【新店直擊】尖咀新開御好燒專門店可自己親手燒大阪燒（有片）

有間嚟自日本嘅大阪燒專門店開張喇，呢間新店有御好燒、廣島燒同文字燒食，仲可以自己落手落腳燒嚟食，好似幾好玩咁。

喺日本開咗廿幾年，有超過300間分店嘅道頓堀御好燒，嚟到香港一樣有好多款大阪燒食：

御好燒

3款燒嚟講，應該算係最易燒嘅一款，首先將個碗裡面嘅材料攪勻晒，打到有泡之後，直接倒落鐵板上面煎，每5分鐘反一反，反夠三轉淋埋汁、蛋黃醬同撒埋海苔粉、鰹魚粉就大功告成。

其中呢款流心芝士御好燒除咗有蛋呀菜呀肉呀之外，仲有3嚿芝士，放落中間一齊燒，完成作切開就會見到啲芝士慢慢流出嚟喇！成個御好燒嘅口感都好鬆軟，醬汁亦好香口，每啖都好豐富呀。

廣島燒

呢個應該係最難整嘅，首先喺鐵板度煎塊圓嘅薄餅，然後將菜、蔥、肉等等嘅配料逐層逐層疊上去，淋汁煎。煎緊嘅同時，喺隔離開多壇炒麵，邊炒邊加醬，咁上下就將麵搬埋上去餅上面，同樣又係喺隔籬煎蛋再疊上去，呢個時候個餅應該都幾厚下，1、2、3成個反轉煎，真係少啲功夫都唔得呀。

雜錦廣島燒咩料都有啲，食落有多重口感，啲麵索晒大阪燒醬好入味，如果你手勢好，煎到個餅底脆脆底，幾香口。而且因為有麵底嘅關係，都幾飽。

文字燒

如果由外貌協會嚟計，文字燒個樣最唔吸引。純粹就咁將啲菜呀、炸麵粉塊呀、同其他配料炒埋一齊，中間開窿加麵糊，令到賣相糊狀咁。不過，食不可貌相呀，喺呢堆「糊」底，有層飯焦㗎！面層濕潤得嚟底層又脆卜卜，雙重口感。

另外仲有日式pancake等等嘅甜品可以燒呀！

唔識燒唔緊要，餐廳有晒guideline教你每款嘢食點樣燒嘅。當然，如果你依然對自己嘅手勢同廚藝冇咩信心，係可以請師傅幫手燒返嘅，佢哋開舖前專誠去咗日本學咗2個月㗎！

道頓堀御好燒專門店
地址：尖沙咀K11購物藝術館210號舖