如果話馬鞍山係美食荒漠，天水圍嘅朋友都會話天水圍係甜品沙漠。不過，嚟緊可能唔會再有人咁講喇，前幾日啱啱有間新嘅甜品小店開張呀！
呢間甜品舖細細間，甜品款式唔算話好多，但係勝在中、西式都有得揀，心太軟、芭菲、窩夫、特飲、中式糖水……一班人或者一家人嚟到都可以各取所需呀。可能係新開嘅關係啦，menu淨係得一份黐喺牆度，想揀食乜就要行出位去睇下喇。
每款甜品都係靚靚樣，贏在起跑線上，起碼吸到睛呃到like先嘛。留意返抹茶心太軟係每日限量供應㗎，抹茶心太軟配埋抹茶雪糕，開心死抹茶控啦，聽講仲係用日本抹茶粉整嘅。不過如果你同開飯仔一樣咁唔好彩，去到已經賣晒抹茶味，咁都可以試佢嘅朱古力味心太軟嘅。堅‧流心㗎，朱古力唔算太甜，個蛋糕外層脆脆地，內裡就偏軟身。
窩夫亦都有幾種味揀，百利甜酒朱古力、芒果、鮮雜果，仲有抹茶麻糬窩夫。窩夫係硬脆質灺，一份四塊，每塊中間都夾咗啲麻糬喺入面，食落感覺煙煙韌韌der。窩夫有淡淡嘅抹茶味，配埋側邊微甜嘅日本紅豆一齊食，係nice嘅。
特飲方面，抹茶控可以繼續揀抹茶嘢：宇治抹茶奶。面頭有層厚厚嘅奶泡，抹茶味係香嘅，但同時都幾甜下。如果想要啲酸酸地嘅嘢飲可以揀紫黃特飲，紫係蝶豆花、黃係柚子肉，再加埋梳打水同檸檬汁，而呢杯嘢特別在於係由你自己沖㗎，很好玩吧。不過可能新店新開冇耐，未係好上手啦，啲嘢食都等得幾耐下。
同埋，呢間舖嘅位置有啲啲偏，但識行其實唔難。就喺天水圍站E3出口之後，轉左落斜路，應該會見到一堆旗嘅，沿住啲旗行到盡頭轉右入個停車場就係喇。
一糖
地址：元朗屏山上璋圍249號地舖
文：Kar
其他新店直擊/預告：
拉麵控注意！日本涉谷鹽味拉麵 即將登陸葵芳
最期待的畫面出現了！香港築地市場 超鮮鱈場蟹！（有片）
京都百年抹茶老店 即將登陸中環
隨時接收最新資訊
讚好OpenRice專頁！