Vegmind

營業中

休息中

最近有間元朗素食Cafe登陸港島，雖然Menu上100%全素食，但食物選擇創新又多款色，從主食、小食、甜點同飲品都十分有心思。環境以木系為主，座位闊落，令人感覺舒適。特別推介素窩蛋免治牛肉煲仔飯，原鍋上咋咋聲，自家製牛肉餅還原度十足，窩蛋嘅熟度亦做到啱啱好，估唔到煲仔飯用咗Risotto，帶點咬口，中西合璧，性價比甚高。VMC素牛肉漢堡同樣出色，麵包超級軟熟，帶淡淡香氣，自家製好有heart，夾住牛肉餅、菠蘿、番茄、芝士同菜，咬落口感豐富，層次分明，配埋沙津菜幫助解膩。朋友對魚類過敏，今次終於有得食！魚肉主要以大豆類混合而成，無論係味道同質感都好相似，外層炸至酥脆可口但唔會覺得油膩，薯條嘅薯味都幾突出，配埋蜜糖芥末醬令人開胃。如果唔鍾意整識整怪嘅話餐廳都有純沙律碗供應，超級能量碗包含番茄、黑豆、藜麥、粟米、牛油果、無花果、脆脆同核桃麵包，旁邊附上黑醋，味道清新，好睇又好食。全部套餐會附上Side Dish，今次有南瓜湯、紅菜頭同蛋沙律配素炸魚皮，南瓜湯濃稠度適中但味道偏清淡、紅菜頭就正常發揮、蛋沙律配麵包好夾、素炸魚皮薄身又脆口，絕對會回訪。