葡景軒

營業中

休息中

基本上每次去澳門都一定要食葡國餐，喺澳門都真係食過好多間，但係我自己最鍾意返嚟嘅，就一定係呢間葡景軒，鍾意呢度坐得好闊落，加埋裝修都幾靚，食嘢嘅時候都會覺得舒適同開心。今日約埋朋友一齊嚟呢間餐廳食飯，朋友都讚不絕口！食物方面有幾樣嘢係我每次都一定會叫嘅，首先就係佢哋個湯，呢度個葡式傳統薯蓉青菜湯清清甜甜，用嚟暖胃一流，而且因為佢夠清，唔會飲完之後就食唔落其他嘢。炙燒葡式香腸都係另外一樣，我覺得好好味嘅小食，香腸香脆有嚼口，燒完都可以保持到好多汁。葡式白酒炒花蛤都係另外一樣會食上癮嘅嘢，因為呢度嘅花甲特別肥美，用埋白酒炒過之後就帶晒啲甜味出嚟。朋友今次自己話想食葡式小食拼盤，呢樣嘢都係我第一次食，炸嘅嘢都炸得酥脆，冇油益味。炙烤馬介休烤葡式鳕鱼係我第一次食，超厚肉，食物真係好過癮，但係真係冇諗過原來重點係啲薯仔度，總覺得吸咗一啲魚油嘅香味！葡式什錦海鮮扁麵都好出色，兩個人分一碟就剛剛好，咁樣就可以食多啲嘢。最後就到甜品，我哋叫咗一個朱古力慕斯，好smooth好正！