新味雪條 ISee iSee
佢哋出晒名將啲生果大大片咁加入條雪條裡面就唔使我多講啦，而家主要係同大家介紹返佢兩款新口味：黑椒芒果同黑芝麻流心！係呀，係黑椒芒果，成條芒果雪條上面有好多，係好多粒黑色一點點，全部都係黑椒嚟㗎，初初食落都覺得冇咩特別，都係甜甜der芒果味，點知啲黑椒味愈食愈出呀！但同芒果又幾夾喎，食晒成條個口仲有啲餘韻添。另外嘅黑芝麻流心，出面嗰層係椰汁加豆奶，中間係堅‧流心，小心啲食呀！不過應該要攤耐少少先會見到呢個效果，我諗你哋部相機食晒之後都應該差唔多時間流得。
即榨原個西爪汁 易購菓
本身係網店嚟嘅，今次擺個實體攤檔，喺熱辣辣嘅天時，你行過呢個檔攤最開心就應該係見到佢一個個西瓜同火龍果擺晒喺度，有店員即場撬開個西瓜/火龍果，再拎部機落去攪呀攪，雪凍佢拎返出嚟就係天然西瓜/火龍果刨冰喇！聽到都覺得爽，揸喺手飲一啖就仲爽！
天然果乾Erickson Organic farm
口痕除咗開包薯片食，其實都可以諗下食天然生果乾喎，健康啲嘛。冇加任何糖份㗎，但因為啲生果本身都好甜，所以就咁食都覺得甜，有菠蘿味有火龍果味等等。另外仲有經醃製嘅鹹柑桔，放得愈耐就愈香，愈醇，沖蜜糖飲就最啱嘞。
奶油士多啤梨老徐農莊
創辦人由工廠老闆轉做有機農夫，種下有機蔬菜，又種下士多啤梨同其他生果咁，愈種愈多款。其中有款用特別技巧種嘅「奶油士多啤梨」，每個禮拜用牛奶灌溉兩次，令到士多啤梨食落都有陣陣奶香，到時大家喺果藝巿集就可以試到喇。
另外，仲有剩食紮染工作坊、瑜伽生機素食養生工作坊等等攤檔，文青同偽文青都可以各有所得。
詳情：
日期：6月30日 – 7月3日
時間：6月30日（4:00pm – 8:00pm）
7月1-3日（1:00pm – 8:00pm）
地點：PMQ元創方地下Marketplace & Courtyard及指定工作坊地點
詳情參閱：相關網址
參與攤檔：
飲 品：Maison、 Water Juicery、 Mak’s Beer 麥氏啤酒
食品：Erickson Organic farm、ISEEiSEE、Gourmet Tasty、La Cuisine Bourgeoise、Myfaireladies Sweeties、Noodle and Dog、Oddies Foodies、Rebel Girls、3 Potatoes叁薯、易購菓、老徐農莊、 金多榴槤、甄沾記
創意小店：Dotted Collective、Plain Skincare、Random Handmade、MUSE、櫻。蒲。店
工作坊：本土有機耕作及大蕉班戟工作坊、剩食紮染工作坊、手造潤唇膏及面膜工作坊、瑜伽・生機素食・養生工作坊、火龍果桂花果醬工作坊、果酒及橙皮糖工作坊、Fruit Jamming噴漆布袋工作坊、煮流: 果然好味、法式檸檬蛋糕體驗班
文：Kar
隨時接收最新資訊
讚好OpenRice專頁！