九頭鳥米線 (勝意大廈)

營業中

休息中

呢間之前食過2~3次，覺得都唔錯所以包膠下。因為餐廳早幾個月先開張，幾乾淨，環境又夠光猛，用QR code order都幾方便。同同事每人叫一餸米線share餸食，每人$40有找好抵食🥺。叫完10min左右就食得。🔅魚肉春卷米線 ($39)米線叫左4小辣(+$1)，上次食5小就唔係好覺得辣，呢次4小差唔多，少少麻，唔會好辣😋，夠濃味。米線原本都大碗，所以叫少米(-$1)就啱啱好。春卷炸到個皮仲脆脆地，好邪惡😋，有5條超抵食👍🏻。🔅墨丸米線 ($39)墨丸有6粒😋，夠大粒，唔係啲cheap cheap墨丸，幾彈牙😎。加埋腐皮同芽菜都夠豐富。💬可能本身我唔係南記/譚仔fans，對米線要求又唔太高，呢間對我而言都唔錯。味道正常，份量都多，計落仲抵食，係遠左少少同埋可能要被瘋狂搭枱之外都唔錯😝。

試試灣仔個個都話好似譚仔嘅米線 香港分店唔多 只有3間 中環 灣仔 藍田 今日就去試試佢到底似唔似譚仔.入到店內 入面所有野都同譚仔好似 例如1️⃣環境裝修 座位空間間隔同樣咁迫2️⃣餐牌 有得揀 10小辣 有4-5款湯底3️⃣又係有麻辣 酸辣 蕃茄湯4️⃣除左清湯外 其他湯底都要加錢5️⃣同樣又有大大碗 過橋米線6️⃣同樣有米線姐姐 （但冇譚仔話）不過網上睇圖 除左麻辣湯外 其他顏色都唔似.所以今次試試 直接叫 麻辣湯 過橋米線$60咩餸都可以試到 麻辣湯加$1 奶茶加$107️⃣麻辣湯味道 9成似8️⃣過橋米線又係 另上 炸醬 酸菜9️⃣大部份用料都好似 有唔同嘅地方係👍🏻佢地牛肉同雞肉都大件好多👍🏻豬膶呢間比較滑 煮得冇咁老👎🏻九頭鳥腩肉比較厚 同埋有豬so味.👎🏻杯奶茶淡到好似水咁 伏 仲要加$10.整體評價大概係咁 個人覺得真係幾似譚仔個人覺得未到好好食必去 都唔會伏得太誇張.#hkfunfoodrecord窮遊香港#hkfunfoodrecord_灣仔.#九頭鳥米線 (勝意大廈) (灣仔)地址：灣仔莊士敦道191-193號勝意大廈地舖.⭐️評分：味道：3/5環境：2/5服務：3/5 抵食：3/5.‼️想睇更多資訊

之前社交平台 碌到話九頭鳥好好食 好食過譚仔好多 今日咁岩係附近就試試佢係咪咁好食睇餐牌唔知以為去左譚仔 版面勁似 不過睇真啲 呢度啲小食多啲款揀 有墨魚頭個啲 不過我地都係揀返平時會食既小食 皮蛋同蒜泥白肉 皮蛋一啲都唔溏心 同埋勁大陣亞摩尼亞味 食開皮蛋既我地都唔係好頂得住🤢🤢🤢 蒜泥白肉就加埋一舊 要人幫手先夾到一片 味道算ok 米線方面 我地分別叫左魚蛋/魚肉春卷/豬腸share 食 分量好多 但就好一般 魚肉春卷亦冇南記好食🌚湯底好咸 咸辣分離🌚🌚🌚

今日出開灣仔 見到九頭鳥夜晚終於冇人排 就入去試下✨雞肉豬肚麻辣五小 $45雞肉嫩滑有雞味嘅 豬肚略嫌唔夠爽 同埋個麻辣湯底都唔係幾香 可能係我叫得五小但少 好似覺得麻辣湯底都係三哥略勝✨牛肉生菜重慶麻酸辣三小 $44呢個湯底比麻辣湯底好食 又酸又辣夠濃味👍👍👍 牛肉唔韌嘅 生菜都好爽 索埋啲辣湯更辣✨麻辣鵝腸 $32平時比較少見所以點左個小食試下 鵝腸幾爽口 啲麻辣汁夠入味 唔錯👍✨豆漿 $12總括黎講味道都唔錯嘅同埋都幾大碗 😋 米線質感都幾好 唔會太淋太硬 有得QR code 落單好方便 幾快就有得食環境方面都幾舒服 冷氣好夠 食辣野都唔會熱到出汗味道❤️❤️❤️❤️抵食❤️❤️❤️❤️服務❤️❤️❤️💔環境❤️❤️❤️💔💰晚餐人均～$65 (唔收+1)

呢間米線最近好hit 咁香港人就係鍾意食米線，咁就梗係去試吓啦。佢個餐牌真係好似譚仔 不過比譚仔就多少少選擇，呢度出名魚肉春卷，就梗係黎食下，另外揀咗魚蛋同埋豬大腸，三碗都係麻辣湯三小辣。魚肉春卷，我覺得南記好食啲，湯底冇譚仔咁辣 但偏咸… 另外小食要左皮蛋同蒜泥白肉，皮蛋好硬好硬！！又好腥🤢🤢🤢唔新鮮，白肉就ok ge 不是份量比譚仔小🫣 講真 因為佢真係太似譚仔 一比 就好明顯邊間好食啲🫣🫣🫣 不過最慘係 食完3個一齊唔舒服左幾日 又胃痛 又痾🥲🥲 齊齊食左一星期整腸丸🥲🥲🥲

上網見到好多人都讚呢間9頭烏米線終於有機會去到灣仔試下係咪真係好食過譚仔夜晚8點鐘左右到達所以都唔洗點排隊 店外面都會見到有人會外賣店入面座位都算多 人流都有既 唔會係吉鋪 無人食今次我叫左重慶酸辣 大腸雞尖 $48呢款湯底 都同譚仔既咪道 差不多不過個人覺得偏咸 （我都係鐘意譚仔個款多d）份量既話 還可以 平時係譚仔食一碗都食唔哂但呢度個碗 我係食得曬既 友人點左個麻辣十小 雞肉 乍醬雞肉正常 湯底我覺得比淡左d乍醬呢 唔知食緊乜一pat野 肉碎 不分明 食落去仲好似食到有d茄汁味好難食都係譚仔好食好好好多 不過我幾欣賞佢地個墨魚頭$32真係幾好食！ 但係份量就好似小左d…～總結我都係會鐘意食譚仔多d以上都係個人既食評 並不代表每個人既立場

咁岩經過灣仔又有d肚餓，路過九頭鳥見好多人等外賣，純粹好奇之下我就去左堂食，睇下九頭鳥到底好唔好食。首先等位等左大概15分鐘，一入到店內非常多人。座位與座位之間好近，亦有點擠迫。我點左個腩肉春卷米線（3小辣）一嚟碗米線，先試一試個湯底，我覺得湯底好味過譚仔，至於腩肉就正正常常，無大驚喜。值得一讚既係春卷數量比較多，又炸得好脆，而且食落好有口感。👍🏻另外仲點左個香辣墨魚頭，口感爽脆再配上麻辣汁，好味。👍🏻

前排熱話 “好食過譚仔”咁今日喺灣仔搵地方食lunch嘅時候，無意中見到九頭鳥😏 反正未到12點，又特別多人，就決定去試下，睇下係乜料😏試咗個雞肉豬潤雲南酸辣3小辣，個湯底有花生醬香味又冇話好勁味精咁，都真係唔錯！不過，我嫌佢啲餸量有啲少。另外，佢扣底可以平1蚊，咁都幾好。雖然話扣底，但其實都仲有好多米線。除食物方面，佢係自助QR code 落單，咁都ok啦！但佢堅坐到超滿，而且一定一定要搭枱。疫情之下，要自己衡量下堂食定外賣啦！

經過灣仔肚餓搵嘢食見到呢間叫做九頭鳥既米線舖個招牌有幾得意所以入咗去米線舖呢幾年開到成行成市總有一間在左近要突圍而出真係唔易入到去舖頭位置都幾舒服唔會太迫望一望個Menu 真係好似譚仔湯底又係差唔多 不過呢度有啲湯底唔可以揀辣度順帶一提 呢度係用QR code落單㗎嗌咗個豬軟骨蕃茄米線湯底唔會太酸豬軟骨不過不失 味道都唔錯唔會太硬湖南酸辣湯底 雞肉魚卷米線聞落都有香味但一食其實就同其他連鎖米線店有分別唔好講齋食米線 就算連埋啲配菜食我個人覺得都唔係太過入味始終食米線個湯底都係精粹配料都係中規中矩另外冇影到相 都叫咗五隻雞翼未到冇譚仔咁驚艷總括來講我會寧願食返連鎖嗰啲米線舖

最近好Hit嘅九頭鳥 🐦大家都話係譚仔2.0 當初佢第一間中環店已經每日排曬長龍 灣仔分店人潮不算多 好彩去到仲坐到最後一張吉位～🍜重慶麻酸辣米線 (豬軟骨、螺旋藻、魚腐）睇個Menu Design都真係以為黎左「老譚」😂湯底選擇、辣度選擇都神似 又係D湖南酸辣 雲南酸辣個D🤣辣度同樣分10小去到特辣 值得一提係佢嘅配料選擇多樣化過「老譚 」豬軟骨算大舊 但係肉質偏Hai 唔係軟熟型 味道無咩特別 螺旋藻反而不錯 爽口而且滲入左湯底嘅辣 至於個重慶麻辣湯底 個人覺得3小辣都唔算辣 感覺同係「老譚」食嘅10小差唔多 （純個人辣度口味）酸味十分淡 麻味多D 🦑麻辣墨魚頭 $32咁嘅價錢黎講 佢份量真係肉眼可見嘅少 但食落係不錯的 爽脆有口感 黏上麻辣紅油 如果份量多返D會更好 總結一句 好好食又稱不上 只係比譚仔好食同多選擇(溫提：食完都係超級口渴）不過蘿蔔青菜 各有所愛 Sa妹就較鍾情於雲桂香版嘅酸辣湯底～

Lunch time去見到門口好多人👭👨🏼‍🤝‍👨🏽不過都有大部分係外賣🥡所以唔算等太耐🫱🏻‍🫲🏼入到去就知啲遮遮好鬼快手😂出菜快 執枱都快💨唔怪得唔係等太耐~~📌佢嘅選擇同譚仔真係好似😂🔎🔎🔎但係味道同品質都有唔同！所以有佢優勝之處📍📖📌首先講下個重慶麻酸辣湯底佢最少都要叫2小辣我第一次就叫咗小辣覺得佢嘅辣都幾穩定 唔會每次叫辣度差好多同埋真係夠辣🌶叫咗豬大腸同腩肉🐽腩肉真係幾有驚喜🐷✨✨✨佢每塊肥瘦分布都唔錯🤲🏻最緊要係唔會散！又夠大塊😻豬大腸都大大塊 但係就唔算好入味👌🏻🐷夠厚肉 肥瘦適中 比例分布好好！😻😻📌豬大腸夠肥美又夠多📌魚肉春卷+酸辣湯底魚肉春卷又係份量好多！叫一個餸已經好夠飽味道都不錯😌呢個係酸辣湯底同譚仔最似就係佢😂😂味道直情一樣🤣📌過穚$60+$2(重慶麻酸辣湯底)呢個過穚個碗真係超大🤲🏻🤲🏻🤲🏻不過實際份量同譚差不多佢嘅餸菜都係同譚一樣但係覺得用料靚好多！！！同埋佢每樣餸嘅份量都平衡餐牌show有幾多就幾多唔會亂咁嚟😂一句總結嘅話就係啲用料靚過譚仔好多🥹湯底亦都正好多🥹📌豬軟骨+重慶麻酸辣湯底係一個$12嘅餸有兩大舊 份量都合理佢啲肉係好淋嗰種軟骨亦都唔會太硬不

未食過呢間米線 但米線關注組時不時有人講🤣今次黎到灣仔 就試下佢🤓好中意食米線 蕃茄湯底多數都係我嘅number 1🤣但今次想試新野 叫左個雲南湯底呢間野lunch time都幾多人架！坐爆曬 所以多數叫外賣算 🤣好彩離公司唔遠！翻到公司就慢慢享用啦🤓佢啲酸菜都幾好味 呢個雲南湯底都幾特別 但都係蕃茄湯好味啲 蕃茄愛好者係我🤣佢個膠袋都有九頭鳥嘅樣 好可愛想再試下佢其他湯底 應該都唔錯🫣如果多啲分店就好啦 🤓🤓

灣仔綜合譚仔同南記於一身既米線舖🍱九頭鳥米線地址: 灣仔莊士敦道191號有冇人好似我一樣 又鍾意食譚仔嘅酸辣湯底又鍾意食南記既魚肉春卷？！ 我強烈推介大家試下依間集兩樣嘢於一身！！！ 中環都有分店👍🏻又係灣仔精選，終於都有返堂食，平時午餐時間一定排隊堂食和外賣既九頭鳥終於係放工時間比我食到依間 🥸舖面坐嘅位置都算寬躺 比起譚同南舒服少少手機落單✊🏻叫左食物大概需要等大概3分鐘時間就上菜✊🏻豬大腸竹笙魚肉春卷雲南米線3小辣 $61首先講佢嘅雲南3小辣湯底，作為譚仔常客，我覺得這個湯底是比較辣但好過癮！但已經係雲南湯底最少辣，上次喺呢度都食過湖辣會比較啱唔係好食得辣嘅朋友🥵豬大腸滷得非常入味，竹笙非常𣺉身，魚肉春卷就拍得上南記個signature😬整體嚟講湯底比譚仔出色少少，配料方面正常發揮，推介魚肉春卷，適合貪心嘅米線控！5分滿分💛味道 4環境 3.5服務 3性價比 45分: 必食同會再食！4分: 可試，經開可能會再食3分: 要真係係公司或者屋企隔離先食2分: 不了吧1分: 回水唔該！

黎到灣仔想食平嘢，真心推薦呢一間九頭鳥米線，地方夠大，座位夠多，冷氣又夠。米線平均都係$40左右已經食到一個餸，真係超抵！風格有少少似譚仔！湯底有好多選擇！麻辣湯米線小辣轉薯粉魚肉春卷，送到黎嘅時候熱辣辣仲出緊煙！原來有五條勁多！魚肉春卷都幾彈牙同埋好大嚿！真係覺得好抵食！薯粉係粗薯粉咬口煙韌，可以一試！配料有好多芽菜青蔥同埋腐皮。麻辣湯小辣，入口唔算好辣，都有麻痹嘅感覺。重慶麻酸辣米線配牛肉2小辣，我個人覺得都幾酸唔算太辣，對比同一個辣度雲南酸辣感覺上好似辣少少。落單嘅時候米線揀爽啲！爽啲嘅米線好食好多！份量都幾多差少少食唔晒！牛肉大概有6塊，肉質唔韌都幾香牛肉味！蒜泥白肉（小）超多蒜！鍾意食蒜味嘅人真係要試吓，豬肉片大概有5-6塊，入口即溶，捲埋啲蒜一齊食真係好正。😋😋😋本身想飲豆漿但係佢冇晒，之後職員同我轉咗凍鴦，後尾發現原來餐牌冇嘅🙊🤣兩個人食都只係$118，真係好抵！仲要係好食嘅！

今日老婆出嚟接我收工推薦左呢間九頭鳥米線網上嘅群組已經好多人討論呢間地方夠晒大，星期六8:30左右去到唔使等位，差唔多滿座QR code自助落單都幾方便雲南酸辣2小辣配魚肉春卷$42，二小辣唔算太辣可以接受範圍，鍾意食辣嘅人可以試小辣或者以上。配料都幾多花生又夠多，單點一個餸最着數，因為魚肉春卷有五條，果皮炸得幾好，魚肉好香啖啖肉，必食推薦🔥🔥🔥四川麻辣2小辣配魚蛋$37，麻辣湯底2小辣唔係太辣，都係一樣鍾意食辣嘅人不妨嗌小辣，超多芽菜，正👍🏻魚蛋一個餸有六粒。老實講成碗野個感覺真係好似譚仔，但個人認為而家嘅譚仔好似冇以前咁好食，所以九頭鳥個湯底真係幾正。香辣墨魚頭$32，唔算好大碟，好有咬口又唔靭，配埋個香辣汁真係好正，必食推薦🔥🔥🔥一般來貨豆漿跟米線+$9，好多餐廳都係佢，味道都唔錯👍🏻👍🏻灣仔區呢個價錢仲要係好食真係冇得輸！總結：九頭鳥真係要黎食一次！魚肉春卷係必食冇得輸！❤️❤️❤️湯底同配料都好似以前嘅譚仔，因為而家嘅譚仔感覺上冇以前咁好食！不過風口位真係好凍！