La Parrilla Steakhouse

以為中環銅鑼灣放lunch先有咁靚西式餐廳，原來北角堡壘街呢邊開咗間阿根廷紅磚扒房，今次晏晝過去，一於食得light d，選購咗佢嘅意粉薄餅午市套餐。套餐$128已經有飲品(汽水或茶)同蘿蔔湯，另外主菜有意粉或者薄餅。如果想圓滿啲，可以再點選加錢嘅甜品，有我最鍾意嘅意大利Tiramisu。甘筍湯好Creamy又好飲，份量適中安格斯牛肉丸意大利麵，當中牛丸有三粒，咬落去非常軟，人手製作嘅感覺。巴馬臣芝士中和咗蕃茄醬嘅濃味。Tonno Pizza 滿滿嘅吞拿魚，加上意大利水牛芝士，未咬已經覺得非常香濃，薄餅皮有啲似印度薄餅，外脆內軟，個心好軟熟。難得嚟到阿根廷餐廳就試埋佢嘅甜品，tiramisu酒香值得加錢去食！另外個奶凍亦都非常驚喜，粒粒嘅雲呢拿籽喺奶凍上，係新鮮整出嚟嘅味道。呢度環境非常優美，加上紅磚裝修，浪漫感十足，非常適合打卡或者慶祝節日嚟食！另外見到佢餐牌上有歡迎小朋友kids menu，一家大細嚟到家長都唔需要憂心小朋友冇啱嘅食物。