近兩年多咗餐廳賣千層蛋糕，由美國過江龍到IG網店百家爭鳴。最近仲多咗呢間位於西營盤嘅小店，無品牌光環但勝在口味特別，好似富新加坡特色嘅斑蘭椰子，同清香唔過膩嘅玫瑰荔枝等。而且每個月仲會有期間限定嘅特別口味，嚟試多幾次都唔怕悶！
 

Shaz Confections主要由嚟自新加坡嘅Sharon打理，供應七款唔同口味嘅千層蛋糕，包括六款固定口味同一款每月限定，全部都係人手製作，自然就係數量有限啦。而佢地嘅千層蛋糕其中一個特別之處，在於由蛋糕底、16層crepe餅皮同忌廉組成。食落會比坊間無蛋糕底嘅口感層次更豐富，忌廉少啲亦代表無咁容易覺得膩。
 

咁多種口味當中，開飯仔特別推介斑蘭椰子千層蛋糕。口味靈感嚟自Sharon嘅故鄉新加坡，而且要喺香港買到新鮮嘅班蘭葉亦唔容易，值得一試。班蘭葉同椰漿嘅比例得宜，聞得到班蘭嘅清香亦食得到椰子嘅甜味，最後仲有一絲班蘭葉嘅獨特餘韻。
 

而10月限定嘅港式奶茶亦係非常容易入口嘅選擇，食得出紅茶香味，同每層厚度均勻忌廉嘅柔滑口感亦非常夾。不過開飯仔就覺得奶嘅甜味可以再輕手啲啲，茶香突出啲會更有港式茶餐廳奶茶嘅風味。
 

冧酒提子千層蛋糕係當中感覺比較成熟嘅口味，皆因蛋糕裡面同上面嘅提子乾係用冧酒浸足一個星期，酒香非常濃郁。但亦唔洗擔心食落會太Heavy，因為佢地嘅忌廉係特別調配過，甜度輕怡而口感亦比較Fluffy。
 

最受女孩子歡迎嘅玫瑰荔枝千層蛋糕有雅緻嘅粉紅色賣相，而且一上枱就會聞到玫瑰甜香。難得食落甜味自然，唔會有食緊香精嘅感覺。問過Sharon先知玫瑰荔枝呢個配搭嘅靈感嚟自新加坡一款好受歡迎嘅飲品Bandung（玫瑰露加奶）同Pierre Herme嘅玫瑰荔枝馬卡龍，佢地亦特別選用嚟自新加坡嘅玫瑰糖漿，配搭粒粒荔枝果肉，香甜討喜。
 

抹茶控大愛嘅日本抹茶千層蛋糕亦特別用咗日本抹茶粉，連最底嘅蛋糕亦轉用抹茶蛋糕。食落回甘程度不及日本抹茶過江龍，但抹茶嘅清香亦算突出，整體係咁多款口味當中最Light嘅一件。
 

而覆盆子芝士千層蛋糕就最啱Cheesecake Lover，因為忌廉芝士香味非常濃郁，有少少似食緊特別口感嘅Cheesecake。而芝士裡面加咗覆盆子利口酒同覆盆子果肉，以果香平衡返芝士嘅膩度。最後仲有海鹽焦糖千層蛋糕。
 

食千層蛋糕嘅時候可以按返口味同個人喜好配返杯熱茶或者咖啡，呢度嘅茶葉選用法國百年品牌Betjeman & Barto，係Sharon喺旅行途中發現嘅心水之選。
 

而咖啡亦有多款選擇，Rose Latte有足夠呃Like嘅賣相，底部粉紅色嘅係玫瑰糖漿，奶泡上面再加玫瑰花瓣點綴。相機飲完之後記得先搞勻再享用，入口先飲到玫瑰花香，再到咖啡嘅Aftertaste。
 

就算唔鐘意食甜品，嚟到亦可以食每日新鮮出爐嘅牛角包、蘑菇香草法式鹹批等。連水亦特別加入檸檬同薄荷，清新解膩。
 

見你咁捧場睇到最後，不妨預告埋畀你聽11月嘅千層蛋糕限定口味會以蜂蜜做主角！另外如果想訂原個千層蛋糕做Party或者生日蛋糕嘅話，記得預早四日同佢地訂，可以選擇7吋或9吋㗎。

Shaz Confections
西環西營盤第一街21號地舖

文、相：Cathy