各位韓迷應該都等咗好耐，韓國人氣鐵板雞專門店嘅香港分店終於要開張喇。餐廳仲會首次推出4款唔同辣度嘅招牌鐵板雞任食添呀！

4款招牌鐵板雞包括「柳氏家辣炒雞」、「炭烤味辣炒雞」、「烤肉味炒雞」同埋同韓國同步推出嘅「蜜糖味噌炒雞」，用上多款獨家秘製特色醬汁同烹調方式，另外可以加配八爪魚、雜錦海鮮、炒飯或炒麵等等。芝士控仲可以加食芝士圍爐邊，將嚿雞醮埋啲芝士再拉埋絲，OMG！

呢幾款嚟講，如果你超食得辛辣嘅，就建議你嗌最高辣度級別嘅炭烤味辣炒雞，如果完全唔食得辣呢，咁就嗌味噌蜜糖炒雞啦，嫩滑嘅雞肉沾上味噌蜜糖醬汁，甜甜der。

至於招牌原創嘅鐵板炒辣雞，辣得嚟又唔係太濃嘅死辣，連埋韓國獨創嘅惹味秘製醬料，炒緊都未食到落口已經聞到陣陣香味，食落辣味香得嚟又似乎鹹咗少少。側邊配料包括三味年糕（原味、芝士味、蕃薯味）同其他新鮮蔬菜等等，如果有嗌到芝士圍爐邊嘅，仲可以捲埋嚟食添。

BTW，唔使擔心自己係地獄廚神呀，因為會有師傅專責幫每枱客人炒熟㗎。而放題嘅傳統韓食都有唔少選擇呀：包括辣炒五花腩、韓式燉牛肋骨、水冷麵、宮廷炒年糕、辣味魔鬼蛋、芝士炸雞之類，仲可以自製生菜包，返埋位夾埋隻雞肉一齊食，咁就辣得嚟又有啲小清新嘅感覺。

柳氏家
地址：沙田新城市廣場一期7樓709室
試業日期：5月16日

放題詳情：
午巿60分鐘（炒雞1次加無限次享用放題區）：$88起、
午市90分鐘（無限追加炒雞及享用放題區）：$138起（成人）、$98起（小童及長者）
晚市90分鐘（無限追加炒雞及享用放題區）：$198起（成人）、$138起（小童及長者）

文、相：Kar