Mokumoku Yakiton (永光商業大廈)

受到疫情的影響下，多間食肆都比較主張做外賣為主，連串燒居酒屋都做外賣仲有八折添，可能真的可以殺出一條血路，不過因為不能去旅行的我還是喜歡堂食，因為可以跟朋友把酒言歡，今次跟朋友開懷食返餐正宗日式居酒屋當係去了日本遊玩。頭盤蒜子蕃茄沙律(酸甜醒胃)，再來Mokumoku 沙律(為邪惡的肉串前席墊一墊胃，感覺清新)，七味燒魚翅(外脆內軟，魚味濃)，汁燒豬肝(有別於一般的豬膶，味道甘甜和香)，網油豬腦卷(第一次食豬腦，質感有點像豬腸，但油香味較重)，日本青椒芝士豬肉卷(肉包菜，邪惡得來又新鮮)，豬顎骨肉串和西班牙黑豚肩肉串(濃濃的豬肉香，配上新鮮檸檬汁和柚子胡椒非常夾，美味非常)，雞翼串(雞翼控必點，外脆內裡充滿肉汁，好食)，椰子雪糕作最後的甜品，濃郁的椰子味為口腔作最後的點綴。…Read More

今晚同一大班同事放工黎到位於公司附近的這間餐廳，這間餐廳主要係食豬的，所以很多裝飾都同豬有關，很可愛！餐廳除了有主要的豬食，還有牛、海鮮等，唔駛怕淨係得豬食！京姬蘋果酒($65)，冇諗過呢隻酒會係清甜既蘋果味較多，沒有太大的酒味，非常易入口，岩哂女仔飲！豬肝串($28)，口感有點像豬潤，有少少豬的腥味，但醬汁甜甜的，加上胡椒粉同燒過，所以味道惹味！網油豬腦卷($38)，冇諗過會把豬腦用網油包實了，所以唔會好似出面打邊爐一個成個腦在面前，看上去一點都不像豬腦，像腸仔較多！一咬開網油豬腦漿便會噴出！這個卷還用上櫻花蝦和蔥花，所以口感很特別！燒帆立貝($148)，帆立貝大粒厚肉鮮甜，一粒切開4份都仲係好大粒，帶子裙邊爽口！豬心串($28)，豬心爽口，口感有點像牛脷！用上胡椒及秘製醬汁燒，味道一流！總括黎講，第一次食咁多豬既內藏，冇想像中咁難入口，而且惹味！…Read More

平時食串燒通常都係食牛多，今次朋友介紹嚟依間專食豬串燒既鋪頭又幾特別幾吸引，一於就嚟試下望住menu都一頭霧水唯有叫侍應介紹依到服務一流，基本上你抬起頭，手都未舉，已經會有侍應走嚟問有咩幫手侍應好有耐性咁介紹下有咩特別，最後都交左比佢幫我地話事見隔離枱既客人都會不時問侍應意見熟悉自己鋪頭食物既侍應真係加好多分最怕揀唔到食咩既時候，問侍應有咩介紹既時候，佢地乜都答唔知:(依間餐廳既侍應都訓練有素，好稱職好多酒揀，好居酒屋feel餐具都係簡約日本風嗌左兩杯嘢飲：一杯乳酸梳打同一杯乳酸汽酒依到好細心，有個耙用嚟整啲串燒出嚟先食啲前菜同蔬菜前菜係一個凍蕃茄🍅食落去好清新既感覺:)不過我唔係好鐘意食蕃茄，所以交左比朋友負責雖然我係港孩，唔係好鐘意綠色既嘢，但依到有塊肉包住，易啲放入我依啲食肉獸既口入面侍應介紹左三款：日本青椒仔($28)、蒜芯豬肉卷($32)同韮菜泡菜卷三樣入面我最鐘意韮菜泡菜卷帶微微既辣，幾惹味平時好憎食青椒，但日本青椒仔既青椒味唔算好濃有陣炭燒既味道:)我咁偏食都食到一舊食完菜就到肉網油豬腦卷($38)唔覺意食左朋友個腦入口，有啲唔好意思添🥺不過又幾好食處理得好好，唔會嗰啲好臭既內臟味質感好得意西班牙夾心肉($38)西班牙黑豚豬頸肉串($38)豬腩骨肉($32)食落比較爽同有口感好味燒秋刀魚($298)好嫩滑，燒得好好味日本蕃薯仔($28)好甜啊白金豚味噌火鍋($388)全晚覺得最好食就係依個鍋🤩依個鍋用料好豐富，除左有白金豚外，仲有牛腸豬腸芽菜韮菜粟米冬菇等等🤤食食下都同朋友講，如果有個白飯就一流講返個鍋先，湯底好濃味白金豚肥瘦均勻，食落好嫩滑好少食到咁好味既豚肉😭侍應話牛腸同豬腸要後期食，因為耐啲會入味啲聽話既乖寶寶就有好東西食真係好入味好好味啲蔬菜吸左啲湯都好好食依個鍋份量好多，多啲人一齊share既話就可以試到多啲嘢銅鑼灣串燒店嚟講，價錢正常，唔算特別貴:)環境令人坐得好舒服咬住串燒，飲下嘢，同朋友吹下水，咁就一晚最後，不得不提多次，侍應既知識同服務都好值得一讚…Read More

美藉老朋友來港遊玩數天，飲食節目全交托小肥安排，其中一晚細佬就帶咗佢去自覺為全年最值得返撻o既新店「Mokumoku Yakiton」。XO仔於一個月內重返，就連店員都認得出，估唔到店內咁快又增添咗唔少新o既豬仔擺設，咁當然係要影多幾幅相啦！適逢週四「Mokumoku 日」，女伴可免費享用指定酒品一杯，嘻嘻，經理哥哥為答謝小弟咁捧場，仲好客氣咁請哂頭輪兩杯啤酒添！見第一次幫襯時冇影到圍繞著開放式廚房排吧位，今次就補影返兩張，務求要與各大讀者分享。蒜子蕃茄沙律（$28）：第一道令細佬要再食o既就係已去皮o既蕃茄前菜。第二次再食，蕃茄都依然鮮紅爽潤，連友人都話個生蒜調味夾得好有驚喜，冇介紹錯！網油豬腦卷（$38）：另外一味要安哥o既就係初次食後仍念念不忘o既網油豬腦卷！起初女伴都超級抗拒，但聽過小肥形容得如何美味，結果就親身食埋；靚女話冇諗過豬腦可以咁滑溜油潤，最重要係個質感同個豬腦樣差異太大，完全食唔到腦部入面o既線條，頂面以香脆o既炸蒜片點綴先精彩，仲興奮到要即場po上網同全世界分享添！白金豚林檎紅薑卷（$34）：如果唔係經理哥哥推介，相信小肥都未必會試，因為未聽過「林檎」，又唔係太薑得。。。原來「林檎」係蘋果，師傅以白金豚肉包住一片蘋果，燒煮後再喺面加上白色o既薑汁。意外地，卷物o既豚肉外層薄而不溜，個薑汁蘋果組合更加係清爽醒胃，越食越想食。白金豚肉露筍卷（$32）：四款白金豚肉卷物全部都係以白金豚肉所包製，只有中間o既餡料不同。第二串露筍卷最為脆卜卜，既芬芳又清新。白金豚肉韮菜泡菜卷（$32）：第三串白金豚肉卷o既韮菜味比泡菜味濃厚，極之芳香，蘋果卷屬清爽開胃，韮菜泡菜卷則屬香脆惹味之列。（其實食時都冇諗住上載，所以啲相就影得求祈咗少少，還望大家見諒。。。）白金豚肉紫蘇卷（$32）：靚靚媽咪成日都話XO仔身體太多毒素，食紫蘇葉有助化解，心中想起媽媽了，所以就叫咗黎食。紫蘇卷o既紫蘇香可謂清麗脫俗，質感雖未唔算太過脆口，但其香氣慢慢滲進鼻腔，極為醒神。豬腩骨肉（$32）：人家為燒豚肉之王喎，咁就梗係要試多幾款上次冇試到o既款式啦！豬腩骨肉鬆軟潤甜且肉汁豐厚，塗面o既芥辣汁香得黎只屬微辣，非常協調。豬顎骨肉串（$38）：豬顎骨肉咬落比豬腩骨肉有嚼口，腍身中帶點韌度，而且肉味更濃，勁啱細佬口味！免治豬肉釀冬菇（$28）：記得細細個o既時候，媽咪最愛煮免治豬肉釀冬菇俾小肥帶返學校食晏，故對此味菜式情意結極深厚。「Mokumoku」出品o既免治豬肉釀冬菇並無一絲令人失望，反而令小弟尋回不少兒時味蕾o既記憶。外層燒冬菇鬆爽多汁，釀入o既免治豬肉更加係嫩脆甜美，真頭好味到要搵味吉陽一彈跳一番呀！一藏豚骨湯拉麵（$68）：燒肉店每日賣得最多就係豬，相信所剩下o既豬骨都唔會少得去邊，眼見餐牌上有豚骨湯拉麵喎，心諗個豚骨湯一定好足料。豬骨湯底濃而不俗，拉麵麵條煙韌有彈性，簡單混有筍條、蔥絲、碎蔥、紫菜及木耳絲足以令口感香脆豐潤。每逢有外國朋友訪港，佢地例必話要試新店，豬年未到，XO仔就遇上燒豬專門店「Mokumoku Yakiton」，月內先重複光顧，新舊菜式都試咗成二十幾款。因深覺環境可愛，服務周到，又夠氣氛，燒豚肉及內臟確真高質美味又抵食，絕對值得支持，下週即約同幾位美女再玩週四晚「Mokumoku 日」添；嘩卡卡，因為女仕們大多都唔飲，佢地免費嗰round咪益哂小肥囉！…Read More

環境4分：日式居酒屋格局，成層咁大，又有吧位，夠casual，四周圍放滿豬仔公仔， 有毛公仔有cushion有玻璃擺設， 男女老少都睇得開心，可以畀四分。衛生5分：雖然個燒爐同廚房响吧位後面，但間舖都一Ｄ都冇好煙，抽氣好。枱面有個鐵桶放竹籤。又可以用個豬耙嚟將D串燒上面嘅食物分開，唔使整到成個嘴都係，絕對係有心思，衛生可以畀五分。服務4分：服務員都好後生下，識得主動介紹招牌菜，又會成日替換Ｄ污漕碟，可以畀四分。味道5分：1)      個蒜子蕃茄沙律好鮮甜，果Ｄ生蒜香得完全唔辣，真真好好食。2)      雞翼燒得好香，雞皮燒到脆卜卜，完全唔油。3)      牛舌都算厚身，完全唔會覺得韌，好爽下。4)      串網油豬腦卷又圓又油，灑响面Ｄ炸蒜片超嘢味，係正到嚇死人果隻！5)      白鱔串一上枱即刻聞到魚香味，絕對稱得上外脆內軟，D魚皮燒到脆卜卜，絕對忍唔住要encore。6)      白金豚肉露筍卷，露筍出面包住薄薄嘅豬肉片，燒得好香，食落唔過油膩。7)      燒秋刀魚原條上枱，仲長過隻手掌，呢個係屬於是日推介，因為係季節性，所以條秋刀魚好肥美，慢慢燒得好香。8)      燒羊架有成個拳頭咁大，唔似出面食到薄薄咁一片，唔算好騷但有羊味，都算係juicy果種。9)      豬小腸串有五粒粉腸，軟軟地淋淋地同粉粉地，同食開果Ｄ唔係好一樣。10)  豬大腸串有六個豬腸圈，燒得好爽，唔押。11)  白金豚肉秋葵卷，秋葵外面包住薄薄嘅豬肉，同露筍豬肉卷差唔多，一樣又香又好味。12)  白金豚肉茗荷卷好香豬肉味，中間個茗荷脆脆地，又唔油。白金豚肉韮菜泡菜卷呢就一Ｄ都唔辣，個韮菜味好出好濃烈。13)  一藏豚骨湯拉麵Ｄ麵好爽，個湯底非常濃郁，好有豬骨味，唔覺唔覺可以飲曬成碗湯。14)  明太子燒飯團，外邊有層紫菜包住，燒到外面好脆 ，入面都算幾多明太子，呢個飯團食完都幾飽肚下。抵食4分：輕鬆日式居酒屋環境，同周圍好多豬仔公仔，得意可愛無比，D串燒用心機制做，慢工出細貨，可以畀四分。…Read More

週一與契妹於百貨公司血拼後，兩口子就去咗附近一幢食廈覓食，誤打誤撞咁發現咗間新開只有幾個月o既「Mokumoku Yakiton」。餐店以日式燒豬肉「焼豚」（日語拼音即「Yakiton」）起名，明顯為日式燒豬專門店。牆上掛有大大幅金豬解剖圖，簡單到題。店內用上多隻可愛o既豬仔擺設作裝飾，直令氣氛更為輕鬆。當中最搞笑就係木櫈上o既粉紅色豬仔咕臣，見到都想攬住唔放。嘻嘻，單拖黎食都唔洗怕孤單，因為可以搵小豬作伴嘛！用餐大堂一眼望哂，散座全為二至多人合併式枱櫈。架上曬出多款日本清酒。唔好嘥時間，睇餐牌前先睇睇兩頁酒牌。眼見頭頂有塊咁誘人o既生啤布喎。。。嘩哈哈，當然係要先啤一啤佢啦！單點項目共有十頁之多，二人決意主攻招牌燒白金豚所製出之菜式。另外牆上亦有黑板寫出多款是日推介美食。蒜子蕃茄沙律（$28）：原本週一為細佬放自己菜假o既日子，但眼見已去皮o既蕃茄實在鮮紅吸引，所以就忍唔住要試一試。嘩，蕃茄濕潤軟腍，估唔到以蒜子調味會惹味得咁夾，小肥食完一件又一件，契妹見到都嚇咗一跳。刺身盛合五款（$298）：五色刺身拼盤包有油甘魚、帶子、三文魚、赤蝦、海膽，色澤鮮美奪目，而且新鮮美味。油甘魚肥美爽口。玫瑰花形o既帶子白滑軟嫩。個人最愛必選爽厚潤滑、鮮甜無比o既赤蝦。豬肝暮斯（$68）：意外地，姐姐仔極力推介o既豬肝多士完全唔乾唔嚡。豬肝食落香濃軟滑，配以芝士蕃茄多士可一解膩口，掂呀！鹿兒島黑毛和牛（$498）：呈三成熟o既A5和牛份量真係足，煮熟後先由師傅預先切好，方便貴客享用。粉紅色o既黑毛和牛肉質軟腍，食落唔會成口油，肉香豐厚，只用上椒鹽調味已經超好味！月見免治豚肉串（$58）：所謂「月見」即為鮮黃亮澤之日本生蛋黃，因打出黎唔爛的話就好似圓月般。免治豚肉串本身嫩脆香口，撈點埋蛋黃豉油食用則能增添香滑，冇得頂呀！白金豚肉茗荷卷（$34）：點菜及上枱時，姐姐仔同哥哥仔都分別解釋「茗荷」其實係薑o既頂尖位，非常細心。串燒以白金豚肉包住茗荷燒出，卷物外軟內爽脆，但一啲都冇薑o既辣味，極為清新。食到一半，XO仔終於忍唔住，要問一問姐姐仔餐桌上貌似豬八戒專用o既九齒釘耙究竟係咩黎o既。。。哈，原來個耙係用黎拉出串燒料o既，又幾得意喎:)！豬大腸串（$34）：炸大腸就食得多，串燒豬大腸都係第一次食，個人覺得兩者可以話係不相百仲。串燒豬大腸外表香脆，內裡軟潤，不用多點醬汁已覺惹味。豬喉軟骨串（$34）：如下圖所示，店員又一推介之豬喉軟骨串真係好薄身。豬喉軟骨雖然好薄，但係咬落卻係脆卜卜，同雞軟骨真係有得fight！上等豬脷串（$38）：豬脷爽薄脆口，惹味非常。網油豬腦卷（$38）：相信契妹都會認同，整頓晚餐o既高潮位就係串網油豬腦卷！圓碌碌o既兩球網油豬腦卷擺咗一陣先食都仲好熱辣辣。入口前以為會成pat腦漿咁，但點知其質感油潤滑溜，絲毫乾嚡或血腥味都冇，鮮香細膩得齒頰留香，爆！豬肝串（$28）：普通食豬肝都會覺得嚡嚡地，真係冇諗到串燒豬肝居然可以外脆內軟嫩，唔乾之餘仲帶點油潤，實在太有驚喜啦！白金豚豬腩串（$48）：食親串燒，豬腩串一向都有信心o既保證，此串白金豚豬腩亦冇帶黎失望，豬腩鬆爽且肉汁豐盛，冇得彈。芝士年糕（$48）：契妹最愛o既芝士年糕皮脆乾巧，芝心柔軟潤甜:)，一樣冇失拖！狗年過咗一半，當中都去過不少新開o既食肆，不過要講得上有驚喜就真係要數「Mokumoku Yakiton」。燒豬專門店四周都有可愛o既小豬陪伴，氣氛輕鬆，年輕o既服務生個個都咁風趣友善，最緊要係多款燒豚肉及內臟o既菜式價廉物美，質素可謂非凡，第一次嚐過網油豬腦卷、白金豚肉茗荷卷及串燒豬肝後，包保大家同XO仔一樣會食過返尋味！當然啦，如果餐店推出歡樂時光優惠，相信要晚晚爆場並非難事。…Read More

阿妹食嘢一向都很刁鑽和有要求，今天為了慶祝自己的專科考試合格;特意叫埋我去食晚飯，又話一定給我一個驚喜。原來這間餐館位於銅鑼灣區， 新開張不久！店內裝潢以木系為主題，和風十足，牆架放滿清酒和梅酒，入到去感覺很悠閒和舒服,好有日本居酒屋風格。這間Mokumoku 主打是食豬。換句說話即是有些豬的特别部分也有得食，如猪心、肝、腎、腰、腸、脷，甚至豬腦亦可以有機會品嚐;卽時嚇了我一跳。而廚師以串燒形式烹調以供客人品嚐。首先頭盤來一個清新蒜子蕃茄沙律 ($28)蕃茄大大個很厚肉，爽口多汁和非常新鮮，配埋蒜子、青蔥同和風汁，入口甜甜酸酸，好醒胃。 豬肝慕斯 ($68)煙燻左的豬肝非常甘香，夠入味又不會太鹹，以醃漬蔔蘿和芝士一齊吃食落爽脆。車厘茄可中和膩感，配伴埋梳打餅，鬆脆可口，味道一流。刺身盛 (5kinds)($298)帶子圓渾飽滿 , 赤蝦都好彈牙爽口;三文魚, 油甘魚油脂豐富入口軟腍。平時很少食海膽的我今次見到它很有光澤和新鮮, 於是以青瓜片一齊吃，有入口即溶既感覺, 好滑溜鮮甜。Iberico 火腿 ($98/30g)火腿是選用西班牙南部嘅黑毛豬，製成火腿後經過長時間的風乾過程，所以未食就已經聞到濃郁的鹹香味。 再以燒熱了的餐具盛載，能令火腿持續釋放更多油脂和甘香。網油豬腦卷 ($38)豬腦卷外表像粒墨魚丸，色澤雪白。咬落質感軟綿綿，非常嫩滑;加上一層薄薄的豬網油包裹，食落甘香，配埋鬆脆芳香的櫻花蝦，增加味道層次。時令海鮮喜知次($580)最後職員推介了日本出產的燒風乾喜知次。它是日本最矜貴的一種魚，風乾後才燒;令魚的鮮味更加突出和肉質更嫩滑。整體而言，餐館職員態度很友善和親切，亦很細心地為我們介紹食物特色，盡顯廚師心思和高質食物新穎高質。…Read More

「Mokumoku Yakiton」是新開的和食居酒屋，主打豚肉串燒美食。店內擺設呼應餐廳的招牌美食，四處也能找到小豬的芳蹤。在店中的當眼位置，掛了一塊「豬牌」，介紹豬肉不同的部位，只可惜小編不懂日文，未能領略箇中意思。 來到居酒屋當然要「飲番兩杯」！「作 惠乃智 純米吟釀」是店員的推介。雖然清酒未達大吟釀級別 (精米步合 60%)，但無礙濃甜酒意的發揮，十分容易入口。在品酒的末段，甜意稍減，酸味介入，予人一種類近氣酒的體驗。一連兩道沙律作前菜，「蒜子蕃茄沙律」以清甜多汁的嫩茄入饌，本已吸引。面上多加惹味的蒜蓉，更是錦上添花。 「MokuMoku 沙律」以店名定名，予人一份期待。沙律主要以不同的雜蔬為本，再引入多款爽口的瓜菜片，最後追加少量鹹香火腿作點綴。如覺得單是火腿未足夠豐富雜蔬沙律的味道，不妨添加數滴意大利黑醋調味，既富效果又健康。「豬肝慕絲」的鋪排有點像法式的鵝肝凍糕。這個做法的好處是能保持豬肝的原汁原味，好待大家集中品評其濃滑的滋味。吃時把整件豬肝慕絲一次過送於口中，能最有效體驗菜式的層次感。 「巴爾馬火腿」在西班牙餐廳十分常見，在和食店則比較少有。熟成了三年的火腿呈穏健的酒紅色，味道香而不膩。廚師特以以燒熱了的餐具盛載，能持續誘發火腿釋放更多油脂，令成品更甘香。「刺身盛合五款」內含赤蝦、油甘魚、海膽、三文魚及帆立貝五款刺身。整體而言，各刺身的品質賣相皆只屬一般，當中以帆立貝最為對辦。倘若同時兼顧刺身串燒有困難，建議集中資源做好串燒部份，這才是居酒屋的重點項目呀！ 吃畢冷盤刺身，總要吃點熱食暖暖胃，滾熱的關東煮是不錯的選擇。這份「沖繩豬手及牛筋味噌煮」，豬手做得十分軟腍入味，與牛筋同吃膠原質感雙重享受，很美味。「豬大腸、蒟蒻及日本蘿蔔味噌煮」也討人喜歡，尤其是日本蘿蔔，本質清甜，吸滿味濃及泛似柱喉腩汁的味噌汁後，風味十足。豬內臟串燒屬餐廳的「拿手」美食，雖然小編不嗜內臟，但入到寶山總要拿走一些寶物。「豬肝串」擁有獨突濃香的味道；「豬心串」則擁有軟彈的口感。與「上等豬脷串」比較，豬脷口感更為爽實。 「網油豬腦卷」以網油薄膜包裹豬腦炙燒，軟滑漏油。小試一件尚可，多吃還是覺得重口味。其餘不同的部位也可製成串燒：- 蘋果與豚肉一向是好朋友，同場出現往往能收事半功倍之效。「鹿兒島產豬肉林檎紅薑卷」就是應用了這段關係，味道甜爽甘香，並洋溢微微的薑汁辛辣，層次豐富。 「鹿兒島產豬肉蘆筍卷」是常見的豚肉卷物。「牛油果伴芝士」同樣經過炙燒處理，去皮後留下甜軟的果肉及半溶的芝士慢慢品嚐。牛油果面上放滿木魚絲，為菜式增添動感及一份和風味道。 「雞較軟骨」一向屬小編喜愛的串燒款式，脆卜卜送酒一流！「一藏豚骨湯拉麵」是喜出望外的作品，豚骨湯底濃滑稠厚，味道相當好，配搭煙韌的麵條，讚！以「椰子雪葩」作甜品，椰子味道清香，質感比一般雪葩「蓬鬆」，都幾好味！ 居酒屋為數不少，但以豚肉作主打食材的居酒屋則比較少有。在「Mokumoku Yakiton」享用飯餐，能一次過品評不同地方及不同部位的豚肉，再加上那碗富驚喜的拉麵，值得試試！ …Read More