韓國人氣女團BLACKPINK即將於1月24至26日強勢登陸啟德開Show，BLINK們 (블링크) 梗係要睇定場館附近有咩應援同美食，演唱會前後都食飽飽，完美享受幾日High爆嘅Good Show！
BLACKPINK演唱會美食攻略
► 應援主題餐點 |
圖：商場(FB)
應援主題餐點
BLINK應援雪糕 Dayvi Gelateria
圖：餐廳(IG)、ortatatatatata
由香港BLINK (블링크) 發起嘅第三站應援嚟到啟德喇！即日起至1月25日嚟呢間意式雪糕店，可以買到「BLINK’S PICK Gelato」，以黑芝麻同士多啤梨雪糕做返主題顏色，做齊指定動作仲可以即場換領1張BLACKPINK偶像卡 (隨機1款)或、精美檔案或磁石留念。禮物數量有限，送完即止，BLINK們捉緊時間呀～
粉墨可可脆脆冰沙 四面泰泰式火鍋
圖：餐廳(IG)、nikiwong0214
餐廳都為BLACKPINK應援！位於場館附近嘅泰式火鍋餐廳，即日起用餐時出示一張BLACKPINK香港站1月24-26日演唱會門票，即可享$28優惠價order「粉墨可可脆脆冰沙」特飲!!每張門票限兌換一次，數量有限，售完即止。另外1月23日11:59pm前參與為BLINKS而設嘅遊戲，有機會贏取：1月24至26日期間去啟德店消費，免費獲取一杯粉墨可可脆脆冰沙及全單85折 (名額總共5個)！
Pink Meets Black DJ 星空派對 Jin Bo Law
演唱會場館旁邊一間酒店嘅空中酒吧，喺1月24日晚上9時至凌晨12時期間舉辦「Pink Meets Black」DJ派對，伴隨DJ Hyphen打碟勁播嘅一連串K-pop Remix，大家可以盡情舞動，延續演唱會澎湃節奏同震撼氣氛。3小時無限暢飲套餐包括韓式燒酒、白酒、紅酒、汽泡酒、烈酒、啤酒、汽水同果汁之外，仲有串燒拼盤一份。留意持有當日BLACKPINK演唱會門票可享9折優惠。
啟德主場館餐廳
休閒概念咖啡店 Cafe by Lubuds
圖：場地 (官網)
演唱會場館內有兩間餐廳，呢間休閒概念咖啡店座位舒適，有陽光透入，好啱入場前喺度飲杯咖啡、特色水果茶配自製烘焙品，或窩夫、芝士蛋糕同曲奇放鬆一下，迎接令人期待嘅K-pop之夜！
亞洲最長運動酒吧之一 The Champion Sports Bar & Bites
圖：場地 (官網)、or#tm68033261
另一間餐廳係亞洲最長運動酒吧之一，擁有震撼嘅100米長吧台，仲獨有啟德主場館景致，嚟開餐更加有Feel～餐單行西式風味，扒類、海鮮、啤酒等等，周日仲有豐富嘅半自助餐㗎！
啟德體藝館特別安排
為配合啟德體藝館舉行活動，2026年1月23至25日以下店鋪於活動期間將暫時無法通行：
日期時間：
2026年1月23日 13:30 - 22:30
2026年1月24及25日 09:30 - 22:30
相關店舖：
吃茶三千（A-007, G樓, 啟德體藝館）
Enjoy Appolo（A-005, G樓, 啟德體藝館）
倆仨杯（A-004A, G樓, 啟德體藝館）
Subway（A-002, G樓, 啟德體藝館）
土瓜灣美食+宵夜推介
人氣手工漢堡 SHADI
圖：如果早少少完場，可以試呢間區內人氣手工漢堡店，標榜牛肉、羊肉、蝦同雞肉都係自家店內剁碎，每款都係即點即製熱辣辣。最受歡迎嘅100%安格斯牛肉漢堡，醬汁帶黑椒風味，令juicy嘅漢堡扒更惹味，而且同雞堡、羊堡都可以揀雙層，男士都一定食得飽～另外7吋純牛肉腸熱狗、6吋手工薄餅同沙威瑪捲都唔少人試㗎。
街坊通宵茶居 慶發飯店
圖：區內屹立多年嘅小店，唔少人會嚟飲夜茶，亦係凌晨收工補充元氣嘅選擇。幾十款大眾口味嘅點心都有供應，包括水晶蝦餃、奄春蛋燒賣、香芋鴨腳扎、馬拉糕等等。如果要飽肚又特別，可以試試鳳凰煎米雞，即係將糯米雞沾上蛋液再煎香，比平時蒸熱嘅做法香口得多。
白種元大讚街坊茶記 陽光餐廳
圖：9heatogetherfoodie、Redbean45
韓國餐飲界名廚白種元，早年嚟香港拍片時曾探索土瓜灣嘅街坊店，一度令呢間茶記登上熱搜！餐廳24小時營業，除咗供一般茶記有嘅炒粉麵飯，亦有唔少海鮮料理、煲仔菜等大排檔風味菜式，如椒鹽魷魚、蒜蓉粉絲蒸扇貝、炸蠔餅等，幾配合「隨性」嘅環境。
粵式小菜館 富和飯店
圖：如果真係好肚餓，呢間遠啲嘅粵式小菜館仲可以食到雞煲，而且營業至凌晨3am，唔使急急腳咁食。呢度嘅菜式都有大排檔風味，香噴噴嘅雞煲有二至四人套餐，配埋肥牛、紅薯粉等都好豐富。如果想食小菜，惹味嘅蜜糖牛柳粒、椒鹽粟米、小炒皇等都好啱佐酒。
人氣「大牌檔」 楚撚記大排檔
圖：想坐得舒服啲嘅話，亦可以試呢間主打大牌檔菜式嘅人氣餐廳。拔絲焦糖香燒脆腩仔以傳統拔絲圍繞脆腩仔，賣相好啱打卡，一齊食鹹鹹甜甜幾特別。另外香煎黑松露手打蓮藕墨魚餅、香濃南乳粗齋煲、炸大腸都邪惡得嚟有特色。
文：Cathy
