一眾朱古力迷又有藉口要返鄉下喇！話說成日都有新期間限定味出嘅KitKat，最近連café都開埋！有新嘅限定味食就梗係唔使講啦，但café同時仲會有KitKat蛋糕同芭菲呀！

新店開喺東京銀座，有兩層，一層賣各種限定口味嘅朱古力，而一層就係可以坐定定慢慢食嘅café，好吸引㗎呢~~

先講最新嘅限定口味，係朱古力蛋糕呀！呢件蛋糕，就咁睇個樣，同平時啲KitKat冇分別，但係內有玄機呀。唔好一啖食晒，咬開就會見到中間係超濃嘅朱古力蛋糕呀！

留意返有啲限定嘅甜品，8月31號之後就冇得食㗎喇。「冰鎮KitKat」，有抹茶、Cranberry同杏仁味，仲要係冰鎮效果，出晒煙咁，視覺味覺都滿足到。

KitKat芭菲同樣啱晒夏天食，雪糕底再插幾條朱古力喺面，又係開心仔啲朋友。

另外仲有啲季節性嘅法式蛋糕同埋三文治等等。

真係去到食嘅朋友記得唔好自私食。嗰度有呢間店限定嘅送禮朱古力，可以喺KitKat中間刻字㗎，刻返幾條返嚟送畀冇錢冇假去嘅朋友仔啦。

KitKat Chocolatory
地址：〒104-0061 東京都中央区銀座3-7-2オーク銀座ビル1階

文：Kar
相：KitKat官網