西環呢間擁有落地大玻璃嘅餐廳Cobo House，環境優雅清靜，餐廳周不時都會更換菜單，近一年就以西韓fusion菜為主，最近仲同意大利一間著名松露品牌合作，邀請到意大利米芝蓮星級名廚Silvia Regi Baracchi來港為佢地設計同烹調白松露菜式。
今次Silvia設計嘅嚐味菜單，每位$2,800，價錢就唔係好貼地，不過如果鐘意食白松露的話，Cobo House喺嚟緊11月都會有一個限定白松露菜單，每位只係$880，就會有四款菜式，包括香煎帶子及八爪魚、蟹肉意式餛飩配蟹籽及蟹湯脆片、低溫慢煮鱈魚配開心果脆皮或香煎小牛肉配開心果脆皮同甜品白酒煮梨，咁就抵食好多～
魚肉他他配醃小龍蝦
魚肉同小龍蝦先用橙汁同檸檬汁浸1-2個鐘，再加埋黑松露提味，味道酸酸地，做開胃小菜就最啱啦！
白松露溫泉蛋配西蘭花蓉及鯷魚
西蘭花蓉入面加鯷魚，食落口味道鹹鹹香香，配埋半熟溫泉蛋同白松露，估唔到又夾。特別一提配上嘅炸西蘭花葉，炸到香口好似紫菜咁，但又一啲都唔油。
BEETROOT TAGLIOLINI
呢款其實就係芝士紅菜頭意粉，意大利粉係由Silvia自製，加入紅菜頭就會呈現淡淡嘅粉紅色。芝士用咗巴馬臣芝士，香濃之餘又唔會搶咗白松露嘅味。
白松露薯仔意式餛飩配青豆醬及迷迭香 & 香煎鴨胸配南瓜醬、黑橄欖及松露
主菜部分意式餛飩內餡加咗薯仔同蘑菇，而鴨胸配上南瓜醬、黑橄欖同白松露薄片，鴨胸煎得啱啱好，質地軟腍，肉味濃郁之餘唔會蓋過白松露嘅香味，加埋甜甜地嘅南瓜醬解除油膩感。
意式奶凍
Silvia將松露加入蜜糖入面做醬汁，松露配甜甜嘅蜜糖，味道又意外地夾。而且加左大量水果食落一啲都唔會膩。
除咗白松露，餐廳最近嘅菜單就以西韓fushion菜為主，平時喺出面無咩機會食到架～
韓式牛肉紫菜卷
同時用咗意式炸飯球同韓式紫菜卷的特式，以韓式牛肉、麻油、芝麻及紫菜製成，外層炸到卜卜脆，食落好香口。
北海道海膽韓國辣椒意粉
用韓國辣椒同番茄醬汁煮意粉，加埋忌廉去中和辣味，再鋪上北海道海膽，海膽嘅味道完全融入意粉中，啖啖都係海膽味！
Miss Tuna烤薄餅
好似捲餅咁捲起佢嚟食，吞拿魚配上蔬菜同水果，無平時食薄餅咁滯，食多兩件都無問題！
Pop Mountain
店內最招牌甜品，鹹鹹甜甜嘅爆谷配上粟米味雪糕，好特別！味道好得嚟用嚟打卡都一流。
地址: 西環石塘咀南里8-12號地下及1樓
文：Yanica
相、片：Tom Li