保育活化後重開嘅歷史建築茂蘿街7號，年初進駐一間走日本明治時期和洋折衷風格、佔地2,000平方呎嘅餐廳，分為主餐廳、喫茶咖啡室，及摩登日式酒吧。4月正式開張，供應多款和風洋食，包括蛋包飯、明太子意粉等。私心推介每日新鮮製作嘅抹茶蝴蝶酥，打卡好睇、抹茶味又香濃！

主餐廳

Maison Meiji以明治維新時期飲食文化變革為靈感，裝修亦充滿當時和洋折衷嘅摩登風格

Omurice with Wagyu Demi-Glace Sauce（Lunch Set，$168）

餐廳搵嚟嚟自日本福岡嘅春田達雄先生擔任行政總廚，春田先生曾於Hal's Restaurant（已結業）任職主廚，傳統蛋包飯就係其中一道招牌菜！新店版本嘅雞蛋依然半熟滑溜、充滿蛋香，包住茄汁炒飯，再加上煮至軟腍入味嘅和牛同燒汁，味道豐富。
 

Miso Black Cod w/ Vegetable Croquette（Lunch Set，$268）

鱈魚西京燒帶淡淡焦香，魚皮香脆富油脂，魚肉肉質細緻多汁，加上味噌甜中帶鹹。下面嘅野菜可樂餅外脆內軟綿，配搭蘆筍同檸檬可以平衡油膩感。不過記得盡快食，如果唔係可樂餅就會被魚油同醬汁浸濕無咁脆㗎啦。
 

Classic Mentaiko Pasta（Lunch Set，$168）

意粉加入博多名物福岡明太子，醃漬過嘅明太子鹹鮮微辣，非常開胃。加上紫菜同紫蘇提味，可惜意粉略軟身。
 

喫茶咖啡室

半開放式嘅木系吧枱可以畀客人欣賞沖調咖啡同手拂抹茶嘅過程

更設榻榻米座位，係最受歡迎嘅打卡位

Premium Hand-Whisk Matcha：Rokumei（$178 / 2 Shots）

同一般Cafe唔同，呢度有手拂日本抹茶，有兩款唔同風味嘅京都宇治抹茶、同1或2 Shot選擇。點2 Shots會連埋抹茶粉同茶道工具奉上，係因為第二杯會由茶師帶領你自己手拂，可以親身體驗到日本茶道文化！而兩款抹茶中以鹿鳴較受歡迎，香氣到味道都帶抹茶嘅獨特甘甜，完全唔苦。配搭和菓子、例如拍攝當日嘅蕨餅，更突出抹茶嘅鮮味。
 

Matcha Palmier（$40）

抹茶蝴蝶酥係每日新鮮製作，以兩塊酥脆富牛油香嘅蝴蝶酥夾住抹茶醬，再灑上抹茶粉，餡料嘅甜度同茶香平衡啱啱好，回甘悠長。
 

Iced Drip Coffee（$69，限量供應）

咖啡方面推介冰滴咖啡，以冰滴萃取出嚟嘅咖啡口感香醇柔滑，再加上冷藏發酵48小時後，更能夠突顯單品咖啡豆嘅風味同層次。例如拍攝當日採用嘅咖啡豆嚟自埃塞俄比亞，聞落有優雅嘅花香，入口微酸帶甜，均衡清爽。
 

摩登酒吧

酒吧裝修走銀座風格，別室更放滿黑膠唱片，甚有情調

（左）Umeshu Blossom（$120），（右）Last Samurai（$160）

Kuromaru酒吧由調酒師遠藤雅彥先生主理，供應多款日本燒酎及精心調配嘅Cocktail。Umeshu Blossom以梅酒燒酎及黑糖本格燒酎為基底，加入果汁等製作而成，味道酸甜易入口。而Last Samurai以侍士の門甜薯燒酎調配，特別附上一小杯燒酎，可以試到燒酎本身甜薯芳香、濃厚而帶辛辣餘韻嘅原味，再同Cocktail對比返。
 

Maison Meiji
地址：灣仔茂蘿街7號1樓

文：Cathy.H
相、片：Wilfred Chui