嚟到2017年頭，繼續同大家報榜！睇一睇個榜，1月似乎比較多人鍾意食西餐同甜品，而10間餐廳入面，有4間都係位於荃灣嘅，睇嚟，荃灣已經慢慢成為其中一個食好西嘅集中地喇！
第10位 Vision 8（*新上榜）
呢間西餐廳舖位細細der但頗有格調，食物水準亦都保持得幾好，但原來佢係位於荃灣一條街仔，左右隔籬分別係舊式大廈入口同米線舖。黑松露菌薄餅幾乎係每枱嘅必食之物，餅底厚身而香脆，黑松露味幾香口，唔使太多其他調味都好夠味。
第9位 京林屋
開業一年多啲嘅銅鑼灣嘅日本抹茶老店，第二次入榜。選擇幾多，想要主食嘅可以點抹茶蕎麥麵，麵質冰涼彈牙，細心食會食到微微嘅抹茶味。想食甜品嘅，梗係有抹茶啦，雪糕、芭菲等等都有，但如果你已經試過呢度嘅抹茶，建議下次可試焙茶，焙茶卷蛋嘅茶味同樣香濃。
圖：MelodyWong5016、hkeateriespot
第8位 麻辣串串香（*新上榜）
又係荃灣嘅舖啊，而且呢間個位唔喺巿中心，要兜入街口轉角先搵到，但好食嘅話專誠搵路拜訪又有乜所謂？嗜辣者一定要嚟挑機佢碗麻辣燙，雞柳、金錢肚、水餃、薯粉等等全部都索晒啲辣汁，啖啖都咁刺激！但又唔會一味得個辣字，用料都唔差，薯粉夠彈牙。另外要介紹燒茄子，加埋蒜蓉同肉碎同特製醬汁，好香！
第7位 阿來泰式地道風味
泰國餐廳通常都有金邊粉食，呢間都有，但呢度嘅金邊粉特別在於用蛋整咗個網嚟包住啲粉，而粉嘅濕度亦剛好，唔會太濕或者太乾。生蝦刺身都好吸引，好大隻啊，點埋酸辣汁食，層次感多咗之餘亦都食得到原本嘅鮮味，會食到停唔到口。
元朗嘅burger店，好大份好足料嗰間呀，又入榜喇！呢個阿拉斯加特大魚堡，條魚柳長到突晒出嚟嘅呢，大家應該都唔會陌生。餐廳另外仲有Pepper Dallas 達拉斯烤菇牛堡都係超巨size呀！塊菇同塊堡都係超厚囉！唔止有漢堡，牛油果軟殼蟹墨西哥餅，相對嚟講冇咁heavy嘅嘢都有呀。
第5位 8鍋臭臭鍋
幾時都話香港人鐘意台灣美食同打邊爐，集呢兩個特點於一身嘅尖沙咀台式火鍋店1月重新上榜，已經係第4次打入10強喇！如果已經食過加咗台式臭豆腐嘅招牌臭臭鍋，再去都仲有其他特色鍋嘅。芝士牛奶鍋無得拉芝，但香濃牛奶湯入面嘅豬肉、心型魚豆腐同蛋餃等配料吸收哂湯底後特別鮮甜。
圖：Raul L.
第4位 Home Bar And Restaurant（*新上榜）
老實講荃灣有唔少特色餐廳，要立足仲要贏埋口碑，呢間西餐廳靠嘅係一個字：用心。由Set Dinner前菜沙律個醬汁就睇得出唔係行貨，而係廚師用橄欖油、醋再加少少黑松露自己整，分量啱啱好夠開胃。主菜德國脆皮鹹豬手嘅豬皮非常香脆，加上亦夠鹹香，美國10oz西冷扒亦係推介。
圖：布癲狗
第3位 樂糖（*新上榜）
新一年想Sweet啲，其中一個辦法就係食返份精緻甜品氹下自己。將軍澳呢間甜品店從個裝修開始就非常色彩繽紛，而且甜品選擇夠多又夠新鮮，薰衣草 • 香芋霧之花卷嘅卷蛋蛋糕上面有粒粒薰衣草，幽幽花香同香芋忌廉餡又幾夾。另外仲有近年大熱嘅紫薯拿破崙，口感較實但勝在甜味自然。
圖：VCY
第2位 麵道（*新上榜）
以前香港人通常都係食豚骨湯底，不過近年就多咗拉麵店以唔同湯底做招徠，荃灣呢間就有伊勢海老豚骨湯同濃厚雞白湯！特盛叉燒溏心蛋龍蝦豚骨拉麵有齊叉燒、糖心蛋、蔥花、木耳、紫菜同平時少見嘅餃子，湯底龍蝦味道濃郁。重點係可以自己磨白芝麻碎或者壓生蒜泥加落去，要幾重口味悉隨尊便。
圖：小桃bb
第1位 凡高廚房（*新上榜）
雖然話新年新氣象，不過原來銅鑼灣呢間口碑一直都唔錯嘅西餐廳都係第一次登上10強榜！呢間餐廳除咗地點夠就腳之外，裝修亦以梵高名畫為主題，環境先贏一分。招牌之一98%野菌湯係用咗牛肝菌同黑松露等九款雜菌，香味濃郁口感豐富。主菜可以點意式馬賽海鮮飯或者卡邦尼意粉，一樣唔會令你失望。
圖：joggling
文：Kar、Cathy
其他飲食潮流：
零食新星！可樂味薯片 + 韓風泡菜粟一燒 試唔試得過？
直擊史上最「臭」放題！任食榴槤品鑑Party
11架美食車大解構！黯然銷魂漢堡VS溫馨五色餃子
隨時接收最新資訊
讚好OpenRice專頁！
