瘋狂食雞機會嚟喇！日本人氣燒鳥店鳥貴族，香港首間分店已經進駐屯門，全城瞬間掀起食雞熱潮，磨拳擦掌準備去屯門食雞啦！即刻為大家搜羅屯門市中心多間出色雞肉料理，食勻日本菜、韓國菜、美國菜、泰國菜同火鍋，今次真係「雞！全部都係雞」呀。
香港首間分店開幕｜鳥貴族
喺日本擁有超過600間分店嘅鳥貴族，香港首間分店正式進駐屯門市廣場1樓啦！香港店特別由日本引入專用烤爐，菜單亦同日本本店一樣提供各式雞肉部位串燒—雞腿、雞胸、雞翼、雞皮、雞軟骨同雞內臟等，提供鹽味、醬汁同香辣3種口味揀。
鳥貴族一向主打平民價，嚟到香港價錢依然親民。菜單只有兩種價錢，快速餐牌同無酒精類飲品係$19.9，所有串燒類、特色菜、飯麵、甜品同酒精類飲品一律$29.9。廚房團隊早前更飛往日本本店，向日籍總廚學燒鳥技巧，確保將日本鳥貴族風味帶到香港。
鳥貴族首間香港分店正式進駐屯門啦！
菜單同日本本店一樣，提供各式雞肉部位串燒。
日本平民價天婦羅丼｜天丼てんや
屯門市中心有唔少日本過江龍，當中就有主打天婦羅丼飯嘅天丼てんや，用180度油溫即叫即炸天婦羅，夠晒薄脆。可能你以為天婦羅丼飯都係海鮮為主，其實呢度嘅華味鳥天婦羅好值得一試，係用九州養殖場雞隻，採用天然飼料無生長激素，以自然、健康而聞名。華味鳥天丼仲有隻溫泉蛋，將雞肉天婦羅同飯粒撈勻蛋漿食好正！
雞迷想瘋狂食九州雞肉天婦羅，都可以直接嗌碟華味鳥天婦羅，例如華味鳥雞丸天婦羅或者華味鳥雞肉天婦羅。
華味鳥天丼。戳開溫泉蛋，將雞肉天婦羅同飯粒撈勻蛋漿食好正！
華味鳥盛合。除咗有華味鳥雞肉、華味鳥雞寶天婦羅，仲有黑虎蝦、南瓜、紫菜、蓮藕、四季豆天婦羅㗎。盛合會配埋蕎麥麵，麵香襯托天婦羅更有層次。
海南走地文昌雞｜四季椰林海南椰子雞
冬天絕對係打邊爐季節！原來人氣椰子雞火鍋—四季椰林海南椰子雞登陸屯門市廣場啦。佢哋一直堅持「健康美味、真材實料」理念，嚟到一定要試主打嘅椰子雞火鍋，由食材至湯底都採用100%天然椰子水，保證「不加1滴水，4個椰子一鍋湯」嘅工藝，打造100％原汁原味嘅正宗椰子雞火鍋。
另外，當然唔少得今次主角—正宗海南走地文昌雞，真係肥瘦適中，鮮美嫩滑又夠雞味。成個湯底一啲都唔油膩，打邊爐之前一定要飲啖清甜雞湯先！
經典歡聚4人餐。包括一份椰子湯底、原隻海南文昌雞，以及多款火鍋配料，CP值高。
椰子雞火鍋湯底。堅持「不加1滴水，4個椰子一鍋湯」工藝，打造100％原汁原味。
唯美韓系｜반찬앤쿡 Banchan and COOK
韓國炸雞出名又脆又嫩，屯門市廣場2樓近FOODMAZE位置就有間靚靚韓國菜啦。木系大自然裝潢有好多打卡位，絕對可以邊食邊打卡。呢度嘅無骨炸雞有兩款口味，甜辣炸雞微甜帶辣勁，風味濃郁；柑橘炸雞就有清新果香，酸甜爽口有層次。
另一雞迷必食，係融合韓式同西式風味嘅雞扒泡菜奶油燉飯，雞扒煎到酥脆多汁又有泡菜酸辣味，加埋濃郁滑順嘅奶油燉飯好滿足。
甜辣拼柑橘無骨炸雞。甜辣炸雞裹滿微甜帶辣醬汁，風味濃郁；柑橘炸雞充滿清新果香，酸甜爽口有層次。
雞扒泡菜奶油燉飯。雞扒煎得香脆滑嫩，啖啖juicy，配埋帶有辛辣感嘅泡菜奶油，令人食唔停口！
韓國過江龍薄餅｜Pizza Maru
屯門市廣場2樓仲有間韓國人氣薄餅Pizza Maru，食到炸雞同時仲可以品嚐各款pizza。推薦各位雞迷試吓薯角炭燒雞肉芝加哥，炭燒雞同脆薯角份量好多！批邊鋪滿糖霜同蜜糖杏仁片，增添口感，再配上三重芝士做出超級拉絲瀑布效果！
追求雙重口感嘅話，另一款蒜香牛油炸雞薄餅就啱晒喇。薄餅鋪滿蒜香脆雞粒，黑芝麻曲奇批邊又有獨特鬆化口感，撞上慕絲咁幼滑嘅蕃薯蓉一脆一綿好過癮。
薯角炭燒雞肉芝加哥。批邊鋪滿糖霜同蜜糖杏仁片，增添口感，再配上三重芝士做出超級拉絲瀑布效果！
（左）蒜香牛油炸雞薄餅。薄餅鋪滿蒜香脆雞粒，黑芝麻曲奇批邊又有獨特鬆化口感。（後）蒜香甜辣炸雞配炸蓮藕片。微甜嘅蒜香甜辣醬唔會辣，配埋爽口炸蓮藕片仲有雙重口感。
火山石焗爐｜California Pizza Kitchen
睇嚟薄餅界都有食雞熱潮！嚟自美國嘅California Pizza Kitchen都有多款雞料理㗎。店內特設火山石製焗爐，均勻高溫焗出外脆內軟香噴噴薄餅。佢哋嘅原味燒烤雞肉薄餅就係經典之一，烤雞肉裹滿濃郁秘製燒烤醬，再加埋低脂芝士，卡路里大減25%！
除咗薄餅，墨西哥特色雞肉菠菜闊麵都係推介之選。闊麵掛滿獨特嘅青檸墨西哥辣椒忌廉汁，加埋啖啖嫩雞肉、新鮮菠菜充滿異國風味。
原味燒烤雞肉薄餅。以火山石製焗爐高溫焗出酥脆批底，烤雞肉更裹滿濃郁秘製燒烤醬。
墨西哥特色雞肉菠菜闊麵。青檸墨西哥辣椒忌廉汁配搭啖啖嫩雞肉，好有異國風味。
新派泰菜｜Bamboo Thai
以上咁多雞肉料理都係又炸又焗？呢間新派泰菜Bamboo Thai就有椰子雞湯畀大家滋潤吓啦。利用清甜椰子、嫩滑雞肉熬出乳白色湯底，味道濃郁、湯身順滑，每啖都飲到椰香同雞肉鮮味，冬天咁乾燥真係要飲多兩碗呀。
嚟自清邁嘅泰北咖喱雞腿金麵，好啱各位濃味控！蛋麵掛滿惹味咖喱湯汁，真係會忍唔住大大啖麵咁食，加埋隻厚肉肥美雞髀好有幸福感。
椰子雞湯。以清甜椰子、嫩滑雞肉熬出乳白色湯底，相當滋潤。
（左）椰子雞湯。（中）泰北咖喱雞腿金麵。蛋麵掛滿惹味咖喱湯汁，加埋隻厚肉肥美雞髀好有幸福感。（右）泰式海南手撕雞。手撕雞肉質嫩滑，配埋紅蘿蔔、洋蔥、九層塔、青木瓜等，酸酸辣辣好開胃。
搵食仲可以搵埋著數！
即日起至2025年2月9日期間，嚟屯門市廣場指定食肆消費即獲賞印花。集齊指定數量印花，可以換領「S現金券」同「HK$100 AEON禮券」㗎。食得愈多、賞得愈多，快啲約埋朋友一齊嚟開餐啦！
