, 但伴隨的辣汁與牛肉味道似乎不太夾!云吞蝦子撈麵, 同學說云吞很好味, 但大家都認為蝦子麵很乾, 而且味道一般! 要伴湯才比較好吃, 但伴湯吃, 蝦子又散掉了~那便與普通的云吞麵無異蝦子麵不是傳說中的美味, 大家都很失望!所以也覺得不值這個價錢! 而且真係細碟咋~

見openrice咁好評，就特登坐車去試下。去果陣七點幾，個場算幾full，不過我一個人搭枱無太大問題。我叫左個蝦子撈麵，d蝦子真係多到鋪滿成碗麵。d麵幾爽口，蝦亦非常入味，我本身唔算太鍾意食蝦子，但都覺得佢d蝦子麵幾正，我諗鍾意蝦子既朋友真係必去。仲有枱面上有酸蘿蔔任夾，而家真係比較少見。

是日到鴨記+黃金搏鬥一輪後到劉森記...論蝦子麵, 我只喜歡澳門的祥記, 劉森記是香港比較好的, 但不知為何香港的"簡"水味較重.與友人加了個大淨腩, 哇! 分量不少, 還有時菜在底(總之唔洗叫油菜), 牛腩炆得入味還有牛筋! 腩汁濃(對我來說鹹了少許), 2個人, 吃不完, 打包. 朋友話不如今晚煮d靚仔聽日lunch叮番熱吃, 也好~ 第二天, 番叮味道也是很不錯的!(加了點水叮, 中和了鹹度之餘, 撈飯是一流的!)

食完失望既腸粉後 我地又去搵劉森記都好易搵 MTR D2出口向右直行就到了 見鋪頭唔係好多人炸wor ... 2個人點了個白芍生菜 蝦籽水餃雲吞撈 share好快就到了 個阿姐好好人又好好禮貌 水餃同雲吞入面都有蝦籽嫁 好味~蝦籽撈比上星期macau祥記還要大碟 蝦籽還多呢~~~好彈牙既面 唔似出面食既淋之之 加埋辣椒油撈仲正&香試埋佢個 酸蘿蔔先 >.<唔太酸岩岩好味道 唔會好淋 環境好乾淨 good出到門口仲見到 OR既讚揚信 ^^

每次都會點雲吞，水餃，真係好好味，好多蝦，皮都幾薄，真係足料，不過個湯就好多味精喇。蝦子撈麵我就覺得一般，個人喜好啦。

成日來深水埗都係食米線,見呢度好多人讚蝦籽麵做得出色,一於試下先本來想試黑柏葉撈蝦籽麵,可惜已經賣哂,咁唯有退而求其次揀了雲吞撈蝦籽麵蝦籽麵上桌時已聞到很香的蝦籽味,與幼麵撈好後真係有種不同凡響的感覺,只是覺得麵比較乾身,但我發覺最好食的不是撈蝦籽麵而是雲吞,原來鮮蝦雲吞內加了蝦籽,所以令到雲吞的味道得以提升,實在比起坊間的雲吞多了一份誠意,另外記住不要錯過桌上自助的白蘿蔔,味道很不錯

今晚同女友嚟呢度吃晚攴因為之前吃得太飽了我們只點二樣東西吃豬手面!! 水餃牛筋!! 牛筋~ 好爽好入味呀~ 水餃好大隻仲有筍,冬菇及蝦子 豬手~ 入味亦好淋...太多美味食品呀

都係第兩次再幫襯第一次黎食時無現時咁多人光顧，宜家多人到要等位好食既，等都係值得！同友人一齊叫左蝦籽雲吞撈麵蝦籽雲吞撈麵 - 味道完全無變過！都係咁正！我覺得正係因為雲吞同個麵質數都唔差！條條麵都佈滿蝦籽，會令人食到成嘴都係蝦籽！加上個雲吞食落有一種香味我都唔知點形容！等位時店員服務態度友善，抵讚！

今晚阿b話帶我嚟食蝦子面呀~ 原本我話食其他架~ 好彩者...呢度有兩間分店架~言歸正轉: 叫咗個豬手蝦子面:＄28 加牛筋 ($4) 淨水餃 $18 (六隻) 加蝦子要28呀 好貴呀(我無加呀....)牛筋 好好味呀.... 第一啖就覺得好爽,好入味~ (第一次食到咁好味既牛筋呀) 好彩我話食喳.....^^豬手我無乜食過呀~ 但我阿b話好入味,但係牛筋好味過佢呀 水餃~ 好大隻呀............. 好好味 ~ 蝦好大隻, 仲有埋蝦子係裏面添..... good good good 仲好食過江仔記個d 丫 我一定要返嚟再食過

自小住在這區的我竟然到今天才第一次食這間店的馳名竹昇麵~ 因為每次經過都被等位的人群而嚇走呢~ 地方很細, 坐得很不舒服第一次食當然要食蝦子撈, 要了牛根蝦籽撈, 朋友就要了雲吞蝦籽撈蝦籽真得很多, 麵沒有鹼水味, 但就很乾, 根本就撈唔到, 加上坐冷氣位, 一會便把麵吹得又凍又乾, 唯有把附上的清湯不停加上麵上, 希望減少難食程度。但強勁的冷氣最終也令麵變得像草.....幸好牛根非常美味, 軟淋淋而且好入味, 一碟有好多, 食到一半就已經好滯, 朋友試過也覺得很好味, 很飽也要把它們通通吃光~也試了朋友的雲吞, 但份量比牛根少, 好似無咁抵食, 不過大大隻的雲吞都非常足料, 蝦好爽好彈牙, 都好好味~麵是很出色的, 不過加上蝦籽也沒有太大分別, 還是喜歡配上熱湯的麵~