食嘢唔一定係求味覺嘅享受，有時食嘅更加係一份回憶。近年有唔少老字號結業，相信都傷透咗唔少街坊嘅心，亦令人覺得惋惜！好彩今年都有唔少老店重開，仲保留返昔日嘅懷舊感覺，回憶即刻返晒嚟！希望呢份回憶可以一直保存落去啦。
經典美式燒牛肉 Lawry’s The Prime Rib
呢間喺香港開咗十年以上嘅美國燒牛肉餐廳，因為和記大廈要拆卸重建而被迫結業，幸好後嚟喺中環搵到新舖位。新店採用落地玻璃窗設計，加上圓拱形天花，比以前嘅裝修更高級優雅。銀色餐車、即席切肉等經典回憶都再次重現，而燒牛肉亦都同樣大大塊，同樣juicy~
近一世紀茶樓 蓮香茶室
「蓮香樓」可以話係唔少香港人嘅回憶，絕對稱得上係香港最懷舊嘅茶樓之一呀！老闆宣佈要休業嗰陣，一班老茶客真係好唔捨得架，幸好得班舊伙計接手重開。雖然改咗名做「蓮香茶室」，但食物依舊、伙計依舊，當初嘅情懷都依舊，好有親切感。
超講究粵菜 楓林小館
佢哋嘅乳鴿可以話沙田友嘅回憶，三年前結業後大家都一直好懷念。雖然而家重開地點唔喺沙田，去咗銅鑼灣，但餐廳名冇變，四大招牌名菜都冇變，好似紅燒乳鴿咁，就依然嫩滑多汁，功夫一樣做足！而且仲加入咗唔少粵式點心同小菜，好似蝦餃皇、同切成螺旋形嘅「思雅小青瓜」咁添。
親民懷舊車仔麵 35座車仔麵
曾經喺秀茂坪邨35座賣咗16年嘅車仔麵，因為拆樓關係而被逼結業，帶走嘅仲有一眾老街坊嘅回憶。呢間回憶中嘅車仔麵今年再次喺九龍灣重開啦！除咗有懷舊餸，例如雞翼尖、牛腩、滷水豬腸等，仲加入咗秘製辣魷魚、流心蛋等新嘅菜式。
金鳳餐廳新店 香港情
「金鳳餐廳」——王家衛嘅《花樣年華》拍攝地，正正就係呢間餐廳嘅前身啦！為保持懷舊嘅感覺，餐牌同原本嘅有9成相似，可惜唔少食客都認為食物水準已經大不如前了。
香港懷舊冰室 嘉樂冰廳
餐廳自1978年開業至今，但舊年因老闆年事已高，唯有選擇結業。好彩有新老闆接手，今年再次以懷舊面目示人。新老闆偷師半年，務求食物水準同舊時一樣。鮮牛蛋治用夠6、7隻蛋，絕冇欺場！裝修都同舊日冰室一模一樣，盡力保留那些年嘅回憶！
高質街頭小食 車品品小食
街頭小食通街都係，但想食有水準嘅街頭小食就未必係易事。呢間喺大角咀屹立19年嘅高質小食店喺年頭結業後，年底決定再喺大角咀重開（不過搬咗上樓上舖）。佢嘅足料碗仔翅就最出名！選用唔同新鮮材料，好似赤肉、冬菇、黑木耳等，街坊們又可以再食返舊味道啦！
自家製蛋卷 齒來香蛋卷
圖﹕soya1314
呢間喺西環屹立40幾年嘅老餅店舊年結業，宣佈結業嗰陣更加有唔少人特意去幫襯，希望記住呢份經典味道。但大家唔使愁啦，呢間老餅店早前喺原街重開，以後又可以食到人手捲製嘅蛋卷啦！濃濃嘅蛋香味，未入舖都已經聞到！
文﹕Kiko
編：Kar