同大家介紹過唔少生日飯局嘅餐廳選擇，今次不如講下生日蛋糕啦。唔係次次都買雜果蛋糕、黑森林蛋糕呀嘛？呢排有啲新款式呀，睇下邊款啱你個壽星朋友~

日本軟芝士蛋糕  東海堂

呢間餅店推出日本軟芝士蛋糕系列：二重‧軟芝士蛋糕、絨紅‧軟芝士蛋糕同黃豆粉‧軟芝士蛋糕。三款嚟講，黃豆粉嗰隻比較特別，正正方方咁，幾易分嚟食。頂頭有黃豆粉味重嘅cream cheese mousse，下面幾層分別係意大利軟芝士忌廉、海綿蛋糕同黃豆粉忌廉芝士慕絲、日本黑蜜，整體口感幼滑，微微奶香，反而芝士味唔太重，感覺冇咁heavy咁。

栗子、紫薯蛋糕  聖安娜

另一間連鎖餅店就以秋天嘅甘味食材做主角：栗子、紫薯、金薯，每款蛋糕由兩種食材配搭而成。如果你個friend（或者你）鍾意食薯仔嘅，唔使諗，沖繩秋意，成個都係薯。紫薯忌廉圍住金薯忌廉，蛋糕層亦係一層紫薯一層金薯咁，好甘甜，最底就係朱古力薄脆，口感即刻豐富咗。

法國深秋就稍稍將金薯變咗做栗子，色系差唔多，但味道就更清甜。紫薯同栗子蓉混和，係幾軟綿豐富嘅，仲有粒真‧栗子添。

另外仲有輕盈版，純紫薯或者栗子味，但細個啲，自己一個食都得。

抹茶蛋糕   茶匠 清水一芳園

呢間嚟自日本嘅抹茶甜品店，即將就有兩款新嘅抹茶蛋糕賣，分別係五味濃茶芝士蛋糕，同抹茶布朗尼。前者望上去都見到五層，每層都唔同口感，但都係抹茶！由上到下係抹茶朱古力、抹茶乳酪、抹茶紅豆醬、焗抹茶芝士蛋糕同原味曲奇。抹茶控係咪心心眼咗？而後者則加入咗比利時白朱古力，相對嚟講較甜，亦較濕潤。

另外，佢哋同日會推出多4款蛋糕，係萬聖節專屬㗎，啲造型隻隻都好鬼可愛。4隻味分別係紫薯、南瓜、梨同朱古力，南瓜味濃，而梨嗰個亦夠香甜。

文、相：Kar