平時去韓國旅行多數都係睇吓旅遊書有咩餐廳介紹，炸雞、人參雞、韓燒依啲普通嘢你就食得多，但你又知唔知韓國當地年輕人真正鍾意去邊啲餐廳同café打卡呢？今次等開飯仔為大家介紹吓真正住喺首爾當地嘅韓妹韓仔鍾意去邊到搵食啦。
懷舊便當餐廳 도시락 파스타
地址：桂洞，鐘路區，首爾8-2(서울특별시 종로구 계동 8-2)
呢間位於北村嘅餐廳，賣點係用韓式便當鐵盒嚟擺放食物，賣相特別，好有懷舊感覺。食物以西式麵食為主，睇落都幾吸引。見唔見到放喺蛋架上面一舊舊好似石頭嘅物體呢？唔係擺設嚟嫁，係食得嘅黑麵包，個樣咁搞鬼，唔知食落又會點呢。
粉紅色洗手間任你影 이태원 YAS
地址：梨泰院洞，龍山區，首爾27 6(서울특별시 용산구 이태원로27길 6)
女仔好多時去café都唔係為咗食嘢，而係為咗影相，咁呢間café就啱晒，事關呢到有個粉紅色洗手間任你影，單係睇相都已經見到唔少韓妹都鍾意喺到影相。除此之外，呢到嘅餐廳環境亦好chill，中午可以坐喺玻璃幕牆下面食晏，俾陽光照住，個人都精神啲。循例都講下啲食物啦，多數人嚟呢到都會叫蟹意粉同pizza，睇落賣相都唔錯嫁。
滋味醬烤魷魚咖哩飯 Geoko Table 도마뱀식당
地址：望遠洞，麻浦區，首爾415-38 1樓（서울 마포구 망원동 415-38 1층）
依間餐廳個名叫「蜥蜴餐廳」，但係放心，依到食嘅野同蜥蜴完全無關，而係食咖哩飯。呢到嘅咖哩有別於平時食到嘅味道，而係用店主自行調配嘅大蒜黃油味咖哩，比起一般咖哩更濃味，亦比較辣。呢到最吸引嘅一定係呢碟原條醬烤魷魚咖哩飯，魷魚同飯嘅比例幾乎係一比一，夠晒滿足。
當甜甜圈遇上咖啡 Ferry Roasters
地址：首爾特別市龍山區梨泰院洞 225-22 (서울시 용산구 이태원동 225-22)
鍾意打卡嘅朋友，依間café你地就一定唔可以錯過喇。甜甜圈同咖啡相信大部分人都試過， 但將依兩樣野擺埋一齊你又試過未呢？依間位於龍山區嘅café大膽地將甜甜圈放落咖啡入面，成為一種全新嘅組合，結果亦好受韓妹歡迎。雖然唔知味道係點，但單單係影相打卡已經夠晒吸引，依個時候味道仲重要咩？
浮喺杯上嘅小鹿 프로젝트얼스
地址：城北，東城北區，首爾126-31 (서울특별시 성북구 성북동 126-31)
喺韓國行街行到攰攰地，想搵間café輕輕鬆鬆坐吓hea吓，但又唔想食得咁普通，可以試下嚟呢間café喎，呢到有超可愛嘅立體小鹿飲品等緊你啊。一隻隻立體嘅小鹿，配上比利時巧克力同牛奶，成為咗杯好kawaii 嘅飲品，用嚟影相打卡一流。呢到嘅環境仲好舒服添，空間大之餘，亦有好多座位，真係好啱大家掃完貨之後嚟充充電嫁。
文：Dap