起鍋 (已結業)

今日嚟灣仔做嘢，晏晝約咗喺附近返工嘅朋友食個 quick lunch。揀咗友人提議嘅呢間「起鍋」，餐廳晚市主打火鍋，而午市就有粉麵飯套餐等供應。店舖裝潢別緻，走懷舊復古風，由門口嘅七彩燈籠、鐵閘、郵箱，以至室內嘅布置和擺設，每個角落都充滿心思，啱晒同朋友嚟影相打卡！我哋點咗兩個餐，泰式鴨髀河、香葉肉碎煎蛋飯，同一客手工餃子，跟餐 free 罐裝汽水，+$12 可轉泰式奶茶、青檸梳打或三色冰。先嚐泰式鴨髀河 ($88)，湯底味道唔錯，入口濃郁鮮甜，水準甚佳。鴨髀大大隻，啖啖肉，皮與肉中間有層薄薄嘅油脂，鴨味非常香濃。河粉比平時見慣嘅闊身，入口滑溜好吃！另外呢客香葉肉碎煎蛋飯 ($68)  賣相亦很吸引，白飯伴以香葉、豆角爆炒嘅肉碎，配上切得細細嘅小辣椒，辣辣地，超開胃，加埋隻煎蛋一齊食，真係冇得輸。手工餃子 ($16)：餃子 3 大隻、外皮薄滑，內裡塞滿香葉肉碎餡，入口清香不膩。下次經過會再嚟試下其他一人餐。