好多人去泰國旅行，都可能會去過呢間泰國餐廳度食正宗、地道嘅宮廷美食，不過，而家唔使飛泰國都食到喇，佢嚟咗香港開分店呀！

食泰國嘢必食嘅一定有冬蔭公份，用上泰國新鮮運嚟嘅原材料，檸檬葉、香茅、青檸汁、辣椒等嚟熬湯底，再加埋泰國河蝦同草菇，仲有隻超大蝦呀，令到成煲湯都好鮮甜，而且酸味同香茅味比較重，後勁就有啲辣味慢慢滲出，層次感幾豐富下。

咖喱都係必食名單內嘅，呢度對咖喱同食物嘅配搭都好講究，規定嚴格，黃咖喱係要配蟹之類嘅海鮮，青咖喱就要配雞呢啲白肉，唔可以隨便轉。青咖喱雞嘅咖喱汁，係用泰國尖椒、鳥眼辣椒同泰國乾葱加埋椰奶等等去調製，微辣但香口，送飯或者點油鬆餅都好開胃。

甜品方面，點少得芒果糯米飯呀？糯米飯細細嚿，的的式式咁，有糯米底同黑糯米底，係幾香甜嘅，不過略嫌濕咗少少。

而如果鍾意食榴槤嘅朋友，應該會幾鍾意呢個暖心榴槤撻，入面係榴槤肉再加埋mascarpone cheese、cream cheese同ricotta cheese三重芝士口感呀，軟滑到一個點，榴槤味亦頗突出。

一班人食飯通常都會叫返杯嘢飲，特別要介紹下泰式雞尾酒，加入咗泰國嘅生果或者椰子去調製，係fresh嘅。尤其是Pina Colada，原個椰青咁上，唔講都唔知原來裡面溝咗酒！用椰青水加rum酒加椰奶加菠蘿汁調製完，再倒返落去，又幾有霸氣喎。

泰式雜錦沙嗲（豬、牛、雞）

燒大蝦炒金邊粉

藍象泰國餐廳
地址：尖沙咀廣東道17號海港城港威商場3樓3303號舖

文、相：Kar