泰鳩

營業中

休息中

之前聽朋友講旺角有間Mirror同error都有份嘅泰國菜，不過一直冇機會去試。今日同朋友得閒，就一早book咗位嚟試吓啦。一去到好彩有book位，因為真係好多客人，差唔多全場都坐滿晒，今日仲要係平日咋喎。聽講呢度最出名嘅就係乳豬煲，咁我就一早訂位嘅時候已經落定單，聽到隔籬枱好多都有叫呢個煲。乳豬煲可以揀湯底，分別係冬陰功同椰子雞，因為我唔食得辣，咁就揀咗椰子雞啦。一上枱真係好香噴噴，試咗一啖椰子雞湯，好濃郁，而且味道好清新。本身都有啲驚乳豬放落個湯底度會唔會好唔夾，估唔到完全唔會，脆嘅外皮浸落啲湯度，就好似食緊響鈴咁樣。而且佢嘅乳豬唔會太肥，好多肉。另外呢個生蝦刺身又係好推薦，因為佢好新鮮，而且好大隻，食落好彈牙好開胃。我同朋友分別叫咗兩杯唔同嘅嘢飲，我就叫做芒果沙冰，飲落唔係太甜，而且芒果好多，好啱夏天飲呀。呢間餐廳又靚，而且價錢好平，同埋有好特別嘅乳豬煲，真係好推薦大家嚟試吓。下次朋友聚會我都會再黎試，不過一定要記住早啲book位呀。