老闆台灣拜師學藝首創 +5ºC 手抓餅專門店
開飯仔喺台灣因為「永和豆漿」超高水準嘅製作，愛上咗手抓餅。呢間店嘅老闆聽講專程遠赴台灣，喺手抓餅專門店拜師學藝，果然無令我失望！客人可以自由選擇餅餡，我就order咗芝士（實冇死嘅配料）同牛肉。因為即叫即整，攞落手熱辣辣，咬落去酥皮香脆，非常有層次感，咬落餡料到嘅時候，芝士流落嚟，混合牛肉嘅香味，正到無得彈！而家紫薯係大勢，老闆亦都緊貼潮流，推出紫薯味酥皮，非常有創意。
Photos by cocobb & Zoe Chui鑊氣滿分炒河 中興美食
冇錯，就係鑊氣！經過呢條街，冇可能唔俾呢間鋪頭嘅火花吸引。開飯仔都注視咗好一陣：一個男人快速咁執起配料，拎起鑊鏟一攪、火爐一甩，火花四濺，唔夠幾分鐘就上菜。開飯仔order咗個炒河，不枉佢雄雄嘅火花，炒河夠晒入味，牛肉香嫩，鑊氣十足，呢啲先叫地道！
Photos by bageladdiction & Shing Hei Terry Lam
街坊必食沙嗲串燒 沙嗲佬
話說沙嗲佬前身只係一個流動小販車，而家做到有埋鋪位，就知佢唔簡單啦！為咗保持食物嘅風味，老闆捨難取易，以炭燒肉，燒至金黃，再加上佢特製嘅南洋風味沙嗲醬，肉香同醬料配合得出奇地好，拎住一串串肉喺街度行過，醬料一滴滴咁跌落嚟，感覺先似返個地道香港人！
Photos by oosure & 為食迷你兵地道車仔面 林記
行過就見到大排長龍，點解？因為抵食囉！26蚊就有兩個餸加嘢飲。第一次嚟可能會比店中滿漢全席咁多嘅食物選擇嚇親。開飯仔個人鍾意牛柏葉同牛腩，牛柏葉彈牙爽口，食落好有口感，牛腩鮮美，配埋個牛腩汁湯底perfect池。
Photos by crazy becas hungry窮人之選 海南雞專門店
沒有最平，只有更平！25蚊海南雞飯就係佢最大嘅賣點。雞肉嫩滑，油飯滲透著雞香，跟餐仲有埋冬瓜湯送，正好可以褪去啲油膩感，清一清味蕾。雖然唔係話超水準，但係呢個價錢，都相當滿意。
Photos by yuyukimi & 小小狸貓咁難得香港有個咁具本土特色嘅夜市，你點可以唔去呢？遲啲都唔知仲會唔會留得返啦（泣）......
文:段
隨時接收最新資訊
讚好OpenRice專頁！
關鍵字
夜市
太安樓
台食
手抓餅
海南雞
複製到剪貼簿